Vientiane Times Lao
ທຸກຄົນທີ່ອາໄສຢູ່ລາວຕ້ອງເຂົ້າໃຈຕໍ່ຄວາມອັນຕະລາຍຂອງພະຍາດໂຄວິດ-19

ທຸກຄົນທີ່ອາໄສຢູ່ລາວຕ້ອງເຂົ້າໃຈຕໍ່ຄວາມອັນຕະລາຍຂອງພະຍາດໂຄວິດ-19

‘‘ບຸກຄົນໃດລັກລອບເຂົ້າມາແລ້ວນຳເຊື້ອພະຍາດໂຄວິດ-19 ເຂົ້າມາຕິດໃສ່ຜູ້ອື່ນ ຜູ້ນັ້ນກໍ່ຕ້ອງມີຄວາມຮັບຜິດຊອບທຸກດ້າບໍ່ວ່າຈະເປັນຄ່າໃຊ້ຈ່າຍຕ່າງໆ ແລະ ທາງກົດໝາຍບ້ານເມືອງ, ຖ້າລາວເຮົາປ້ອງກັນໄດ້ດີ ກໍ່ເປັນການຊ່ວຍປະເທດເພື່ອນບ້ານທີ່ຕິດກັບພວກເຮົາ ພ້ອມກັນນັ້ນຫາກປະເທດເພື່ອນບ້ານປ້ອງກັນໄດ້ດີບໍ່ໃຫ້ພະຍາດດັ່ງກ່າວລະບາດກໍ່ເປັນການຊ່ວຍພວກເຮົາເຊັ່ນກັນ, ຮຽກຮ້ອງໃຫ້ທຸກຄົນໃນສັງຄົມຮັບເອົາຂໍ້ມູນຂ່າວສານຢ່າງມີສະຕິ, ໃຫ້ເອົາໃຈໃສ່ຕິດຕາມຂໍ້ມູນຂ່າວສານຈາກທາງການ, ບໍ່ໃຫ້ສົ່ງຕໍ່ຂ່າວລືຕ່າງໆ ທີ່ບໍ່ມາຈາກແຫຼ່ງທາງການ ເຊິ່ງອາດຈະສ້າງຄວາມສັບສົນວຸ້ນວາຍໃນສັງຄົມ’’, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ກ່າວໃນພິທີຖະແຫຼງ ຂ່າວ.

