ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະ ໄດ້ສໍາເລັດການເຄື່ອນເຄື່ອນໄຫວຢ້ຽມຢາມລັດຖະກິດ ທີ່ ສາທາລະນະລັດ ກູບາ ຕາມການເຊື້ອເຊີນ ຂອງ ທ່ານ ມີເກັນ ດີເອັດສ-ກາແນນ ເບີຣມູເດັດສ ເລຂາທີໜຶ່ງຄະນະບໍລິຫານງານສູນກາງພັກກອມມູນິດກູບາ ປະທານປະເທດ ແຫ່ງ ສາທາລະນະລັດ ກູບາ.
ໃນລະຫວ່າງວັນທີ 13-14 ກັນຍາ 2023, ທ່ານ ທອງລຸນ ສີສຸລິດ ແລະ ຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສ ກູບາ ເພື່ອແນໃສ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີຢ່າງຍາວນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ.
ໃນໄລຍະການຢ້ຽມຢາມຄັ້ງນີ້, ທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ໄດ້ພົບປະເຮັດວຽກກັບຄູ່ຮ່ວມຕໍາແໜ່ງ ທ່ານ ມີເກັນ ດີເອັດສ-ກາແນນ ເບີຣມູເດັດສ (Miguel Diaz-CanelBermudez) ເລຂາທີໜຶ່ງຄະນະບໍລິຫານງານສູນກາງພັກກອມມູນິດກູບາ ປະທານປະເທດ ແຫ່ງ ສາທາລະນະລັດ ກູບາ; ພົບປະ ທ່ານ ເອັສເຕບານ ລາໂຊ ເຮີນານເດສ (Esteban Lazo Hernandez) ປະທານສະພາແຫ່ງຊາດ ອໍານາດປະຊາຊົນ ແຫ່ງ ສ ກູບາ; ພົບປະ ທ່ານ ມານູເອັນ ມາເຣໂຣ ກຣຸຊ (Manuel Marrero Cruz), ນາຍົກລັດຖະມົນຕີແຫ່ງ ສ ກູບາ ແລະ ພົບປະອະດີດການນໍາຂັ້ນສູງຂອງ ສ ກູບາ ຊຶ່ງສອງຝ່າຍໄດ້ຕີລາສູງຕໍ່ການພົວພັນຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ກູບາ-ລາວ ທີ່ມີມູນເຊື້ອ ແລະ ເພື່ອນມິດຍຸດທະສາດ ໄດ້ຮັບການເສີມຂະຫຍາຍນັບມື້ນັບມີຄວາມເລິກເຊິ່ງ ອັນໄດ້ນໍາຜົນປະໂຫຍດມາສູ່ປະຊາຊົນສອງຊາດ ລາວ-ກູບາ, ກູບາ-ລາວ, ພ້ອມທັງຢືນຢັນຈະສືບຕໍ່ຮ່ວມກັນຊຸກຍູ້ສົ່ງເສີມການພົວພັນການຮ່ວມມື ທີ່ມີມາແລ້ວນັ້ນ ໃຫ້ໝັ້ນຄົງຂະໜົງແກ່ນ ແລະ ຂະຫຍາຍການຮ່ວມມືໃນຂົງເຂດຕ່າງໆ ຕາມທ່າແຮງຂອງສອງປະເທດ.
ທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ຖືໂອກາດນີ້ ສະແດງຄວາມຂອບໃຈ ມາຍັງ ພັກ, ລັດ ກໍຄືປະຊາຊົນກູບາອ້າຍນ້ອງ ທີ່ໄດ້ໃຫ້ການສະໜັບສະໜູນຊ່ວຍເຫຼືອອັນລໍ້າຄ່າແກ່ ສປປ ລາວ ທັງໃນໄລຍະປົດປ່ອຍຊາດໃນເມື່ອກ່ອນ ກໍຄືໄລຍະປົກປັກຮັກສາ ແລະ ສ້າງສາປະເທດຊາດໃນປັດຈຸບັນ ໂດຍສະເພາະການສ້າງຊັບພະຍາກອນມະນຸດ, ດ້ານການແພດ, ກິລາ ແລະ ອື່ນໆ. ໃນການພົບປະ,ທັງສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາເສດຖະກິດ-ສັງຄົມທີ່ພົ້ນເດັ່ນຂອງແຕ່ລະປະເທດ ແລະ ປຶກສາຫາລື, ແລກປ່ຽນຄວາມຄິດເຫັນ ແລະ ທິດທາງໃນການເສີມຂະຫຍາຍການພົວພັນຮ່ວມມືໃນຕໍ່ໜ້າຖານອ້າຍນ້ອງ, ຄວາມສາມັກຄີອັນແໜ້ນແຟ້ນ ລະຫວ່າງ ສອງປະເທດ ໃຫ້ນັບມື້ນັບຂະຫຍາຍຕົວ ແລະ ມີປະສິດທິຜົນຕົວຈິງເປັນກ້າວໆ. ນອກຈາກນັ້ນ, ກໍຍັງໄດ້ແລກປ່ຽນຄວາມຄິດເຫັນກ່ຽວກັບສະພາບພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈນໍາກັນ.
