Vientiane Times Lao
ບັນດານັກການທູດ ແລະ ອົງການຈັດຕັ້ງສາກົນ ປະຈໍາລາວ ອວຍພອນການນໍາພັກ-ລັດເນື່ອງໃນໂອກາດວັນຊາດລາວ

ບັນດານັກການທູດ ແລະ ອົງການຈັດຕັ້ງສາກົນ ປະຈໍາລາວ ອວຍພອນການນໍາພັກ-ລັດເນື່ອງໃນໂອກາດວັນຊາດລາວ

ບັນດານັກການທູດ ແລະ ຜູ້ຕາງໜ້າອົງການຈັດຕັ້ງສາກົນປະຈໍາລາວ ໄດ້ເຂົ້າອວຍພອນ ການນໍາພັກ-ລັດ ຢູ່ທໍານຽບປະທານປະເທດ ແຫ່ງ ສປປ ລາວ ໃນຕອນເຊົ້າຂອງມື້ວັນທີ 29 ພະຈິກ 2019 ເນື່ອງໃນໂອກາດວັນ ສະຖາປະນາ ສປປ ລາວ ຄົບຮອບ 44 ປີ.

ບັນດານັກການທູດ ແລະ ຜູ້ຕາງໜ້າອົງການຈັດຕັ້ງສາກົນ ນຳໂດຍ ທ່ານ ເບລິນດາ ອັນເຕ ເອກອັກຄະລັດຖະທູດຟີລິບປິນ ປະຈຳລາວ ແລະ ທັງເປັນ ເອກອັກຄະລັດຖະທູດອາວຸໂສ ໄດ້ນຳພາແຂກດັ່ງກ່າວເຂົ້າຢ້ຽມຄຳນັບ ແລະ ອວຍພອນ ການນໍາຂອງ ສປປ ລາວ ລວມມີ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ປານີ ຢາທໍ້ຕູ້ ປະທານສະພາແຫ່ງຊາດ, ທ່ານ ພັນຄໍາ ວິພາວັນ ຮອງປະທານປະເທດ ແລະ ການນໍາຄົນອື່ນໆ.

ທ່ານ ບຸນຍັງ ໄດ້ສະແດງຄວາມຂອບໃຈ ເປັນຢ່າງສູງຕໍ່ ທ່ານທູດອາວຸໂສ ທີ່ໄດ້ຕາງໜ້າໃຫ້ບັນດາ ທ່ານ ທູຕານຸທູດ ແລະ ຜູ້ຕາງໜ້າອົງການຈັດຕັ້ງ ສາກົນປະຈໍາລາວ ທີ່ໄດ້ມີຄໍາເວົ້າອັນຈົບງາມ ຕໍ່ ສປປ ລາວ ແລະ ປະຊາຊົນລາວ. “ຂ້າພະເຈົ້າ ມີຄວາມເຊື່ອໝັ້ນຢ່າງແນ່ນອນວ່າ ຄໍາຍ້ອງຍໍຊົມເຊີຍ ແລະ ຄໍາອວຍພອນອັນປະເສີດ ຂອງບັນດາທ່ານ ໄດ້ຈະເປັນແຫຼ່ງອັນຍິ່ງໃຫ່ຍ ຂອງການສ້າງແຮງບັນດານໃຈໃຫ້ແກ່ ລັດຖະບານ ແລະ ປະຊາຊົນລາວ ຂອງພວກຂ້າພະເຈົ້າ ໃນການສືບຕໍ່ຈັດຕັ້ງປະຕິບັດພາລະກິດອັນສູງສົ່ງແຫ່ງການສ້າງສາພັດທະນາປະເທດຊາດ ຕາມທິດຍືນຍົງ ແລະ ສີຂຽວ ແນ່ໃສ່ເຮັດໃຫ້ປະເທດລາວ ຫຼຸດພົ້ນອອກຈາກຄວາມດ້ອຍພັດທະນາ ໃນອະນາຄົດອັນໃກ້ນີ້.

