Vientiane Times Lao
ນັກທຸລະກິດຕ່າງປະເທດ ມອບເງິນ ຫຼາຍຕື້ກີບຊ່ວຍຜູ້ປະສົບໄພນໍ້າຖ້ວມ

ນັກທຸລະກິດຕ່າງປະເທດ ມອບເງິນ ຫຼາຍຕື້ກີບຊ່ວຍຜູ້ປະສົບໄພນໍ້າຖ້ວມ

ໃນຕອນແລງ ຂອງວັນທີ 17 ກັນຍາ 2019 ທີ່ສຳນັກງານນາຍົກລັດຖະມົນຕີ (ສນຍ), ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ໄດ້ຕາງໜ້າລັດຖະບານ ຮັບເງິນຊ່ວຍ ເຫຼືອຜູ້ປະສົບໄພນໍ້າຖ້ວມ ຈາກ 3 ພາກສ່ວນ: ເຂດເສດຖະກິດພິເສດສາມຫຼ່ຽມຄຳ 3 ຕື້ກີບ, ກ່າວມອບໂດຍ ທ່ານ ຈ້າວເຫວີຍ, ປະທານສະພາບໍລິຫານເຂດ.
ທະນາຄານ ICBC 180,000 ໂດລາ ຫຼື ຫລາຍກວ່າ 1,5 ຕື້ກີບ, ກ່າວມອບໂດຍ ທ່ານ ຊຸ່ນເຟີງເລ (Mr. Sun Fenglei), ຜູ້ອຳນວຍ ການທະນາຄານ ICBC ສາຂານະ ຄອນຫຼວງ ວຽງຈັນ ແລະ ບໍລິສັດ ໄຟຟ້ານໍ້າເທີນ 2 ຈຳນວນ 1 ຕື້ກີບ, ກ່າວມອບ ໂດຍ ທ່ານ ໂຟລ້ອງ ເປໂລ້ (Mr. Florent Perrot), ຮອງອຳນວຍການ ບໍລິສັດ ໄຟຟ້ານໍ້າ ເທີນ 2, ຊຶ່ງມີພະນັກງານ ທີ່ກ່ຽວຂ້ອງ ຂອງຫ້ອງ ວ່າການສຳນັກງານ ນາຍົກລັດຖະມົນຕີ, ກະຊວງ ແຮງງານ ແລະ ສະຫວັດດີການສັງຄົມ ແລະ ພາກສ່ວນທີ່ ນຳເງິນມາມອບເຂົ້າຮ່ວມ.
ໃນໂອກາດນີ້, ທ່ານ ທອງລຸນ ສີສຸລິດ, ນາຍົກ ລັດຖະມົນຕີ ໄດ້ແຈ້ງສະພາບຜົນກະທົບຈາກ ໄພນໍ້າຖ້ວມ ໃນປີນີ້ ແມ່ນໜັກໜ່ວງ ແລະ ກວມເອົາພື້ນທີ່ກວ້າງຂວາງ, ສ້າງຄວາມ ເສຍຫາຍ ຕໍ່ຊີວິດ ແລະ ຊັບສິນ ຂອງປະຊາຊົນ ເປັນຈຳນວນຫຼວງຫຼາຍ, ຊຶ່ງລັດຖະບານ ກໍ່ຄືບັນດາຂະແໜງການ, ທ້ອງຖິ່ນ ແລະ ພາກສ່ວນຕ່າງໆ ໃນທົ່ວສັງຄົມ ໄດ້ສຸມໃສ່ ໃຫ້ການຊ່ວຍເຫຼືອ ແກ່ປະຊາຊົນ ຜູ້ປະສົບໄພນໍ້າຖ້ວມ.
ພ້ອມກັນນັ້ນ ທ່ານ ນາຍົກລັດຖະມົນຕີ ກໍ່ໄດ້ສະແດງຄວາມຂອບໃຈ ຕໍ່ພາກສ່ວນ ທີ່ໄດ້ນຳເອົາເງິນມາມອບ ເພື່ອຊ່ວຍເຫຼືອ ຜູ້ປະສົບໄພນໍ້າຖ້ວມໃນຄັ້ງນີ້, ຊຶ່ງຈະຊ່ວຍປະ ກອບສ່ວນເຮັດໃຫ້ປະຊາຊົນມີກຳລັງໃຈ, ແກ້ໄຂຜົນກະທົບ ແລະ ຟື້ນຟູຊີວິດການເປັນ ຢູ່ຂອງປະຊາຊົນທີ່ປະສົບໄພນໍ້າຖ້ວມ ໃຫ້ກັບຄືນສູ່ສະພາບປົກກະຕິໂດຍໄວ.
ລັດຖະບານຈະນຳເອົາເງິນຈຳນວນດັ່ງກ່າວ ມອບໃຫ້ກະຊວງແຮງງານ ແລະ ສະຫວັດດີ ການສັງຄົມ ເພື່ອນຳໄປຊ່ວຍເຫຼືອບັນເທົາທຸກ ແກ່ຜູ້ປະສົບໄພນໍ້າຖ້ວມ ຢູ່ທ້ອງຖິ່ນຕ່າງໆ.
ພາບ-ຂ່າວ: ສນຍ

Related Articles

Leave a Reply