Vientiane Times Lao
ນະຄອນຫຼວງ ຕັ້ງເປົ້າ 82 ຫຼຽນຄໍາ ຫວັງທວງແຊ໋ມເຈົ້າຫຼຽນຄໍາ ໃນງານກິລາແຫ່ງຊາດ 2020

ນະຄອນຫຼວງ ຕັ້ງເປົ້າ 82 ຫຼຽນຄໍາ ຫວັງທວງແຊ໋ມເຈົ້າຫຼຽນຄໍາ ໃນງານກິລາແຫ່ງຊາດ 2020

ນະຄອນຫຼວງວຽງຈັນ ກຽມພ້ອມສົ່ງທັບນັກກິລາ ຈຳນວນ 424 ຄົນ, ຍິງ 169 ຄົນ ຈາກ 28 ປະເພດກິລາ ພ້ອມຕັ້ງເປົ້າໝາຍຈະພະຍາຍາມສູ້ຊົນໃຫ້ໄດ້ ຢ່າງໜ້ອຍ 82 ຫຼຽນຄຳ ຈາກການຊິງໄຊທັງໝົດ 385 ຫຼຽນຄຳ ເພື່ອ ຫັວງທວງແຊ໋ມເຈົ້າຫຼຽນຄໍາ ກັບຄືນອີກຄັ້ງ ໃນງານມະຫາກຳກິລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ໃນລະຫວ່າງວັນທີ 22 ມີນາ ຫາ 1 ເມສາ 2020.

ທ່ານ ສົມພອນ ສອນດາລາ ຮອງຫົວໜ້າ ພະແນກສຶກສາທິການ ແລະ ກິລາ ນະຄອນຫຼວງໄດ້ໃຫ້ສຳພາດກັບສື່ມວນຊົນ ຫວ່າງບໍດົນມານີ້ ວ່າ : ທັບນັກກິລານະຄອນຫຼວງວຽງຈັນ ແມ່ນໄດ້ເລີ່ມຝຶກຊ້ອມມາຕັ້ງແຕ່ເດືອນກໍລະກົດ 2019 ຮອດປະຈຸບັນນີ້ ແມ່ນໄດ້ເອົານັກກິລາເຂົ້ານອນສູນຝຶກຊ້ອມຮຽບຮ້ອຍແລ້ວ ເພື່ອກຽມພ້ອມທວງແຊ໋ມເຈົ້າຫຼຽນຄໍາ ໃນງານມະຫາກຳກິລາແຫ່ງຊາດ ຄັ້ງທີ 11 ນີ້.

ສຳລັບຜົນງານ ທັບນັກກິລານະຄອນຫຼວງວຽງຈັນ ໃນການເຂົ້າຮ່ວມງານມະຫາກຳກິລາແຫ່ງຊາດຄັ້ງທີ 10 ປີ 2014 ທີ່ແຂວງອຸດົມໄຊ ສາມາດຍາດໄດ້ 55 ຫຼຽນຄໍາ, 31 ຫຼຽນເງິນ ແລະ 49 ຫຼຽນທອງ ຖຶກຈັດຢູ່ອັນດັບ 2 ຂອງຕາຕະລາງສະຫຼຸບຫຼຽນ. ສ່ວນອັນດັບ1 ເປັນຂອງ ກະຊວງປ້ອງກັນປະເທດ ສາມາດຍາດໄດ້ 61 ຫຼຽນຄໍາ, 29 ຫຼຽນເງິນ ແລະ 38 ຫຼຽນທອງ ຂະນະທີ່ ອັນດັບ 3 ເປັນຂອງກະຊວງປ້ອງກັນຄວາມສະຫງົບ ຍາດໄດ້ 42 ຫຼຽນຄໍາ, 43 ຫຼຽນເງິນ ແລະ 51 ຫຼຽນທອງ.

ສ່ວນການແຂ່ງຂັນງານມະຫາກໍາກິລາແຫ່ງຊາດ ຄັ້ງທີ XI 2020 ນີ້ ຈະມີ 20 ພາກສ່ວນເຂົ້າຮ່ວມ ຄື: 1 ນະຄອນຫລວງ, 17 ແຂວງ ແລະ 2 ກະຊວງ ເຊັ່ນ ກະຊວງປ້ອງກັນຄວາມສະຫງົບ ແລະ ກະຊວງປ້ອງກັນຊາດ ແລະ ມີຊີງໄຊທັງໝົດ 385 ຫຼຽນຄໍາ, 385 ຫຼຽນເງິນ ແລະ 627 ຫຼຽນທອງ.

ຂ່າວ-ພາບ: ບົວຜັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