ທ່ານ ນາຍົກລັດຖະມົນຕີ ໄດ້ຖະແຫຼງກ່ຽວກັບສະພາບການສະກັດກັ້ນ ແລະ ຕ້ານການແຜ່ລະບາດ ຂອງພະຍາດ ໂຄວິດ-19 ເມື່ອວັນທີ 19 ເມສາ 2021 ທີ່ຜ່ານມານີ້ ຢູ່ສຳນັກງານນາຍົກລັດຖະມົນຕີ ໂດຍທ່ານໄດ້ຮຽກຮ້ອງໃຫ້ທຸກຊັ້ນຄົນທີ່ອາໄສ ຢູ່ສປປ ລາວເອົາໃຈໃສ່ເພີ່ມທະວີໃນການປ້ອງກັນພະຍາດໂຄວິດ-19, ຮັບຮູ້ເຂົ້າໃຈ ຕໍ່ຄວາມອັນຕະລາຍ ຂອງພະຍາດດັ່ງກ່າວ, ບົນພື້ນຖານນັ້ນ ຮຽກຮ້ອງໃຫ້ ທຸກຄົນສືບຕໍ່ເພີ່ມທະວີການປະຕິບັດ ຄຳສັ່ງ, ຄຳແນະນຳ, ແຈ້ງການ ຂອງຄະນະສະເພາະກິດແຕ່ລະຂັ້ນ ທີ່ອອກມາແລ້ວໃຫ້ເຂັ້ມງວດ ດ້ວຍຄວາມເປັນເຈົ້າການ ແລະ ໃຫ້ຖືວ່າວຽກງານດັ່ງກ່າວ ແມ່ນໜ້າທີ່ ແລະ ຄວາມຮັບຜິດຊອບຂອງຕົນອີຫຼີ, ພ້ອມນີ້ຮຽກຮ້ອງໃຫ້ທຸກຄົນໃນສັງຄົມຮັບເອົາຂໍ້ມູນຂ່າວສານຢ່າງມີສະຕິ, ໃຫ້ເອົາໃຈໃສ່ຕິດຕາມຂໍ້ມູນຂ່າວສານຈາກທາງການ, ບໍ່ໃຫ້ສົ່ງຕໍ່ຂ່າວລືຕ່າງໆ ທີ່ບໍ່ມາຈາກແຫຼ່ງທາງການ ເຊິ່ງອາດຈະສ້າງຄວາມສັບສົນວຸ້ນວາຍໃນສັງຄົມ, ສະເພາະຊາວລາວ ແລະ ຊາວຕ່າງປະເທດ ທີ່ມີຈຸດປະສົງທີ່ຈະເຂົ້າ-ອອກ ສປປ ລາວ ໃຫ້ລາຍງານຕໍ່ເຈົ້າໜ້າທີ່ ທີ່ກ່ຽວຂ້ອງເພື່ອດຳເນີນການໃຫ້ຖືກຕ້ອງຕາມຂັ້ນຕອນຂອງລະບຽບການ, ບໍ່ໃຫ້ລັກລອບເຂົ້າ-ອອກ ເຊິ່ງຈະນຳຜົນເສຍຫາຍແກ່ປະເທດຊາດຂອງເຮົາ ກໍ່ຄືປະເທດເພື່ອນບ້ານຂອງພວກເຮົາ, ຖ້າລາວເຮົາປ້ອງກັນໄດ້ດີ ກໍ່ເປັນການຊ່ວຍປະເທດເພື່ອນບ້ານທີ່ຕິດກັບພວກເຮົາ ພ້ອມກັນນັ້ນຫາກປະເທດເພື່ອນບ້ານປ້ອງກັນການແຜ່ລະບາດພະຍາດດັ່ງກ່າວໄດ້ດີກໍ່ເປັນການຊ່ວຍພວກເຮົາເຊັ່ນກັນ. ໃຫ້ສືບຕໍ່ເພີ່ມທະວີການຕິດຕາມ, ກວດກາ, ລາດຕະເວນ ລຽບຕາມຊາຍແດນ ຢ່າງເຄັ່ງຄັດເພື່ອສະກັດກັ້ນການ ເຂົ້າເມືອງ ຜິດກົດໝາຍ ໂດຍສະເພາະ ເຂດຊາຍ ແດນກັບປະເທດໃກ້ຄຽງທີ່ມີການລະບາດໃນຊຸມຊົນ. ຖ້າພົບເຫັນຕ້ອງນຳມາກວດວິເຄາະຊອກຫາເຊື້ອໂຄວິດ-19 ແລະ ນຳສົ່ງໄປຈຳກັດບໍລິເວນ ໃຫ້ຄົບ 14 ວັນ ຕາມລະບຽບ. ໃຫ້ອຳນາດການປົກຄອງທ້ອງຖິ່ນ ເປັນເຈົ້າການຕິດຕາມ ກວດກາ ການເຂົ້າມາ ຂອງບຸກຄົນທີ່ກັບມາຈາກປະເທດທີ່ມີການລະບາດຂອງພະຍາດ ໂຄວິດ-19, ພ້ອມກັນນັ້ນຄອບຄົວ ແລະ ຍາດພີ່ນ້ອງ ກໍ່ຕ້ອງໃຫ້ການຮ່ວມມື ແລະ ແຈ້ງຂໍ້ມູນຄວາມຈິງ ໃຫ້ການຈັດຕັ້ງ ຊາບດ່ວນ ເພື່ອແກ້ໄຂບັນຫາໃຫ້ທັນເວລາ, ບໍ່ໃຫ້ປິດອຳ, ເຊື່ອງອຳຂໍ້ມູນການເຄື່ອນໄຫວຂອງຜູ້ຕິດເຊື້ອ ເພາະຈະເປັນການສ່ຽງຕໍ່ການຕິດເຊື້ອເພີ່ມຂຶ້ນແບບທະວີຄູນ.

