Vientiane Times Lao
ນາຍົກເນັ້ນໃຫ້ພາກທຸລະກິດຕ້ອງຄິດແບບໃໝ່, ແບບມືອາຊີບ, ມອງການໄກ ໃນຍຸກຂອງ ການດໍາລົງຊີວິດແບບໃໝ່ (New Normal) ຫຼື ຍຸກທີ່ໄດ້ຮັບຜົນກະທົບຈາກ Covid-19

ນາຍົກເນັ້ນໃຫ້ພາກທຸລະກິດຕ້ອງຄິດແບບໃໝ່, ແບບມືອາຊີບ, ມອງການໄກ ໃນຍຸກຂອງ ການດໍາລົງຊີວິດແບບໃໝ່ (New Normal) ຫຼື ຍຸກທີ່ໄດ້ຮັບຜົນກະທົບຈາກ Covid-19

ຫຼາຍບັນຫາທີ່ສໍາຄັນໂດຍສະເພາະວຽກງານການຄ້າ ແລະ ວຽກງານອຸດສະຫະກໍາ ໄດ້ຖືກຍົກຂຶ້ນມາເປັນປະເດັນສົນທະນາ ແລະ ປຶກສາຫາລື ທີ່ກອງປະຊຸມໃຫຍ່ ສະພາການຄ້າ ແລະ ອຸດສາຫະກຳແຫ່ງຊາດລາວ ຄັ້ງທີ VIII ທີ່ໄດ້ຈັດຂຶ້ນເມື່ອວັນທີ 25 ກັນຍາ 2020 ທີ່ຜ່ານມາ ຢູ່ຫໍປະຊຸມແຫ່ງຊາດ ໂດຍເຂົ້າຮ່ວມຂອງ ທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ການນໍາກະຊວງອຸດສາຫະກໍາ ແລະ ການຄ້າ ແລະ ພາກສ່ວນທຸລະກິດເຂົ້າຮ່ວມ.

ທ່ານ ທອງລຸນ ສີສຸລິດ ໄດ້ກ່າວຊີ້ນໍາທີ່ກອງປະຊຸມໂດຍມີເນື້ອໃນບາງຕອນທີ່ສໍາຄັນວ່າ: ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ໃນທົ່ວໂລກ, ປະເທດລາວກໍ່ເປັນ ປະເທດ ໜຶ່ງທີ່ໄດ້ຮັບຜົນກະທົບຢ່າງໜັກໜ່ວງຊຶ່ງໄດ້ເຮັດໃຫ້ທຸກໆຂະແໜງການຢູ່ລາວບໍ່ສາມາດຂະຫຍາຍຕົວຕາມຄາດໝາຍ ແລະ ແຜນທີ່ວາງໄວ້. ພະຍາດດັ່ງກ່າວບໍ່ຕ່າງຫຍັງກັບເພັດຊະຄາດ ທີ່ຮ້າຍກາດ ໂດຍບໍ່ມີສຽງ, ຍ້ອນສະພາບຄືແນວນີ້ພາກທຸລະກິດຈະຕ້ອງໄດ້ມີການຫັນປ່ຽນເພື່ອຄວາມຢູ່ລອດ ເພື່ອຜ່ານຜ່າວິກິດໃຫ້ໄດ້ ໂດຍຈະບໍ່ປະຖີ້ມໃຜຢູ່ເບື້ອງຫຼັງ.

ທ່ານໄດ້ກ່າວຊີ້ນໍາຕື່ມວ່າ: ໃນຍຸກຂອງ ການດໍາລົງຊີວິດແບບໃໝ່ພາກທຸລະກິດຕ້ອງມີການພັດທະນາ ໄປໃນຫຼາຍຮູບແບບ  ເຊັ່ນວ່າ: ຄິດແບບໃຫມ່, ແບບສ້າງສັນ, ແບບມືອາຊີບ, ມອງການໄກ ແລະ ທຸກພາກສ່ວນຕ້ອງມີຄວາມສາມັກຄີກັນ ຊ່ວຍເຫລືອກັນເພື່ອຜ່ານຜ່າຄວາມຫຍຸ້ງຍາກ ຫຼື ຜົນກະທົບຈາກພະຍາດດັ່ງກ່າວໃຫ້ຜ່ານພົ້ນໄປດ້ວຍດີ ແລະ ດ້ວຍຜົນສໍາເລັດ ແລະ ອື່ນໆ.

ຂ່າວ: ວຽງຈັນທາຍ

ພາບ: ກິແກ້ວ

 

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