Vientiane Times Lao
ນະຄອນຫຼວງຈະເປັນເຈົ້າພາບງານມະຫາກຳກິລາແຫ່ງຊາດ ປີ 2023

ນະຄອນຫຼວງຈະເປັນເຈົ້າພາບງານມະຫາກຳກິລາແຫ່ງຊາດ ປີ 2023

ນະຄອນຫຼວງວຽງຈັນ ຈະເປັນເຈົ້າພາບຈັດງານມະຫາກໍາກິລາແຫ່ງຊາດ ຄັ້ງທີ XII ໃນປີ 2023 ພາຍຫລັງ ແຂວງ ຊຽງຂວາງ ເປັນເຈົ້າພາບ ຈັດງານມະຫາກໍາກິລາແຫ່ງຊາດ ຄັ້ງທີ XI ທີ່ແຂວງ ຊຽງຂວາງ ໃນລະຫວ່າງວັນທີ 22 ມີນາ-1 ເມສາ 2020.

ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ລາຍງານຕໍ່ກອງປະຊຸມຄະນະຮັບຜິດຊອບລະດັບຊາດ ຄັ້ງທີ IV ງານມະຫາກໍາກິລາແຫ່ງຊາດ ຄັ້ງທີ XI ທີ່ ແຂວງຊຽງຂວາງ ຫວ່າງບໍ່ດົນມານີ້ວ່າ ອີງຕາມໜັງສືສະເໜີຂອງ ກະຊວງສຶກສາທິການ ແລະ ກິລາ ສະບັບເລກທີ 1344/ສສກ, ລົງວັນທີ 06 ກັນຍາ 2019 ວ່າດ້ວຍການສະເໜີມອບໃຫ້ ນະຄອນຫຼວງວຽງຈັນ ເປັນເຈົ້າພາບຈັດງານມະຫາກໍາກິລາແຫ່ງຊາດ ຄັ້ງທີ XII ໃນປີ 2023 ເນື່ອງຈາກນະຄອນຫຼວງວຽງຈັນ ພວກເຮົາ ມີຄວາມພ້ອມຫຼາຍດ້ານເປັນຕົ້ນແມ່ນຄວາມພ້ອມດ້ານພື້ນຖານ ໂຄງລ່າງ ທັງສະໜາມກິລາ ແລະ ສະໜາມຝຶກແອບ-ຝຶກຊ້ອມ, ທີ່ພັກ, ເສັ້ນທາງຄົມມະນາຄົມ ແລະ ວຽງງານຕ່າງໆ. ສ່ວນດ້ານສະໜາມກິລາທີ່ຈະນໍາໃຊ້ເຂົ້າໃນການແຂ່ງຂັນຈະໄດ້ສ້ອມແປງຄືນຈຳນວນໜຶ່ງ ເພາະຢູ່ໃນສະພາບເກົ່າ ແລະ ເປ່ເພ ນອກຈາກນີ້ ຍັງຈະໄດ້ຂໍນໍາໃຊ້ບັນດາສະໜາມກິລາແຫ່ງຊາດ ຈຳນວນ 11 ແຫ່ງ ລວມເຖິງສະໜາມກິລາທີ່ມີແລ້ວໃນນະຄອນຫຼວງວຽງຈັນຈຳນວນ 19 ແຫ່ງ. 

ທ່ານ ກ່າວອີກວ່າປະເພດກິລາທີ່ຈະເອົາເຂົ້າແຂ່ງຂັນແມ່ນຍັງບໍ່ທັນໄດ້ກຳນົດເທື່ອ ວ່າມີຈັກປະເພດ ລວມທັງ ສັນຍາລັກ ແລະ ສັດນຳໂຊກ. ຄະນະຮັບຜິດຊອບຈະມີການປືກສາຫາລືກັນລະອຽດ.

ທ່ານ ສົມພອນ ສອນດາລາ ໄດ້ແຈ້ງໃຫ້ຮູ້ຕື່ມວ່າ: ໃນໄລຍະຜ່ານມາ ນະຄອນຫຼວງວຽງຈັນ ເຄີຍໄດ້ເປັນເຈົ້າພາບຈັດງານມະຫາກໍາກິລາແຫ່ງຊາດມາແລ້ວ 2 ຄັ້ງຄື: ງານມະຫາກໍາກິລາແຫ່ງຊາດ ຄັ້ງທີ I ໃນປີ 1985 ແລະ ຄັ້ງທີ VI ໃນປີ 2000.

ຂ່າວ: ບົວຜັນ

Related Articles

Leave a Reply