ທ່ານ ປະທານປະເທດ ຍັງໄດ້ກ່າວຕື່ມອີກວ່າ ປີ 2019 ເປັນປີທີ່ປະຊາ ຄົມໂລກພວກເຮົາ ໄດ້ປະເຊີນກັບເຫດການຫຼາຍຢ່າງທີ່ມີທັງດ້ານຕັ້ງໜ້າ ແລະ ຫຍໍ້ທໍ້ ອັນໄດ້ສົ່ງຜົນກະທົບໂດຍກົງ ຕໍ່ການພັດທະນາເສດຖະກິດ-ສັງຄົມ ຂອງບັນດາປະຊາຊາດຢູ່ໃນໂລກເຊັ່ນ: ຄວາມບໍ່ສະຫງົບໃນຫຼາຍ ພື້ນທີ່ຂອງໂລກ, ຄວາມບໍ່ແນ່ນອນຂອງເສດຖະກິດໂລກ, ຜົນກະທົບຂອງ ການປ່ຽນແປງຂອງດິນຟ້າອາກາດ ໂດຍສະເພາະ ໄພພິບັດທາງທໍາມະຊາດ ທີ່ເປັນໄພຄຸກຄາມຢ່າງຮ້າຍແຮງຕໍ່ການດໍາລົງຊີວິດຂອງປະຊາຊົນ ແລະ ການພັດທະນາຂອງຫຼາຍປະເທດໃນໂລກ ລວມທັງ ສປປ ລາວ, ຕໍ່ໜ້າ ສະພາບດັງກ່າວ ໄດ້ຮຽກຮ້ອງໃຫ້ບັນດາປະຊາຊາດໃນໂລກ ຕ້ອງໄດ້ອອກ ແຮງຊຸກຍູ້ຄວາມພະຍາຍາມ ພາຍໃຕ້ຂອບການຮ່ວມ ມືຫຼາຍຝ່າຍ ເພື່ອ ແກ້ໄຂບັນຫາສໍາຄັນຕ່າງໆຂອງສາກົນ ອັນເປັນໄພຂົມຂູ່ຕໍ່ການດໍາລົງຄົງຕົວ ຂອງມວນມະນຸດ ເປັນຕົ້ນແມ່ນ ການລືບລ້າງຄວາມທຸກຍາກ, ການສົ່ງເສີມ ການສຶກສາທີມີຄຸນນະພາບ, ການຮັບມືກັບການປ່ຽນແປງຂອງດິນຟ້າອາ ກາດ ແລະ ການມີສ່ວນຮ່ວມຢ່າງທົ່ວເຖິງຂອງສັງຄົມ.

ປີ 2019 ເປັນປີທີ່ ພັກ-ລັດ ແລະ ປະຊາຊົນລາວທັງຊາດ ໄດ້ສືບຕໍ່ເອົາໃຈໃສ່ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 10 ຂອງພັກ ແລະ ແຜນພັດ ທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ຢ່າງຕັ້ງຫ້າ ໂດຍໄດ້ຮັບຜົນ ສໍາເລັດຕົວຈິງທີ່ເປັນໜ້າເພິ່ງພໍໃຈໃນຫຼາຍດ້ານເປັນຕົນແມ່ນ ຍັງສາມາດ ຮັກສາສະຖຽນລະພາບທາງດ້ານການເມືອງ ແລະເສດຖະກິດມະຫາພາກ ໄດ້ຢ່າງໜັ້ນທ່ຽງ, ວຽກງານດ້ານການສຶກສາ, ສາທາລະນະສຸກ, ວັດທະນະ ທໍາ-ສັ່ງຄົມ ກໍ່ໄດ້ຮັບການເອົາໃຈໃສ່ປັບປຸງແກ້ໄຂ ໃຫ້ມີຄຸນນະພາບດີຂຶ້ນ ຢ່າງຕໍ່ເນື່ອງ, ພິເສດ ໃນຫວ່າງບໍ່ດົນມານີ້ອົງການອຸຍແນສໂກ ກໍ່ໄດ້ຮັບຮອງ ຢ່າງເປັນທາງການເອົາທົ່ງໄຫຫີ່ນ, ແຂວງຊຽງຂວາງ ເຂົ້າໃນບັນຊີເປັນ ມໍລະດົກໂລກແຫ່ງທີ 3 ຂອງ ສປປ ລາວ ຖັດຈາກຫຼວງພະບາງ ແລະ ວັດພູຈໍາປະສັກ. “ຕາງໜ້າໃຫ້ລັດຖະບານ ແລະ ປະຊາຊົນລາວ, ຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈ ຕໍ່ບັນດາສະມາຊິກ ຂອງຄະນະກໍາມາທິ ການມໍລະດົກໂລກ ທີ່ໄດ້ໃຫ້ການສະໜັບສະໜູນ ແກ່ ສປປ ລາວ ແລະ ຂໍເຊີນຊວນບັນດາທ່ານທັງຫຼາຍ ພ້ອມດ້ວຍຄອບຄົວ ແລະ ຍາດຕິພີນ້ອງ ຈົ່ງໄດ້ຫາໂອກາດໄປທ່ຽວຊົມສະຖານທີ່ມໍລະດົກໂລກແຫ່ງໃໝ່ນີ້ ກໍ່ຄືສະຖານທີ່ທ່ອງທ່ຽວທໍາມະຊາດແຫ່ງອື່ນ ຂອງປະເທດລາວ.”

