Vientiane Times Lao
ນັກຮ້ອງເພງປ໋ອບປ່ຽນແບບມາຮ້ອງເພງຫມໍລໍາ

ນັກຮ້ອງເພງປ໋ອບປ່ຽນແບບມາຮ້ອງເພງຫມໍລໍາ

ນັກຮ້ອງເພງປ໋ອບຊື່ດັງຈາກຄ້າຍເພງອິນດີເຣັກຂອດ, ນາງນ້ຳຝົນ ອີນທະວົງ ເປັນນັກຮ້ອງເພງປ໋ອບ ເຊີນຊວນແຟນເພງຕິດຕາມຜົນງານເພງໃໝ່ທີ່ລາວໄດ້ຮ່ວມຮ້ອງນຳ ວົງເມກາແບນ (Mega Band) ຊຶ່ງເປັນຄັ້ງທໍາອິດທີ່ນາງໄດ້ຮ່ວມຮ້ອງເພງນໍາວົງເມກາແບນ, ເພງດັ່ງກ່າວຊື່ວ່າ ‘‘ຊ່ອຍໂຕເອງ’’, ຊຶ່ງນາງໄດ້ຮ່ວມຮ້ອງເພງທ່ອນທີ່ເປັນແບບ (ສະຕາຍ)ໝໍລຳ.
ນາງນ້ຳຝົນ ອີນທະວົງ ໄດ້ກ່າວວ່າ: ເພງໝໍລໍາຖືວ່າເປັນສິ່ງທີ່ທ້າທາຍຫຼາຍສໍາລັບການປ່ຽນສະຕາຍມາຮ້ອງເພງໝໍລໍາ,  ເພງ ‘‘ຊ່ອຍໂຕເອງ’’ ເປັນເພງສະຕາຍປະສົມປະສານ rock and roll ແລະ ໝໍລໍາເເບບໃໝ່, ເປັນເພງທຳອິດທີ່ຕັ້ງໃຈເຮັດໃນໄລຍະເວລາທີ່ມີ ການລະບາດຂອງພະຍາດໂຄວິດ-19 ແລະ ເປັນເພງທຳອິດທີ່ເຕັມວົງ.
ນາງນ້ຳຝົນ ໄດ້ກ່າວຕື່ມວ່າ: ສຳລັບເພງ ‘‘ຊ່ອຍໂຕເອງ’’ ເປັນເພງທີ່ເເຕ່ງຂຶ້ນ ແລະ ວາງແຜນມາດົນເເລ້ວ ແຕ່ບໍ່ມີໂອກາດໄດ້ລົງມືເທື່ອ ເພາະສະມາຊິກໃນວົງມີເວລາຫວ່າງບໍ່ຄືກັນ, ຈົນມາຮອດໄລຍະການລະບາດຂອງພະຍາດໂຄວິດ-19 ທີ່ການສະແດງບໍ່ຄ່ອຍມີ ເລີຍມີເວລາລົງມືສືບຕໍ່ແຜນການເຮັດເພງ. ວົງເຮົາໂຊກດີທີ່ມີກີຕ້າໃນວົງເຊິ່ງແມ່ນອ້າຍໝີ (Mee mega Band) ທີ່ເປັນ ຜູ້ຜະລິດດົນຕີຢູ່ເເລ້ວ ຈຶ່ງງ່າຍຕໍ່ການເຮັດເພງໃນການອອກຄວາມຄິດຕ່າງໆ. ເພງນີ້ກໍຖືວ່າເປັນເພງທຳອິດຂອງວົງກໍ່ວ່າໄດ້ ຫລັງຈາກສ້າງຕັ້ງວົງມາເກືອບ 10 ປີ ເລີຍຖືໂອກາດນີ້ສ້າງເພງຂຶ້ນມາ ຫວັງວ່າທຸກຄົນຄົງຈະມ່ວນກັບເພງ ‘‘ຊ່ອຍໂຕເອງ’’.ໃນໄລຍະການລະບາດຂອງພະຍາດໂຄວິດ-19 ນໍ້າຝົນແມ່ນມີຜົນກະທົບ 100% ຕໍ່ກັບວຽກງານການບັນເທີງ ນັບຕັ້ງເເຕ່ບຸນປີໃຫມ່ລາວຈົນຮອດປະຈຸບັນແມ່ນງານຄອນເສີດບໍ່ມີເລີຍ. ແຕ່ນ້ຳຝົນຍັງໂຊກດີທີ່ຕົນເອງເຮັດວຽກປະຈຳເລີຍປະຄອງຊີບຢູ່ໄດ້. ປັດຈຸບັນນີ້ໄດ້ໃຊ້ເວລາຫວ່າງໃຫ້ເປັນປະໂຫຍດ ເພື່ອເຮັດເພງໃຫມ່ ແລະ ຊ້ອມເພງເພື່ອກຽມຮັບງານຫຼັງບຸນອອກພັນສາ.
ເພງ ‘‘ຊ່ອຍໂຕເອງ’’  ນີ້ໄດ້ປ່ອຍອອກໄປແລ້ວທາງຢູທູບໃນວັນຈັນທີ່ຜ່ານມາ ແລະ ມີຄົນເຂົ້າເບີ່ງຫລາຍກວ່າ 6.000 ຄົນແລ້ວ.

ຂ່າວ: ສີສຸພັນ ອໍາພອນພົງ

ພາບ: ນໍ້າຝົນ ອິນທະວົງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