ນັກທຸລະກິດລາວໂດຍທ່ານ ສຸກຄໍາພີ ບຸນຍາວົງ ໄດ້ລົງທຶນສ້າງໂຮງໝໍເອກະຊົນແຫ່ງທໍາອິດຢູ່ແຂວງໄຊຍະບູລີໂດຍມີຊື່ວ່າໂຮງໝໍໄຊຍະເວດ ຈໍາກັດຜູ້ດຽວ ຊຶ່ງຕັ້ງຢູ່ບ້ານສີເມືອງ ໃນໃຈກາງເມືອງໄຊຍະບູລີ ຊຶ່ງມີມູນຄ່າການລົງທຶນສູງເຖິງ 15 ຕື້ກີບ ໂດຍເລີ່ມມີການກໍ່ສ້າງເປັນທີ່ຮຽບຮ້ອຍແລ້ວໂດຍມີພິທີວາງສີລາລຶກເມື່ອມໍ່ໆມານີ້ ໂດຍເປັນກຽດເຂົ້າຮ່ວມຂອງ ທ່ານ ບຸນແຝງ ພູມມະໄລສິດ ກໍາມະການສູນກາງພັກ ລັດຖະມົນຕີກະຊວງສາທາລະນະສຸກ, ທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານສະພາປະຊາຊົນ ແຂວງໄຊຍະບູລີ, ທ່ານ ດວງຕາ ໄຊວຸດ ຮອງເລຂາພັກແຂວງໄຊຍະບູລີ ແລະ ພາກສ່ວນທີ່ກ່ຽວຂ້ອງ.
ໂຮງໝໍດັ່ງກ່າວເປັນໂຮງໝໍຂະໜາດ 45 ຕຽງນອນ (ລວມທັງຕຽງໄອຊີຢູ) ມີເນື້ອທີ່ທັງໝົດ 5.000 ຕາເມັດໂດຍແບ່ງເປັນມູນຄ່າການກໍ່ສ້າງອາຄານ ຢ່າງເປັນລະບົບຄົບຊຸດ 6,4 ຕື້ກີບ ຊຶ່ງປະກອບມີ 4 ຕຶກຄື: ຕຶກສອງຊັ້ນສໍາລັບບໍລິການຄົນເຈັບ 1 ຕຶກ, ຕຶກຊັ້ນດຽວ ເປັນຮ້ານອາຫານ – ຮ້ານກາເຟ ແລະ ຊຸບເປີມາເກັດ 1 ຕຶກ ແລະ ຊັ້ນດຽວເປັນສາງເກັບຢາ, ຫ້ອງຊັກລີດ ແລະ ຫ້ອງເຢັນ ໂດຍປະກອບມີ 9 ຂະແໜງຄື: ຂະແໜງສຸກເສີນ, ຂະແໜງກວດເຂດນອກ, ຂະ ແໜງໄອຊີຢູຟື້ນຟູຊີບ ແລະ ວາງຢາສະຫຼົບ, ຂະແໜງພາຍນອກຜ່າຕັດ, ຂະແໜງພາຍໃນ, ຂະແໜງອອກລູກ – ພະຍາດຍິງ, ຂະແໜງເດັກນ້ອຍ, ຂະແໜງການຢາ ແລະ ຂະແໜງເອໂກ້ – ຮູບພາບລັງສີ ຊຶ່ງຈະໃຊ້ເວລາໃນການກໍ່ສ້າງ 18 ເດືອນໃຫ້ສໍາເລັດ.
ຈຸດປະສົງໃນການກໍ່ສ້າງໂຮງໝໍແຫ່ງນີ້ ກໍເພື່ອຕອບສະໜອງໃຫ້ແກ່ການບໍລິການດ້ານການປິ່ນປົວທີ່ທັນສະໄໝ ແລະ ຊັດເຈນ ຫຼຸດຜ່ອນອັດຕາການແອອັດ, ຫຼຸດຜ່ອນຄວາມສ່ຽງໃນການປິ່ນປົ່ວຕາມຂັ້ນຕອນມາດຕະຖານ ແລະ ທັນເວລາໃຫ້ກັບພໍ່ – ແມ່ປະຊາຊົນພາຍໃນ ແຂວງໄຊຍະບູລີ ແລະ ແຂວງອ້ອມຂ້າງ, ເປັນທາງເລືອກໃນການເຂົ້າໃຊ້ບໍລິການຂອງຄົນເຈັບ ດ້ວຍມາດຕະຖານການແພດທີ່ທັນສະໄໝ ມີຄວາມວ່ອງ ໄວ-ຊັດເຈນ ດ້ວຍທີມແພດທີ່ມີປະສົບການສູງ ເປັນແພດຊ່ຽວຊານ ສະເພາະດ້ານ ແລະ ໃຫ້ການບໍລິການທີ່ດີ ຢູ່ໃນລາຄາທີ່ສົມເຫດສົມຜົນ.
ຂໍ້ມູນ-ພາບ: ຈາກສື່ຂ່າວແຂວງໄຊຍະບູລີ
