Visit BigblueAgency
ນາຍົກລັດຖະມົນຕີ ແຫ່ງ ສປປ ລາວເຂົ້າຢ້ຽມຂ່ຳນັບ ປະທານາທິບໍດີ ສິງກະໂປ

ນາຍົກລັດຖະມົນຕີ ແຫ່ງ ສປປ ລາວເຂົ້າຢ້ຽມຂ່ຳນັບ ປະທານາທິບໍດີ ສິງກະໂປ

ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ໄດ້ເຂົ້າຢ້ຽມຂ່ຳນັບ ທ່ານ ທາມັນ ຊາມູກາຣັດນຳ (Tharman Shanmurgaratnum) ປະທານາທິບໍດີ ແຫ່ງ ສາທາລະນະລັດ ສິງກະໂປ ໃນວັນທີ 9 ກໍລະກົດ 2024 ທີ່ຜ່ານມາ ຢູ່ທຳນຽບປະທານາທິບໍດີ ອິສຕານາ ເນື່ອງໃນໂອກາດເດີນທາງໄປຢ້ຽມຢາມ ສາທາລະນະລັດ ສິງກະໂປ ຢ່າງເປັນທາງການ.

ໂອກາດດັ່ງກ່າວ, ທ່ານນາຍົກລັດຖະມົນຕີ ສອນໄຊ ສີພັນດອນ ໄດ້ສະແດງຄວາມຂອບໃຈຕໍ່ການຕ້ອນຮັບ ອັນອົບອຸ່ນຂອງ ທ່ານປະທານາທິບໍດີ ທາມັນ ຊາມູກາຣັດນຳ, ພ້ອມນີ້ ກໍໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ຈາກ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ຄຳເຊື້ອເຊີນໄປຢ້ຽມຢາມ ສປປ ລາວ ໃນໂອກາດທີ່ເໝາະສົມ. ລັດຖະບານ ແຫ່ງ ສປປ ລາວ ສະແດງຄວາມພ້ອມທີ່ຈະໄດ້ຮ່ວມເຮັດວຽກຢ່າງໃກ້ຊິດກັບ ລັດຖະບານ ສິງກະໂປ ໃນການສືບຕໍ່ສົ່ງເສີມສາຍພົວພັນມິດຕະພາບ ແລະ ການຮ່ວມມືທີ່ດີທີ່ສອງປະເທດ ໃຫ້ໄດ້ ຮັບການຮັດແໜ້ນ ແລະ ມີບາດກ້າວຂະຫຍາຍຕົວໃໝ່. ພ້ອມນັ້ນ, ທ່ານນາຍົກລັດຖະມົນຕີ ສອນໄຊ ສີພັນດອນ ກໍໄດ້ແຈ້ງໃຫ້ຊາບ ກ່ຽວກັບນສຳເລັດຂອງການພົບປະສອງຝ່າຍ ກັບຄູ່ຮ່ວມຕຳແໜ່ງຝ່າຍສິງກະໂປ ເຊິ່ງດຳເນີນໄປ ດ້ວຍບັນຍາກາດແຫ່ງໄມຕີຈິດມິດຕະພາບອັນອົບອຸ່ນ ແລະ ໄດ້ຮັບໝາກຜົນສຳເລັດຕາມລະດັບຄາດໝາຍ.

ໃນຂະນະດຽວກັນ, ທ່ານປະທານາທິບໍດີ ທາມັນ ຊາມູກາຣັດນຳ ກໍໄດ້ສະແດງຄວາມຍິນດີຕ້ອນຮັບ ແລະ ຂອບໃຈຕໍ່ການນຳເອົາຄວາມຢື້ຢາມຖາມຂ່າວຈາກ ທ່ານ ປະທານປະເທດ ທອງລຸນ ສີສຸລິດ ແລະ ສະແດງຄວາມຍິນ ດີຈະໄປຢ້ຽມຢາມ ສປປ ລາວ ໃນເວລາທີ່ເໜາະສົມ. ພ້ອມນີ້, ກໍໄດ້ສະແດງຄວາມຊົມເຊີຍຕໍ່ຜົນສຳເລັດຂອງການ ພົບປະສອງຝ່າຍ ຂອງຄະນະຜູ້ແທນຂັ້ນສູງ ສິງກະໂປ-ລາວ ໃນຄັ້ງນີ້, ພ້ອມທັງ ສະເໜີໃຫ້ສອງຝ່າຍ ສືບຕໍ່ຈັດຕັ້ງ ປະຕິບັດບັນດາສັນຍາທີ່ໄດ້ລົງນາມກັນແລ້ວນັ້ນ ໃຫ້ເປັນຮູບປະທຳຍິ່ງຂຶ້ນ. ທ່ານ ຍັງໄດ້ສະແດງຄວາມຍິນດີຈະຊ່ວຍ ຊຸກຍູ້ໃຫ້ພາກສ່ວນກ່ຽວຂ້ອງຂອງສິງກະໂປ ປະສານສົມທົບກັບຝ່າຍລາວ ຢ່າງໃກ້ຊິດ ເພື່ອຮ່ວມກັນຊອກຫາຊ່ອງ ທາງໃນການຂະຫຍາຍການຮ່ວມມືດ້ານອື່ນໆທີ່ມີທ່າແຮງຮ່ວມກັນ, ສືບຕໍ່ສະໜັບສະໜູນເຊິ່ງກັນ ແລະ ກັນ ໃນເວ ທີພາກພື້ນ ແລະ ສາກົນ. ທັງນີ້, ກໍເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ສິງກະໂປ ແລະ ລາວ, ນຳເອົາ ຄວາມສົມບູນພູນສຸກມາສູ່ປະຊາຄົມອາຊຽນ, ອວຍພອນໃຫ້ສາຍພົວພັນສອງປະເທດ ສິງກະໂປ ແລະ ສປປ ລາວ ຈົ່ງໝັ້ນຄົງຂະນົງແກ່ນ ແລະ ໄດ້ຮັບການພັດທະນາຂຶ້ນສູ່ບາດກ້າວອັນໃໝ່ຍິ່ງໃຫຍ່ກວ່າເກົ່າ.

ໃນວັນດຽວກັນນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ຍັງໄດ້ພົບປະກັບ ທ່ານ ລີ ຊຽນ ລຸງ (Lee Hsien Loong) ລັດຖະມົນຕີອາວຸໂສ ແຫ່ງ ສ ສິງກະໂປ ເຊິ່ງສອງຝ່າຍ ໄດ້ປຶກສາຫາລືກັນເຖິງການຂະ ຫຍາຍການຮ່ວມມືໃນຕໍ່ໜ້າ. ໃນນັ້ນ, ຝ່າຍລາວ ໄດ້ສະເໜີໃຫ້ຝ່າຍ ສິງກະໂປ ຊ່ວຍຊຸກຍູ້ການຮ່ວມມື ດ້ານພະລັງ ງານສະອາດ, ການຊື້-ຂາຍສິນເຊື່ອກາກບອນ, ການຮ່ວມມືດ້ານການຂົນສົ່ງ, ການທ່ອງທ່ຽວ, ການຄ້າກະສິກຳ ແລະ ການພັດທະນາຊັບພະຍາກອນມະນຸດ, ທັງນີ້ ກໍເພື່ອຜົນປະໂຫຍດລວມຂອງທັງສອງປະເທດ ສປປ ລາວ ແລະ ສ ສິງກະໂປ.

Related Articles

Leave a Reply