ທ່ານ ບຸນຍັງ ໄດ້ກ່າວຕື່ມອີກວ່າ ເຖິງແມ່ນວ່າ ສປປ ລາວ ຈະສາມາດບັນ ລຸຜົນສໍາເລັດຫຼາຍດ້ານດັ່ງທີ່ໄດ້ກ່າວມາຂ້າງເທິງນັ້ນກໍຕາມ ແຕ່ກໍ່ຍັງປະເຊີນ ກັບຄວາມຫຍຸ້ງຍາກ ແລະ ສິ່ງທ້າທາຍນາໆປະການ, ຍິ່ງໄປກວ່ານັ້ນໃນໄລຍະ ຫວ່າງບໍ່ດົນມານີ້ ປະເທດລາວ ຊ້ໍາພັດຖືກໄພສັດຕູພືດທໍາລາຍຜົນລະປຸກ ຢູ່ຫຼາຍແຂວງ ໃນຂອບເຂດທົ່ວປະເທດ ແລະ ໄພພິບັດທາງທໍາມະຊາດ ຄັ້ງຮ້າຍແຮງທີ່ສຸດໃນຮອບ 40 ກວ່າປີ, ໂດຍສະເພາະ ແມ່ນ ນ້ໍາຖ້ວມທີ່ໜັກ ໜ່ວງ ເກີດຂຶ້ນຢູ່ຫຼາຍພື້ນທີ່ ຂອງປະເທດ ຊຶ່ງໄດ້ສ້າງຄວາມເສຍຫາຍຢ່າງ ໃຫຍ່ຫຼວງ ທັງຊີວິດ ແລະ ຊັບສິນໃຫ້ແກ່ປະເທດຊາດ ແລະ ປະຊາຊົນລາວ ໂດຍສະເພາະແມ່ນຢູ່ບັນດາ 6 ແຂວງພາກກາງ ແລະ ພາກໃຕ້. “ຂ້າພະເຈົ້າ ຂໍຖືໂອກາດດັງກ່າວ ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງ ຄວາມຂອບໃຈ ຢ່າງຈິງໃຈ ແລະ ຄວາມຮູ້ບຸນຄູນ ຢ່າງເລິກເຊິ່ງ ຕໍ່ບັນດາປະ ເທດເພື່ອນມິດ ແລະ ອົງການຈັດຕັ້ງສາກົນຕ່າງໆ ທີ່ໄດ້ໃຫ້ການຊ່ວຍເຫຼືອ ທາງດ້ານວັດຖຸ ແລະ ປັດໄຈ ຢ່າງທັນການໃຫ້ແກ່ ສປປ ລາວ ເຂົ້າໃນວຽກ ງານການບູລະນະສ້ອມແປງພື້ນຖານໂຄງລ່າງທີ່ເປ່ເພ ແລະ ຟື້ນຟູຊີວິດການ ເປັນຢູ່ຂອງປະຊາຊົນທີ່ຮັບຜົນກະທົບຈາກອຸທົກກະໄພໃນຄັ້ງທີ່ຜ່ານມາ. ຂ້າພະເຈົາ ຂໍຖືໂອກາດນີ້ ສະແດງຄວາມເຫັນໃຈຢ່າງສຸດຊຶ້ງ ຕໍ່ບັນດາປະເທດທີ່ໄດ້ຮັບຜົນກະທົບຢ່າງຮ້າຍແຮງ ຈາກພາຍຸຝົນທີ່ໄດ້ພັດຖະ ຫຼົ່ມຫຼາຍພື້ນທີ່ໃນໂລກ ແລະ ຫວັງຢ່າງຍິ່ງວ່າ ສະພາບການຢູ່ເຂດເຫຼົ່ານັ້ນ ຈະກັບຄືນສູ່ປົກກະຕິໄດ້ໂດຍໄວ.”

