ກອງບັນຊາການ ປກສ ແຂວງບໍ່ແກ້ວ ພະແນກສະກັດກັ້ນ ແລະ ຕ້ານຢາເສບຕິດໄດ້ຈັດພິທີຈູດທໍາລາຍຢາ ເສບ ຕິດປະ ເພດຕ່າງໆເປັນຈໍານວນຫຼາຍໃນວັນທີ 12 ຕຸລາ 2020 ທີ່ຜ່ານມາ ຢູ່ທີ່ເດີ່ນສະໜາມບິນແຂວງບໍ່ແກ້ວ ເນື່ອງໃນວັນຕ້ານຢາເສບຕິດ ຄົບຮອບ 19 ປີ (12 ຕຸລາ 2001-12 ຕຸລາ 2020), ຊຶ່ງບັນຫາຢາ ເສບຕິດ ຢູ່ແຂວງບໍ່ແກ້ວນີ້ຍັງເປັນບັນຫາຫຍໍ້ທໍ້ທີ່ພົ້ນເດັ່ນ ແລະ ຍັງແກ້ໄຂບໍ່ຕົກ.
ຢາເສບຕິດທີ່ມາຈູດທໍາລາຍດັ່ງກ່າວທີ່ໄດ້ດໍາເນີນຄະດີຕາມຂັ້ນຕອນຖືກຕ້ອງຕາມລະບຽບກົດໝາຍ ແລະ ຖືກສານປະຊາຊົນແຂວງບໍ່ແກ້ວຕັດສິນຢ່າງເດັດຂາດ ປະກອບມີ: ຢາບ້າຈໍານວນ 6.579.131 ເມັດ, ເຮໂລອິນ 260 ແທ່ງ ແລະ 12 ຖົງນ້ອຍ, ຢາໄອສ໌ 362 ຫໍ່ ແລະ 25 ຫຼອດນ້ອຍ, ເຄຕາມິນ 11 ຖົງນ້ອຍ. ນອກນັ້ນຍັງມີຢາເສບຕິດທີ່ບໍ່ມີເຈົ້າກໍາປະກອບມີ: ຢາບ້າຈໍານວນ 4.982.845 ເມັດ, ຢາໄອສ໌ 643 ຫໍ່ ແລະ 01 ຖົງນ້ອຍ, ເຮໂລອິນ 04 ແທ່ງ, ຝຸ່ນແປ້ງສີຂາວ 400 ເປົາ ມີນໍ້າໜັກ 10 ໂຕນ, ຢາບ້າ 11.561.975 ເມັດ, ເຮໂລອິນ 264 ແທ່ງ, ຢາໄອສ໌ 1.005 ຫໍ່ ແລະ ເຄຕາມີນ 11 ຖົງນ້ອຍ ຖືວ່າຢາເສບຕິດທີ່ມາຈູດທໍາລາຍຢູ່ແຂວງບໍ່ແກ້ວແມ່ນມີຈໍານວນຫຼາຍກວ່າແຂວງອື່ນ ລວມທັງຫຼາຍກວ່າຈູດທໍາລາຍຢູ່ນະຄອນຫຼວງວຽງຈັນ.
ເລຂາຄະນະພັກ, ຫົວໜ້າກອງບັນຊາການ ປກສ ແຂວງ, ຄະນະກໍາມະການກວດກາ, ຄຸ້ມຄອງ ແລະ ທໍາລາຍຢາເສບຕິດແຂວງ ທ່ານ ພັອ ອິນສົມ ທໍາລະສິນ ໄດ້ລາຍງານສະພາບຢາເສບຕິດຢູ່ແຂວງບໍ່ແກ້ວ ໃນພິທີດັ່ງກ່າວວ່າ: ປະຈຸບັນນີ້ແຂວງ ບໍ່ແກ້ວຍັງພົບພໍ້ກັບບັນຫາສິ່ງເສບຕິດເຂົ້າມາຄອບງໍາ ໂດຍມີ ຜູ້ຂາຍລາຍໃຫ່ຍ-ລາຍນ້ອຍ ແລະ ຍັງມີຜູ້ຊົມໃຊ້ເສບຢາຕິດເປັນຈໍານວນຫຼາຍເຖິງແມ່ນວ່າທາງເຈົ້າໜ້າທີ່ຈະມີການກວດກາໂດຍໃຊ້ມາດຕະການຕ່າງໆແຕ່ຍັງມີປະກົດການຊື້ຂາຍຢາເສບຕິດຢູ່ ແລະ ເປັນບັນຫາໜຶ່ງທີ່ພາໃຫ້ເກີດມີປະກົດການຫຍໍ້ທໍ້ທີ່ພົ້ນເດັ່ນພາຍໃນແຂວງ.
ທ່ານ ພັອ ອິນສົມ ໃຫ້ຮູ້ຕື່ມວ່າ: ໃນໄລຍະ 01 ປີຜ່ານມາ ພະແນກສະກັດກັ້ນ ແລະ ຕ້ານຢາເສບຕິດແຂວງບໍ່ແກ້ວ ສາມາດມ້າງຄະດີຢາເສບຕິດໄດ້ຈຳນວນ: 165 ເລື່ອງ, ກັກຜູ້ຕ້ອງຫາຈໍານວນ 235 ຄົນ, ຍີງ 32 ຄົນ, ຕ່າງປະເທດ 38 ຄົນ ແລະ ຍືດເຄື່ອງຂອງກາງຢາບ້າໄດ້ຈໍານວນຫຼາຍເຊັ່ນ: ຢາບ້າ1.242.042 ເມັດ, ເຮໂລອິນຈໍານວນ 82 ແທ່ງ, ຢາໄອສ໌ຈໍານວນ 622 ຫໍ່, ຢາຝິ່ນຈໍານວນ 2 ກິໂລ, ສານເຄມີ ຈໍານວນ 30 ໂຕນ, ປະເພດແປ້ງຝຸ່ນຕ່າງໆ 07 ຖົງ, ລົດໃຫຍ່ 14 ຄັນ, ຝຸ່ນແປ້ງສີຂາວ 400 ເປົາ ທີ່ມີນໍ້າໜັກ 10 ໂຕນ, ລົດຈັກ 46 ຄັນ, ໄດ້ລົງທໍາລາຍໄຮ່ຝິ່ນຈຳນວນ 32 ເຮັກຕາ.
ພາບ-ຂາວ: ນາຊູ ປກສ ແຂວງບໍ່ແກ້ວ
