Vientiane Times Lao
ນະຄອນຫຼວງມີຜູ້ຕິດເຊື້ອພະຍາດ COVID-19 ເພີ່ມອີກ 1 ຄົນ

ນະຄອນຫຼວງມີຜູ້ຕິດເຊື້ອພະຍາດ COVID-19 ເພີ່ມອີກ 1 ຄົນ

ຮສ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຕາງໜ້າໃຫ້ຄະນະສະເພາະກິດ ຖະແຫຼງຂ່າວຕໍ່ສື່ມວນຊົນ ໃນຕອນບ່າຍ ວັນທີ 25 ມີນາ 2020 ນີ້ ວ່າ: ຢູ່ນະຄອນຫຼວງວຽງຈັນ ມີຜູ້ຕິດເຊື້ອພະຍາດ COVID-19 ອີກ 1 ຄົນ, ເພີ່ມຈາກ 2 ຄົນມື້ວານນີ້ ມາເປັນ 3 ຄົນ.

ຜູ້ຕິດເຊື້ອດັ່ງກ່າວ ແມ່ນ ທ້າວ ເຈມບອນ ອາຍຸ 26 ປີ ອາຊີບນັກທຸລະກິດ ເປັນປະຊາຊົນຢູ່ບ້ານຫ້ວຍຫ້ອມ ເມືອງສີໂຄດຕະບອງ ນະຄອນຫຼວງວຽງຈັນ ເຊິ່ງຜູ້ກ່ຽວມີປະຫວັດໃກ້ຊິດກັບ ທ້າວ ສີລິສັກ  ພະນັກງານຝ່າຍຂາຍ ແລະ ການຕະຫຼາດ ຂອງໂຮງແຮມ Crowne Plaza Vientiane ທີ່ຕິດເຊື້ອພະຍາດ COVID-19 ທີ່ລາຍງານໃຫ້ຊາບໃນມື້ວານນີ້ ຜູ້ກ່ຽວແມ່ນຢູ່ບ້ານ ຈັນສະຫວ່າງ ເມືອງສີໂຄດຕະບອງ.

ສໍາລັບຜົນກວດຂອງຜູ້ທີ່ໃກ້ຊິດກັບ ນາງ ກົງສິນ ພະນັກງານນໍາທ່ຽວ ຢູ່ບ້ານຄໍາຮຸ່ງ ເມືອງໄຊທານີ ທີ່ໄດ້ລາຍງານວ່າຕິດເຊື້ອພະຍາດ COVID-19 ໃນມື້ວານນີ້ ແມ່ນຈະຮູ້ຜົນໃນຕອນແລງຂອງມື້ນີ້.

ຕາມການຕິດຕາມເກັບກໍາຂໍ້ມູນຂອງຄະນະສະເພາະກິດແຈ້ງວ່າ ມີຫຼາຍກວ່າ 133 ຄົນ ທີ່ໃກ້ຊິດກັບ ທ້າວ ສີລິສັກ  ແລະ ນາງ ກົງສິນ.

ຮສ ດຣ. ພູທອນ ຍັງໄດ້ແຈ້ງຕື່ມອີກວ່າຖ້າຜູ້ໃດທີ່ໃກ້ຊິດກັບທັງສອງຄົນ ແລະ ມີອາການຜິດປົກກະຕິແມ່ນໃຫ້ຕິດຕໍ່ຫາໜ່ວຍງານສາທາລະນະສຸກ ສາຍດ່ວນ 166 ເພື່ອຂໍຄໍາແນະນໍາ.

ຂ່າວ: ວຽງຈັນທາຍ

ພາບ: ພູນຊັບ

Related Articles

Leave a Reply