ນະໂອກາດພົບປະການນໍາຂັ້ນສູງ ສ ກູບາ, ທ່ານ ທອງລຸນ ສີສຸລິດ ໄດ້ຢືນຢັນຄືນເຖິງນະໂຍບາຍອັນສະເໝີຕົ້ນສະເໝີປາຍຂອງ ພັກ ແລະ ລັດຖະບານລາວ ທີ່ມີຕໍ່ ພັກ ແລະ ລັດຖະບານກູບາ ໃນການເຄື່ອນໄຫວຕໍ່ສູ້ໃນເວທີພາກພື້ນ ແລະ ສາກົນ ລວມທັງການເຄື່ອນໄຫວຕໍ່ສູ້ເພື່ອຢຸດຕິການປິດລ້ອມກູບາ ມາເປັນເວລາ 60 ກວ່າປີ ແລະ ກ່າວສະແດງຄວາມຊົມເຊີຍຜົນສໍາເລັດ ແລະ ໄຊຊະນະ ທີ່ ພັກ, ລັດຖະບານ ແລະ ປະຊາຊົນກູບາ ຍາດມາໄດ້ໃນການປົກປັກຮັກສາໝາກຜົນຂອງການປະຕິວັດ ແລະ ການສ້າງສາພັດທະນາປະເທດ; ພ້ອມທັງ ຊົມເຊີຍ ສ ກູບາ ເປັນເຈົ້າພາບຈັດກອງປະຊຸມສຸດຍອດກຸ່ມປະເທດ 77 ແລະ ຈີນ ໃນຄັ້ງນີ້ ຊຶ່ງສະແດງເຖິງຄວາມເຊື່ອໝັ້ນ ແລະ ການຮັບຮູ້ຂອງສາກົນຕໍ່ບົດບາດຂອງກູບາໃນເວທີສາກົນ.
ໃນໂອກາດເຄື່ອນໄຫວຢ້ຽມຢາມເຮັດວຽກຢູ່ ສ ກູບາ ຄັ້ງນີ້, ທ່ານ ທອງລຸນ ສີສຸລິດ ຍັງໄດ້ເຂົ້າຢ້ຽມຊົມສູນ ຟີແດນ ກາດສໂຕຣ ແລະ ນໍາເອົາຫຼຽນຄໍາແຫ່ງຊາດທີ່ລັດຖະບານແຫ່ງ ສປປ ລາວ ມອບໃຫ້ທ່ານ ຟີແດນ ກາດສໂຕຣ ໃນປີ 1986 ມາວາງໄວ້ທີ່ສູນແຫ່ງນີ້ ແລະ ລົງນາມໃນປຶ້ມຄວາມຊົງຈໍາແຫ່ງການມາຢ້ຽມຢາມສູນດັ່ງກ່າວ ຂອງ ທ່ານ ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໃນຄັ້ງນີ້. ນອກຈາກນັ້ນ, ໃນຕອນແລງ ວັນທີ 14 ກັນຍາ 2023, ທ່ານ ເລຂາທິການໃຫຍ່ ປະທານປະເທດ ຍັງໄດ້ໂອ້ລົມນັກສຶກສາລາວ ທີ່ພວມສຶກສາ ຢູ່ ສ ກູບາ ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ .ກູບາ ໂດຍມີນັກສຶກເຂົ້າຮ່ວມທັງໝົດ 29 ທ່ານ ໃນຈໍານວນ 30 ທ່ານ ທີ່ສຶກສາ ຢູ່ ສ ກູບາ, ພ້ອມທັງໄດ້ນໍາເອົາວັດຖຸປັດໄຈຈໍານວນໜຶ່ງສະໜັບສະໜູນ ໃຫ້ກໍາລັງໃຈແກ່ລູກຫຼານນັກສຶກສາຂອງ ສປປ ລາວ ພວກເຮົາ.
ການຢ້ຽມຢາມ ສາທາລະນະລັດ ກູບາ ຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໃນຄັ້ງນີ້ ໄດ້ຮັບການຕ້ອນຮັບຢ່າງອົບອຸ່ນ ແລະ ດໍາເນີນໄປຢ່າງມີຜົນສໍາເລັດອັນຈົບງາມແຕ່ຕົ້ນຈົນຈົບ, ທັງໄດ້ເປັນການປະກອບສ່ວນທີ່ສໍາຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບຖານສະຫາຍອ້າຍນ້ອງ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ, ກູບາ-ລາວ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ; ນະໂອກາດນີ້, ປະທານປະເທດ ແຫ່ງ ສປປ ລາວ ກໍໄດ້ເຊື້ອເຊີນ ປະທານປະເທດ ແຫ່ງ ສ ກູບາ ໄປຢ້ຽມຢາມ ສປປ ລາວ ໃນໂອກາດທີ່ເຫັນວ່າເໝາະສົມ.
