Vientiane Times Lao
ນະຄອນຫຼວງພະບາງ ສັ່ງໂຈະງານບຸນອອກພັນສາ ແລະ ບຸນໄຫຼເຮືອໄຟ ປະຈຳປີ 2021

ນະຄອນຫຼວງພະບາງ ສັ່ງໂຈະງານບຸນອອກພັນສາ ແລະ ບຸນໄຫຼເຮືອໄຟ ປະຈຳປີ 2021

ສະພາບການແຜ່ລະບາດຂອງພະຍາດໂຄວິດ-19 ຢູ່ແຂວງຫຼວງພະບາງ ຍັງໜ້າເປັນຫ່ວງ ແລະ ມີທ່າອ່ຽງເພີ່ມຂື້ນໃນແຕ່ລະວັນ, ໂດຍສະເພາະ ຍັງກວດພົບຜູ້ຕິດເຊື້ອພາຍໃນເພີ່ມອີກ101 ຄົນ ໃນມື້ວັນທີ 17 ຕຸລາ 2021​ ຜ່ານມານີ້​ ຢູ່ພາຍໃນແຂວງ, ໃນນັ້ນ ຢູ່ນະຄອນຫຼວງພະບາງ ມີຜູ້ຕິດເຊື້ອພາຍໃນຫຼາຍກ່ວາໝູ່ເຖິງ 60 ຄົນ, ຮອງລົງມາແມ່ນເມືອງປາກອູ 35 ຄົນ, ເມືອງນໍ້າບາກ 5 ຄົນ ແລະ ເມືອງງອຍ 1 ຄົນ.

ຕໍ່ສະພາບການແຜ່ລະບາດຂອງພະຍາດໂຄວິດ-19ດັ່ງກ່າວ, ອໍານາດການປົກຄອງນະຄອນຫຼວງພະບາງ ຈື່ງໄດ້ອອກແຈ້ງການເຖິງພໍ່ແມ່ປະຊາຊົນບັນດາເຜົ່າ ໃນວັນທີ 18 ຕຸລາ 2021​ ນີ້​ ໃຫ້ຊາບວ່າ: ໃຫ້ໂຈະງານບຸນອອກພັນສາ ແລະ ບຸນໄຫຼເຮືອໄຟ ປະຈໍາປີ 2021ທີ່ນະຄອນຫຼວງພະບາງ ໂດຍໃບແຈ້ງການໄດ້ລະບຸໄວ້ວ່າ : ໂຈະບໍ່ໃຫ້ມີການໃສ່ບາດໃນໄລຍະປິດການເຂົ້າ-ອອກ ຫຼື Lockdown ແລະ ສືບຕໍ່ມາດຕະການຈົນເຖິງວັນທີ 30 ຕຸລາ 2021,

ໂຈະການຈັດງານບຸນນະມັດສະການພະທາດຈອມສີ, ບຸນມະຫາຊາດວັດວິຊຸນ ແລະ ບຸນໄຫຼເຮືອໄຟ ພ້ອມທັງ ຫ້າມບໍ່ໃຫ້ປະຊາຊົນບັນດາເຜົ່າອອກຈາກຂອບເຂດບ້ານຂອງຕົນເພື່ອໄປລອຍກະໂທງຢູ່ແມ່ນ້ໍາຕ່າງໆ, ສິ່ງໃດທີ່ມີຄວາມຈໍາເປັນທີ່ຕິດພັນກັບຮີດຄອງ-ປະເພນີ ແມ່ນໃຫ້ເຮັດພິທີຂອບໄຄ່ວຄວາມເຊື່ອຖື ຊຶ່ງໃນນີ້ ແມ່ນອະນຸຍາດໃຫ້ໄຕ້ທູບ-ທຽນບູຊາຕາມວັດແຫ່ງຕ່າງໆ ແລະ ເຮືອນຊານບ້ານຊ່ອງຕາມຮີດຄອງປະເພນີແຕ່ໃຫ້ຈຳກັດຢູ່ໃນຂອບເຂດສະຖານທີ່ຂອງໃຜລາວ.

ຮອດ​ປັດ​ຈຸ​ບັນ​ນີ້ ແຂວງຫຼວງພະບາງ ​ມີ​ຜູ້​ຕິດ​ເຊື້ອ​ສະ​ສົມ​ຈາກ​ພະ​ຍາດ​ໂຄວິດ-19 ແລ້ວ ຈຳ​ນວນ​ທັງ​ໝົດ 1,788 ຄົນ  ແລະ ມີຜູ້ເສຍຊີວິດ 1 ຄົນ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