ການແຂ່ງຂັນຮອບຊິງຊະນະເລີດ “ຄົນຈີນຮ້ອງເພງລາວ” ໄດ້ຈັດຂຶ້ນໃນວັນທີ 31 ຕຸລາຜ່ານມາ ທີ່ ສູນວັດທະນະທໍາຈີນປະຈໍາ ສປປ ລາວ ໂດຍມີທ່ານ ຕູ້ສາງຊິ່ງ ຫົວໜ້າພະແນກການເມືອງສະຖານທູດຈີນ ປະຈໍາ ສປປ ລາວ, ມິທ່ານນາງ ຫຼີຢີ່ຜິງ ຫົວໜ້າສູນວັດທະນະທໍາຈີນປະຈໍາ ສປປ ລາວ, ທ່ານຮອງອໍານວຍການວິທະຍາໄລສິລະປະແຫ່ງຊາດ, ຄະນະກຳມະການ ແລະ ບັນດາສະຖາບັນການສຶກສາ ພ້ອມດ້ວຍຜູ້ແຂ່ງຂັນເຂົ້າຮ່ວມ.
ການຈັດງານແຂ່ງຂັນ “ຄົນຈີນຮ້ອງເພງລາວ” ໄດ້ຈັດຂຶ້ນເປັນຄັ້ງທໍາອິດທີ່ສູນວັດທະນະທໍາຈີນ ປະຈໍາ ສປປ ລາວ ຊຶ່ງເປັນກິດຈະກໍາທີ່ສຳຄັນ ແລະ ມີຄວາມໝາຍທາງດ້ານວັດທະນະທໍາ-ສັງຄົມ, ການສ້າງສາຍພົວພັນມິດຕະພາບລະຫວ່າງລາວ-ຈີນ ເຮັດໃຫ້ສາມາດຮຽນຮູ້ ແລະ ເຂົ້າໃຈວັດທະນະທໍາເຊິ່ງກັນ ແລະ ກັນໄດ້ຢ່າງເລິກເຊິ່ງຍິ່ງຂຶ້ນ, ການແຂ່ງຂັນຄັ້ງນີ້, ມີຜູ້ເຂົ້າຮ່ວມທັງໝົດ 12 ຄົນ, ໃນຮອບຊິງຊະນະເລີດໄດ້ຄັດເລືອກເອົາຜູ້ທີ່ຮ້ອງເພງດ້ວຍມາດຕະຖານການອອກສຽງຂອງພາສາລາວ ແລະ ທັກສະການຮ້ອງເພງຂອງພວກເຂົາ, ຜູ້ຊະນະເລີດອັນດັບ 1 ນາງ ຈ່າງສິ່ນຕ່ານ ບົດເພງທີ່ນຳມາຮ້ອງແດນແຫ່ງອິດສະຫຼະໄດ້ຮັບໄອແພັດສຽວມີ້ (Xiaomi Pad 6) ພ້ອມໃບກຽດຕິຄຸນ; ທີ 2 ນາງ ເຈິ່ງ ຊິນຢີ ໃນບົດເພງຈໍາປາເມືອງລາວ ໄດ້ຮັບໂທລະສັບມືຖື ພ້ອມໃບກຽດຕິຄຸນ ແລະ ທີ 3 ທ້າວ ເສິນຫຼີນ ໃນບົດເພງ ໃສວ່າຊັງເຂົາ ໄດ້ຮັບໂມງອັດສະລິຍະ ແລະ ໃບກຽດຕິຄຸນ. ພ້ອມນີ້ ກໍມີລາງວັນດີເດັ່ນ 5 ລາງວັນ ແລະ ລາງວັນຊົມເຊີຍອີກ 4 ລາງວັນ.
ນອກຈາກນີ້, ຍັງມີການວາງສະແດງຮູບພາບ ໃນໂອກາດທີ່ສູນວັດທະນະທໍາຈີນ ຄົບຮອບ 10 ປີ ພ້ອມທັງໄດ້ມອບລາງວັນຜົນງານຊະນະເລີດການປະກວດໂລໂກ້ສະເຫຼີມສະຫຼອງສູນວັດທະນະທໍາຈີນປະຈໍາ ສປປ ລາວ ຄົບຮອບ 10 ປີ ໃຫ້ແກ່ທ້າວ ສັນໄຊ ດວງຈັນທາ ໄດ້ຮັບເງິນສົດ 8,000,000 ກີບ ແລະ ລາງວັນຊົມເຊີຍ 10 ຜົນງານ. ສຳລັບກິດຈະກໍາການແຂ່ງຂັນ “ຄົນລາວຮ້ອງເພງຈີນ” ຄັ້ງທີ 3 ເປີດຮັບສະໝັກແລ້ວຕັ້ງແຕ່ມື້ນີ້ຈົນເຖິງວັນທີ 5 ພະຈິກ 2024 ລາຍລະອຽດເພີ່ມເຕີມສາມາດຮັບຊົມໄດ້ທີ່ Facebook Page: China Cultural Center In Laos ຫຼື ໂທ: 021-228898.
ຂ່າວ: ປຊຊ
