Vientiane Times Lao
ນາຍົກລັດຖະມົນຕີ ທອງລຸນ ຢ້ຽມຢາມ ສປ ຈີນ ຢ່າງເປັນທາງການ

ນາຍົກລັດຖະມົນຕີ ທອງລຸນ ຢ້ຽມຢາມ ສປ ຈີນ ຢ່າງເປັນທາງການ

ໂດຍຕອບສະໜອງຕາມການເຊື່ອເຊີນຂອງທ່ານ ຫລີ ເຄີ້ສຽງ ນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນຈີນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມຄະນະໄດ້ດຳເນີນການຢ້ຽມຢາມ ສາທາລະນະລັດ ປະຊາຊົນຈີນ ຢ່າງເປັນທາງການໃນລະຫວ່າງວັນທີ 5-9 ມັງກອນ 2020.

ໃນຕອນເຊົ້າມື້ວັນທີ 6 ມັງກອນ 2020 ທ່ານ ຫລີ ເຄີສຽງ  ນາຍົກລັດຖະມົນຕີ ແຫ່ງ ສປ ຈີນ ໄດ້ຈັດພິທີຕ້ອນຮັບຢ່າງເປັນທາງການ. ຄະນະຜູ້ແທນຂັ້ນສູງຂອງສອງປະເທດ ລາວ-ຈີນ, ໄດ້ດຳເນີນການພົບປະສອງຝ່າຍຢ່າງເປັນທາງການທີ່ຫໍສະພາປະຊາຊົນຈີນ, ການພົບປະຄັ້ງນີ້ ຜູ້ນຳທັງສອງໄດ້ພ້ອມກັນທົບທວນຄືນການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມື ແບບຄູ່ຮ່ວມຍຸດທະສາດຮອບດ້ານໝັ້ນຄົງ ຍາວນານຕາມ 4 ດີ (ສະຫາຍທີດີ, ເພື່ອນມິດທີດີ; ບ້ານໃກ້ເຮືອນຄຽງທີ່ດີ ແລະ ຄູ່ຮ່ວມມືທີດີ) ແລະ ການຜັນຂະຫຍາຍແຜນແມ່ບົດຄູ່ຮ່ວມຊາຕາກຳ ລາວ-ຈີນ ທີ່ສອງສະຫາຍເລຂາທິການໃຫຍ່, ປະທານປະເທດໄດ້ຮ່ວມກັນ ລົງນາມໃນ ເດືອນ ເມສາ 2019 ທີ່ຜ່ານມາ.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ສະແດງຄວາມ ຂອບໃຈຢ່າງສູງຕໍ່ການຕ້ອນຮັບອັນອົບອຸ່ນຢ່າງສົມກຽດຈາກລັດຖະບານ ແລະ ປະຊາຊົນຈີນ ແລະ ຕີລາຄາສູງຕໍ່ຜົນສຳເລັດອັນຈົບງາມຂອງການສະເຫຼີມສະຫຼອງວັນສະຖາປະນາ ສາທາລະນະລັດ ປະຊາຊົນຈີນ ຄົບຮອບ 70 ປີ ຢ່າງຍິ່ງໃຫຍ່ ແລະ ສະຫຼຸບຕີລາຄາ 40 ປີ ແຫ່ງການເປີດປະຕູສູ່ພາຍນອກ ແລະ ຜົນສຳເລັດອັນໃຫຍ່ຫຼວງໃນການສ້າງສາພັດທະນາປະເທດຊາດຂອງ ສປ ຈີນ ທີ່ຍາດມາໄດ້ໃນເງື່ອນໄຂທີ່ສະພາບແວດລ້ອມຂອງສາກົນມີການຜັນແປສະຫລັບສັບຊ້ອນ, ມີສິ່ງທ້າທາຍຫຼາຍຢ່າງ ແລະ ເສດຖະກິດໂລກກໍ່ຢູ່ໃນສະພາບທົດຖອຍ, ແຕ່ຍ້ອນການນຳພາຂອງພັກຄອມມູນິດຈີນໂດຍມີສະຫາຍເລຂາທິການໃຫຍ່ ສີ ຈີ້ນຜິງ ເປັນແກນກາງນຳພາ, ມີລັດຖະບານເຊິ່ງມີສະຫາຍ ຫລີ ເຄີ້ສຽງ ເປັນຫົວໜ້າ ແລະ ມີປະຊາຊົນດຸໝັ່ນ, ຫ້າວຫັນ ແລະ ມີຈິດໃຈຊາດອັນດູດດື່ມ ສປ ຈີນ ສາມາດຍາດມາໄດ້ຜົນສຳເລັດອັນຍິ່ງໃຫຍ່ຢ່າງສະຫງ່າຜ່າເຜີຍ, ສ້າງສັງຄົມນິຍົມຕາມສີສັນລັກສະນະພິເສດຂອງ ຈີນ ແລະ ໄດ້ສະແດງຄວາມຊົມເຊີຍຢ່າງສຸດໃຈຕໍ່ຜົນສຳເລັດຂອງກອງປະຊຸມຄົບຄະນະກຳມະ ການສູນກາງພັກຄອມມູນິດຈີນ ຄັ້ງທີ 4 ສະໄໝ XIX ກໍ່ຄືຜົນສຳເລັດການຈັດບັນດາກອງປະຊຸມ ສາກົນຕ່າງໆເຊັ່ນ: ກອງປະຊຸມສຸດຍອດ ຄັ້ງທີ 2 ໜຶ່ງແລວໜຶ່ງເສັ້ນທາງ, ງານວາງສະແດງສິນຄ້າ ນຳເຂົ້າສາກົນ ທີ່ ຊຽງໄຮ, ເວທີປຶກສາຫາລື ໂບອາວ ປະຈຳປີ 2019 ທີ່ຜ່ານມາ  ແລະ ອື່ນໆ.

