Visit BigblueAgency
ນາຍົກ ຮ່ວມເປີດປ້າຍຫໍຫຼັກເມືອງ ນະຄອນປາກເຊ​ ແຂວງຈໍາປາສັກ​

ນາຍົກ ຮ່ວມເປີດປ້າຍຫໍຫຼັກເມືອງ ນະຄອນປາກເຊ​ ແຂວງຈໍາປາສັກ​

ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ປອ.​ວິໄລວົງ ບຸດດາຄຳ ເຈົ້າແຂວງຈຳປາສັກ,​ ທ່ານ ບົວລີ ເພັດສົງຄາມ ເຈົ້ານະຄອນປາກເຊ​ ພ້ອມດ້ວຍບັນດາພາກສ່ວນກ່ຽວຂ້ອງ ໄດ້ເຂົ້າຮ່ວມເປີດປ້າຍຫໍຫຼັກເມືອງ ນະຄອນປາກເຊ​ ແຂວງຈໍາປາສັກ, ໃນວັນທີ 5 ເມສາ 2024 ຢູ່ບ້ານຫຼັກເມືອງ​ ຕໍ່ໜ້າວັດຫຼວງປາກເຊ.​  

ຫໍຫຼັກເມືອງ ນະຄອນປາກເຊ ແມ່ນເປັນການຢັ້ງຢືນເຖິງຄວາມເປັນມາໃນການຕັ້ງຖີ່ນຖານພູມລຳເນົາຂອງຊາວເມືອງ ແລະ ຢັ້ງຢືນແນວທາງນະໂຍບາຍ ອັນຖຶກຕ້ອງຂອງພັກ -​ ລັດ ເວົ້າລວມ, ເວົ້າສະເພາະ ຂອງຄະນະພັກ​-ອົງການປົກຄອງແຂວງຈໍາປາສັກ ໃນການສືບສານ, ​ສືບທອດມູນເຊື້ອອັນດີງາມຂອງຊາດ​-​ຂອງທ້ອງຖີ່ນ ແລະ ສົ່ງເສີມສີລະປະວັດທະນະທຳ ທີ່ມີເອກະລັກຂອງຊາດ,​ ຂອງທ້ອງຖີ່ນລາວໃຕ້, ເປັນສະຖານທີ່ ເພື່ອສັກກາລະບູຊາ ແລະ ເປັນຕົວແທນ ຂອງອົງການປົກຄອງ ໃນການປຸກສ້າງບ້ານເມືອງຜ່ານມາ.​

ໃນພິທີເປີດປ້າຍຫໍຫຼັກເມືອງ, ທ່ານ ບົວລີ ເພັດສົງຄາມ ໄດ້ລາຍງານປະຫວັດຄວາມເປັນມາ ແລະ ການກໍ່ສ້າງຫໍຫຼັກເມືອງ​ ນະຄອນປາກເຊ​ ໃຫ້​ທ່ານ ນາຍົກລັດຖະມົນຕີ ແລະ ຄະນະການນຳຂັ້ນສູງຈາກສູນກາງພັກ​-ລັດ ຮັບຊາບວ່າ:​ ໂຄງການກໍ່ສ້າງ ຫໍຫຼັກເມືອງ​ ນະຄອນປາກເຊ ເປັນໂຄງການຂອງແຂວງ ໂດຍແມ່ນຄະນະພັກ​-ອົງການປົກຄອງແຂວງ​ ຮັບຜິດຊອບໂດຍກົງ​ ຊຶ່ງໄດ້ມີການເກັບກໍາຂໍ້ມູນສຶກສາອອກແບບ ແລະ ແຕ່ງຕັ້ງຄະນະຮັບຜິດຊອບ ນັບແຕ່ປີ 2011-2012 ເປັນຕົ້ນມາ​ ແລະ ໄດ້ຕົກລົງກໍ່ສ້າງຫໍຫຼັກເມືອງ ດັ່ງກ່າວ​, ​ຕໍ່ມາໃນວັນທີ 29 ພຶດສະພາ 2015 ໄດ້ມີການຈັດຕັ້ງພິທີວາງສີລາລືກໃນການກໍ່ສ້າງ ແລະ​ ໄດ້ເລີ່ມລົງມືກໍ່ສ້າງໃນວັນທີ 1 ມິຖຸນາ 2015 ເປັນຕົ້ນມາ​ ໂດຍແມ່ນບໍລິສັດ 3s ພັດທະນາ​ ຈໍາກັດຜູ້ດຽວ​ ເປັນຜູ້ຮັບເໝົາກໍ່ສ້າງ,​ ຮອດວັນທີ 22 ມັງກອນ 2022 ການກໍ່ສ້າງໄດ້ສໍາເລັດໂດຍພື້ນຖານ, ລວມມູນຄ່າການກໍ່ສ້າງທັງໝົດ 8.068 ລ້ານກວ່າກີບ ແລະ ໄດ້ມອບ​-ຮັບການໂຄງກໍ່ສ້າງຢ່າງເປັນທາງການ ແລະ ມາເຖີງວັນທີ 5 ເມສາ ​2024 ນີ້ ເປັນມື້ທີ່ເປັນສີລິມຸງຄຸນຍິ່ງ, ເປັນມື້ໂຊກໃຫຍ່ໄຊງາມ ໃນການເປີດປ້າຍຫໍຫຼັກເມືອງ ນະຄອນປາກເຊ ນີ້.

ໃນໂອກາດນີ້ ທ່ານ ສອນໄຊ ສີພັນດອນ ພ້ອມດ້ວຍບັນດາທ່ານການນຳຈາກສູນກາງພັກ-ລັດ, ການນຳຂອງແຂວງ ແລະ ນະຄອນປາກເຊ ກໍໄດ້ຂື້ນກາບໄຫວ້ສັກກາລະບູຊາ ພຣະພຸດທະຮູບທີ່ສະຖິດຢູ່ທີ່ຫໍຫຼັກເມືອງ ແລະ ກໍໄດ້ເປີດປ້າຍສີລາຈາລືກ ແລະ ລັ່ນຄ້ອງ 9 ບາດ​ ເພື່ອເປັນສີລິມຸງຄຸນແກ່ຊາວແຂວງຈຳປາສັກ ກໍຄືຊາວນະຄອນປາກເຊ.

ທີ່ມາ: ຫ້ອງການ​ຖວທ ນະຄອນປາກເຊ​

Related Articles

Leave a Reply