ທ່ານ ພັນຄຳ ໄດ້ກ່າວຕື່ມວ່າ: ນອກນັ້ນໃຫ້ສືບຕໍ່ສັກວັກຊີນກັນພະຍາດ ໂຄວິດ-19 ໂດຍສະເພາະ ກຸ່ມເປົ້າໝາຍບູລິມະສິດ ແລະ ຂະຫຍາຍໄປທຸກສາຂາອາຊີບ ຕາມແຜນທີ່ກຳນົດໄວ້. ທາງຄະນະສະເພາະກິດຈະມີແຜນການທີ່ກຳນົດໄວ້ລະອຽດ ອັນນີ້ພວກເຮົາຈະສ້າງພູມຄຸ້ມກັນວມໝູ່ໃຫ້ໄດ້ໂດຍໄວ, ຖ້າເຮົາສາມາດສັກວັກຊິນໄດ້ຫຼາຍທໍ່ໃດແຫ່ງດີເທົ່ານັ້ນ ເຮົາສ້າງພູມຄຸ້ມກັນລວມໝູ່ໄດ້ດີທົ່ວປະເທດລາວຈະກັບຄືນມາດຳລົງຊີວິດຂອງປະຊາຊົນລາວເຮົາແບບປົກກະຕິໄດ້ເທື່ອລະກ້າວ. ສະນັ້ນ, ຈຶ່ງຮຽກຮ້ອງທຸກພາກສ່ວນໃນສັງຄົມ ຕື່ນຕົວສະໝັກໃຈໃນການມາສັກວັກຊີນ, ໃນນັ້ນ ພະນັກງານ-ລັດຖະກອນ, ທະຫານ, ຕຳຫຼວດ ຕ້ອງເປັນແບບຢ່າງນຳໜ້າ ເພື່ອປ້ອງກັນຕົນເອງ, ຄອບຄົວ, ຊຸມຊົນ ແລະ ທົ່ວສັງຄົມ. ໃຫ້ຄະນະສະເພາະກິດແຕ່ລະຂັ້ນ ປັບປຸງມາດຕະຖານ ສູນຈຳກັດບໍລິເວນ ແລະ ປະຕິບັດມາດຕະການ ຢ່າງຖືກຕ້ອງ ແລະ ເຂັ້ມງວດ, ອັນນີ້ພວກເຮົາໄດ້ມີລະບຽບໝົດແລ້ວທຸກແຂວງກໍ່ມີແລ້ວ. ໃນກໍລະນີບຸກຄົນ ແລະ ການຈັດຕັ້ງ ຫາກລະເມີດບັນດາມາດຕະການ ທີ່ໄດ້ກຳນົດອອກຄືດັ່ງທີ່ກ່າວມາຂ້າງເທິງນັ້ນ ກໍ່ໃຫ້ນຳໃຊ້ມາດຕະການຕ່າງໆຢ່າງເໝາະສົມ ລວມທັງມາດຕະການບໍລິຫານ, ມາດຕະການທາງດ້ານເສດຖະກິດ ແລະ ກົດໝາຍທີ່ກ່ຽວຂ້ອງຢ່າງເຂັ້ມງວດ, ຖ້າໃຜລັກລອບເຂົ້າມາແລ້ວນຳເຊື້ອເຂົ້າມາຕິດໃສ່ຜູ້ອື່ນ ຜູ້ນັ້ນກໍ່ຕ້ອງມີຄວາມຮັບຜິດຊອບຕໍ່ການປິ່ນປົວ, ຮັບຜິດຊອບທາງດ້ານບໍລິຫານ, ຮັບຜິດຊອບທາງດ້ານເສດຖະກິດຕ່າງໆ.

ນອກນັ້ນທ່ານນາຍົກໄດ້ຮຽກຮ້ອງໃຫ້ພໍ່ແມ່ປະຊາຊົນ ແລະ ທຸກພາກສ່ວນໃນສັງຄົມ ສືບຕໍ່ຮ່ວມແຮງຮ່ວມໃຈ ໃຫ້ການຮ່ວມມື ແລະ ປະຕິບັດມາດຕະການທີ່ຄະນະສະເພາະກິດວາງອອກ ດ້ວຍຄວາມຮັບຜິດຊອບສູງ, ປະກອບສ່ວນທາງດ້ານວັດຖຸປັດໄຈ ດ້ວຍຄວາມສະໝັກໃຈ ແລະ ຕາມຄວາມສາມາດຂອງຕົນ ເພື່ອປະກອບສ່ວນເຂົ້າໃນວຽກງານປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດ ໂຄວິດ-19 ເພື່ອຮັບປະກັນ ໃຫ້ປະເທດລາວ ແລະ ພວກເຮົາທຸກຄົນ ພ້ອມກັນຜ່ານຜ່າວິກິດການລະບາດຂອງພະຍາດ ໂຄວິດ-19 ໄປດ້ວຍກັນ.

ເນື້ອໃນ: ກົມປະຊາສຳພັນ ຫສນຍ

ພາບ: ປອງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