Vientiane Times Lao
ນາຍົກ ຊີ້ນໍາໃຫ້ກວດກາຄືນກ່ຽວກັບຄ່າກະແສໄຟຟ້າເພີ່ມຂຶ້ນສູງ

ນາຍົກ ຊີ້ນໍາໃຫ້ກວດກາຄືນກ່ຽວກັບຄ່າກະແສໄຟຟ້າເພີ່ມຂຶ້ນສູງ

ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ນໍາໃຫ້ກະຊວງພະລັງງານ ແລະ ບໍ່ແຮ່ ກວດກາຄືນກ່ຽວກັບຄ່າກະແສໄຟຟ້າ ເຫັນວ່າສັງຄົມມີຄວາມສົນໃຈຫຼາຍ ເນື່ອງຈາກຄ່າບໍລິການຊົມໃຊ້ກະແສໄຟຟ້າເພີ່ມຂຶ້ນສູງຫຼາຍ.

ພ້ອມດຽວກັນ ກໍ່ໃຫ້ອະທິບາຍ ຊີ້ແຈງຢ່າງສົມເຫດສົມຜົນ ກ່ຽວກັບຄ່າກະແສໄຟຟ້າ ໃຫ້ສັງຄົມມີຄວາມເຂົ້າໃຈ ແລະ ມີຄວາມສະຫງົບ; ພ້ອມນັ້ນ ກໍ່ໃຫ້ກວດຄືນລະບົບການຕິດຕັ້ງ ແລະ ເດີນສາຍໄຟຟ້າ ໃນໄລຍະຜ່ານມານີ້ ເຫັນວ່າຈໍານວນ ອັກຄີໄພເພີ່ມຫຼາຍຂຶ້ນ ໂດຍສະ ເພາະໄຟຟ້າລັດວົງຈອນ ເຮັດໃຫ້ບ້ານເຮືອນຂອງປະຊາຊົນຖືກໄຟໄໝ້ ແລະ ກະທົບຕໍ່ການດໍາລົງຊີວິດຂອງເຂົາເຈົ້າ.

ການຊີ້ນໍາດັ່ງກ່າວ ແມ່ນໃນໂອກາດກອງປະຊຸມລັດຖະບານ ສະໄໝສາມັນ ປະຈຳເດືອນ ພຶດສະພາ 2020 ທີ່ໄດ້ຈັດຂຶ້ນໃນລະຫວ່າງວັນທີ 21-22 ພຶດສະພາ 2020 ທີ່ຜ່ານມາ.

ນອກຈາກນີ້ ທ່ານ ນາຍົກ ກໍ່ໄດ້ຊີ້ນໍາໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ COVID-19 ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດບັນດາມາດຕະການຜ່ອນຜັນ ແລະ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດ COVID-19, ຄົ້ນຄວ້າມາດຕະການຜ່ອນຜັນ ຫຼັງຈາກວັນທີ 02 ມິຖຸນາ 2020. ໃຫ້ສືບຕໍ່ເອົາໃຈໃສ່ຕິດຕາມ ສະພາບການນໍາໃຊ້ສື່ສັງຄົມອອນລາຍ ແລະ ອື່ນໆ ທີ່ມີການເຄື່ອນໄຫວໂຄສະນາໂຈມຕີບິດເບືອນຄວາມເປັນຈິງ ໃນການປະຕິບັດແນວທາງ ຂອງພັກ, ກົດໝາຍຂອງລັດ ສ້າງຄວາມປັ່ນປ່ວນ ແລະ ຄວາມບໍ່ສະຫງົບໃນສັງຄົມ.

ກອງປະຊຸມລັດຖະບານຄັ້ງນີ້ ໄດ້ຮຽກຮ້ອງໃຫ້ສື່ມວນຊົນທຸກປະເພດ ລວມທັງສື່ອອນລາຍ ຕ່າງໆ ຈົ່ງຍົກສູງນໍ້າໃຈຮັກຊາດ, ຮັບໃຊ້ປະຊາຊົນບັນດາເຜົ່າ ອອກຂ່າວ, ໃຫ້ຂໍ້ມູນຂ່າວສານ ຕ່າງໆ ໃຫ້ຖືກຕ້ອງກັບຄວາມເປັນຈິງ ແລະ ເປັນຜົນປະໂຫຍດສູງສຸດໃຫ້ແກ່ຊາດ ແລະ ປະຊາຊົນ, ຫຼີກເວັ້ນການອອກຂ່າວ, ໃຫ້ຂໍ້ມູນເທັດທີ່ຈະສ້າງຄວາມປັ່ນປ່ວນ ແລະ ເປັນຜົນກະທົບດ້ານລົບຕໍ່ຈິດໃຈ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ຄວາມປອດໄພ ຂອງສັງຄົມ.

ຂ່າວ: ວຽງຈັນທາຍ

Related Articles

Leave a Reply