Vientiane Times Lao
ນາຍົກສົ່ງສານສະແດງຄວາມເສົ້າສະຫຼົດໃຈ ຕໍ່ເຫດການແຜ່ນດິນໄຫວ ຢູ່ອິນໂດເນເຊຍ

ນາຍົກສົ່ງສານສະແດງຄວາມເສົ້າສະຫຼົດໃຈ ຕໍ່ເຫດການແຜ່ນດິນໄຫວ ຢູ່ອິນໂດເນເຊຍ

 ທ່ານ ພັນຄໍາ ວິພາວັນ ນາຍົກລັດຖະມົນຕີ ສປປ ລາວ ໄດ້ສົ່ງສານສະແດງຄວາມເສົ້າສະຫຼົດໃຈ ເມື່ອມໍ່ໆມານີ້ເຖິງ ທ່ານ ໂຈໂກວີໂດໂດ ປະທານາທິບໍດີແຫ່ງ ສາທາລະນະລັດ ອິນໂດເນເຊຍ ຕໍ່ກັບເຫດການແຜ່ນດິນໄຫວ ແລະ ດິນເຈື່ອນ ທີ່ເມືອງຈາວາຕາເວັນຕົກ ຂອງອິນໂດເນເຊຍ ໃນວັນທີ 21 ພະຈິກ 2022 ທີ່ຜ່ານມາ.

ເນື້ອໃນສານໄດ້ລະບຸໄວ້ວ່າ: ຂ້າພະເຈົ້າ ໄດ້ຮັບຂ່າວດ້ວຍຄວາມເສົ້າເສຍໃຈ ຕໍ່ເຫດການແຜ່ນດິນໄຫວ ຢູ່ເມືອງຈາວາຕາເວັນຕົກ ຂອງອິນໂດເນເຊຍ ເຮັດໃຫ້ເກີດດິນເຈື່ອນ ເຊິ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຈຳນວນຫຼວງຫຼາຍ ແກ່ປະຊາຊົນ ອິນໂດເນເຊຍ ທີ່ດຳລົງຊີວິດຢູ່ໃນພື້ນທີ່ດັ່ງກ່າວ.

ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນໃຈ ແລະ ເສົ້າສະຫຼົດໃຈຢ່າງຍິ່ງ ມາຍັງ ທ່ານ, ລັດຖະບານ ແລະ ປະຊາຊົນ ອິນໂດເນເຊຍ ໂດຍສະເພາະຕໍ່ຜູ້ເຄາະຮ້າຍ ແລະ ຄອບຄົວທີ່ໄດ້ຮັບຜົນກະທົບ.

ຂ້າພະເຈົ້າ ເຊື່ອໝັ້ນວ່າ ພາຍໃຕ້ການນຳພາ ແລະ ຄວາມເອົາໃຈໃສ່ຢ່າງໃກ້ຊິດຂອງທ່ານ, ລັດຖະບານ ແລະ ປະຊາຊົນ ອິນໂດເນເຊຍ ຈະສາມາດຜ່ານຜ່າຄວາມຫຍຸ້ງຍາກທີ່ເກີດຂຶ້ນ ຈາກໄພພິບັດຄັ້ງນີ້ ແລະ ຟື້ນຟູເຂດທີ່ໄດ້ຮັບຜົນກະທົບ ໃຫ້ກັບຄືນສູ່ສະພາບປົກກະຕິໂດຍໄວ. ພວກຂ້າພະເຈົ້າ ຂໍຢູ່ຄຽງຂ້າງ ສາທາລະນະລັດ ອິນໂດເນເຊຍ ແລະ ປະຊາຊົນອິນໂດເນເຊຍ ໃນເວລາແຫ່ງຄວາມຫຍຸ້ງຍາກນີ້.

ໃນວັນດຽວກັນ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີກະຊວງການຕ່າງປະເທດ ກໍໄດ້ສົ່ງສານສະແດງຄວາມເສົ້າສະຫຼົດໃຈເຖິງ ທ່ານ ນາງ ເຣັດໂນ ມາຊູດີ ລັດຖະມົນຕີຕ່າງປະເທດ ແຫ່ງ ສາທາລະນະລັດ ອິນໂດເນເຊຍ ຕໍ່ກັບ ເຫດການແຜ່ນດິນໄຫວ ແລະ ດິນເຈື່ອນ ທີ່ເມືອງຈາວາຕາເວັນຕົກ ຂອງອິນໂດເນເຊຍ ໃນວັນທີ 21 ພະຈິກ 2022 ເຊັ່ນດຽວກັນ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