ທ່ານ ປະທານປະເທດ ຍັງໄດ້ກ່າວເຖິງສະພາບການຂອງໂລກ ທີ່ມີການ ປ່ຽນແປງຢ່າງໄວວາ ແລະ ສະຫຼັບສັບຊ້ອນເໝືອນດັ່ງທຸກວັນນີ້, ຫຼາຍປະເທດໄດ້ອອກສຽງສະໜັບສະໜູນຢ່າງແຂງແຮງ ຕໍ່ການເຄື່ອນ ໄຫວແບບຫຼາຍຝ່າຍ ແລະການຮ່ວມມືສາກົນ. “ຂ້າພະເຈົ້າ ຂໍຢ້ໍາຄືນເຖິງ ເຈດຕະນາລົມ ແລະ ຄວາມໝາຍໜັ້ນທາງດ້ານການເມືອງ ຂອງລັດຖະ ບານລາວ ທີ່ຈະເຂົ້າຮ່ວມ ຢ່າງຕັ້ງໜ້າກັບວົງຄະນະຍາດສາກົນໃນການຮັບມື ແລະ ແກ້ໄຂບັນດາສິ່ງທ້າທາຍທີ່ພວມເກີດຂຶ້ນຢູ່ໃນພາກພື້ນ ແລະ ສາກົນ ໂດຍສະເພາະຄວາມຈໍາເປັນພື້ນຖານ ໃນການສ້າງສະພາບແວດລ້ອມ ແຫ່ງສັນຕິພາບ ທີ່ເອື້ອອໍານວຍໃຫ້ແກ່ການພັດທະນາປະເທດ ແລະ ການປັບປຸງຊີວິດການເປັນຢູ່ຂອງປະຊາຊົນ ໃນຂອບເຂດທົ່ວໂລກ ແລະ ໂດຍສະເພາະ ແມ່ນການຈັດຕັ້ງປະຕິບັດວິໄສທັດ 2030 ຂອງອົງການສະຫະ ປະຊາຊາດ ໃຫ້ປະກົດຜົນເປັນຈິງ ໃນອະນາຄົດອັນໃກ້ນີ້.”

ໃນໂອກາດດັງກ່າວ ທ່ານປະທານປະເທດກໍ່ໄດ້ອວຍພອນແກ່ບັນດາແຂກ ໃຫ້ມີສຸຂະພາບແຂງແຮງ, ມີຄວາມສຸກ, ໃນຊີວິດສ່ວນຕົວ, ຄອບຄົວ ແລະ ປະສົບຜົນສໍາເລັດໃນໜ້າທີ່ອັນມີກຽດສະຫງ່າຂອງທຸກໆທ່ານ ໃນໂອກາດປີ ໃໝ່ສາກົນ 2020 ທີ່ໃກ້ຈະມາເຖິງນີ້.  ພ້ອມນັ້ນຍັງໄດ້ຝາກຄວາມຢ້ຽມຢາມ ຖາມຂ່າວ ແລະ ພອນໄຊອັນປະເສີດໄປຍັງປະມຸກລັດ, ຫົວໜ້າລັດຖະບານກໍ່ ຄືການນໍາຂອງອົງການຈັດຕັ້ງສາກົນຂອງບັນດາແຂກທີ່ມາເຕົ້າໂຮມໃນມື້ນີ້.

ຂ່າວ: ວຽງຈັນທາຍ

ພາບ: ຄຳພັນ

Related Articles

Leave a Reply