ໃນໂອກາດການຢ້ຽມຢາມຄັ້ງນີ້, ສອງນາຍົກລັດຖະມົນຕີຍັງໄດ້ແລກປ່ຽນ ແລະ ປຶກສາຫາລືບາງບັນຫາ ເຊັ່ນ: ການຜັນຂະຫຍາຍແຜນແມ່ບົດຄູ່ຮ່ວມຊາຕາກຳສັງຄົມນິຍົມ ລາວ-ຈີນ ທີ່ເປັນເອກະສານການຮ່ວມມືສອງຝ່າຍ ທີ່ມີຄວາມໝາຍຄວາມສຳຄັນໃຫ້ແກ່ການຮ່ວມມືໃຫ້ເແກ່ 2 ພັກ 2 ລັດ, ແລະ ປະຊາຊົນສອງຊາດ ໃນໄລຍະໃໝ່. ໃນດ້ານການຮ່ວມມືດ້ານການຄ້າ ແລະ ການລົງທືນກໍ່ໄດ້ມີການເພີ່ມຂຶ້ນ, ການລົງທຶນຈາກ ສປ ຈີນ ໄດ້ເປັນອັນດັບ ໜຶ່ງຂອງການ ລົງທຶນຕ່າງປະເທດທັງໝົດໃນ ສປປ ລາວ. ບັນດາໂຄງການຮ່ວມມືສອງຝ່າຍກໍ່ມີຄວາມຄືບໜ້າຢ່າງເປັນທີເພິ່ງພໍໃຈ ໂດຍສະເພາະໂຄງການທາງລົດໄຟຄວາມໄວສູງ ລາວ-ຈີນ ໄດ້ດຳເນີນສຳເລັດເຖິງ 83% ແລະ ໂຄງການທາງດ່ວນລາວ-ຈີນ ວຽງຈັນ-ວັງວຽງ ກໍ່ມີຄວາມຄືບໜ້າແລ້ວ 50% ທັງສອງໂຄງການ ຄາດວ່າຈະສຳເລັດຕາມແຜນການທີ່ກຳນົດໄວ້. ນອກນັ້ນຍັງມີໂຄງການຊ່ວຍເຫຼືອລ້າອື່ນໆ ກໍ່ໄດ້ດຳເນີນໄປຢ່າງມີຄວາມຄືບໜ້າດີ ພ້ອມນີ້ ໃນປີ 2021 ເປັນປີຄົບຮອບ 60 ແຫ່ງການສ້າງຕັ້ງສາຍພົວພັນການທູດ ລາວ-ຈີນ ສອງປະເທດຈຶ່ງໄດ້ຮ່ວມກັນກຳນົດໃຫ້ເປັນປີມິດຕະພາບ ລາວ-ຈີນ. ພາຍຫຼັງການພົບປະຢ່າງເປັນທາງການແລ້ວ ສອງນາຍົກລັດຖະມົນຕີໄດ້ ເປັນສັກຂີພິຍານໃນ ການລົງນາມເອກະສານຮ່ວມມືສອງຝ່າຍຈຳນວນໜຶ່ງ.

ພ້ອມດຽວກັນນີ້, ສອງນາຍົກລັດຖະມົນຕີ ກໍ່ໄດ້ເຫັນດີຕໍ່ການເປັນປະທານຮ່ວມກອງປະຊຸມສຸດຍອດ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ເຊິ່ງຈະຈັດຂຶ້ນໃນເດືອນມີນາ 2020 ທີ່ ນະຄອນຫຼວງວຽງຈັນ, ພ້ອມກັນນັ້ນ, ກໍ່ໄດ້ຮຽນເຊີນ ທ່ານນາຍົກ ຫຼີ ເຄີສຽງ ຢ້ຽມຢາມ ສປປ ລາວ ຢ່າງເປັນທາງການ.

ໃນໂອກາດມາຢ້ຽມຢາມ ສປ ຈີນ ຢ່າງເປັນທາງການໃນຄັ້ງນີ້, ທ່ານ ນາຍົກລັດຖະມົນຕີ ທອງລຸນ ສີສຸລິດ ພ້ອມຄະນະຍັງໄດ້ເຂົ້າຢ້ຽມຄໍານັບ ສະຫາຍ ສີ ຈີ້ນຜິງ, ເລຂາທິການໃຫຍ່, ປະທານປະເທດ ແຫ່ງ ສປ ຈີນ ແລະ ພົບປະກັບ ສະຫາຍ ຫຼີ ຈານຊູ, ປະທານສະພາປະຊາຊົນທົ່ວປະເທດຈີນ, ຕ້ອນຮັບການເຂົ້າຢ້ຽມຄໍານັບຂອງນັກທຸລະກິດຈີນ ທີ່ໂຮງແຮມ Nikko New Century Beijing, ຕ້ອນຮັບການເຂົ້າຢ້ຽມຄໍານັບຂອງຂອງສະຫາຍ ຫູ ເຫີຜິງ, ເລຂາພັກແຂວງສານຊີ, ສະຫາຍ ເສີນ ຫາວ, ເລຂາພັກແຂວງໆຢຸນນານ, ສະຫາຍ ຊູ ສິນຫຼົງ, ເລຂາພັກນະຄອນແຢນອານ, ຢ້ຽມຢາມກຸ່ມລັດວິສາຫະກິດລົດໄຟແຫ່ງຊາດຈີນ, ຢ້ຽມຢາມກຸ່ມບໍລິສັດລົງທືນ ແລະ ກໍ່ສ້າງແຂວງຢູນນານ, ຢ້ຽມຢາມສະຖານທີ່ທ່ອງທ່ຽວ ແລະ ພື້ນຖານການຜະລິດທີ່ສຳຄັນ ຈຳນວນໜຶ່ງອີກ.

ຂ່າວ-ພາບ : ກົມຂ່າວ, ກະຊວງການຕ່າງປະເທດ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