Vientiane Times Lao
ບານເຕະລາວລີກ ອາດຈະເປີດແຂ່ງຂັນໃນເດືອນກໍລະກົດ

ບານເຕະລາວລີກ ອາດຈະເປີດແຂ່ງຂັນໃນເດືອນກໍລະກົດ

ສະຫະພັນບານເຕະແຫ່ງຊາດລາວ (ສຕລ) ມີແຜນຈະເປິດການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ໃນເດືອນກໍລະກົດ ຫຼື ເດືອນສິງຫາ 2020, ແຕ່ຕ້ອງອີງໃສ່ມາດຕະການຜ່ອນຜັນໃນການປ້ອງກັນໂຄວິດ-19 ຂອງຄະນະສະເພາະກິດ.

ສຕລ ແຈ້ງໃຫ້ຊາບຕື່ມອີກວ່າ ຖ້າການແຂ່ງຂັນບານເຕະຄັ້ງນີ້ ກາຍເດືອນສິງຫາ 2020 ແມ່ນບໍ່ສາມາດຈັດໄດ້, ເພາະການແຂ່ງຂັນຕ້ອງໃຊ້ເວລາປະມານ 3-4 ເດືອນ ໂດຍອີງໃສ່ຈໍານວນທີມກິລາເຂົ້າຮ່ວມ.

ທ່ານ ຄຳໄສ ແສງມະນີພອນ, ຕ່າງໜ້າສະຫະພັນບານເຕະແຫ່ງຊາດລາວ ໄດ້ແຈ້ງໃຫ້ຮູ້ວ່າ: ການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ມີ 7 ທີມເຂົ້າຮ່ວມແຂ່ງຂັນປະກອບ ມີ: ສະໂມສອນ ລາວໂຕໂຢຕ້າ ເອັຟຊີ, ສະໂມສອນ ມາສເຕີ ເຊເວັ້ນ ເອັຟຊີ, ສະໂມສອນ ຊ້າງນ້ອຍ ເອັຟຊີ, ສະໂມສອນ ປກສ ເອັຟຊີ, ສະໂມສອນ ວຽງຈັນ ເອັຟຊີ ຈາກແຂວງ ວຽງຈັນ, ສະໂມສອນ ວຽງຈັນ ເອັຟທີ ແລະ ສະໂມສອນ ເອສະຣາ ເອັຟຊີ.

ໃນນັ້ນ ສຕລ ຈະຮັບຜິດຊອບຄ່າໃຊ້ຈ່າຍຂອງການນຳໃຊ້ສະໜາມ ແລະ ອົງປະກອບຈັດການແຂ່ງຂັນໃນມື້ແຂ່ງຂັນທັງໝົດໃຫ້ກັບສະໂມສອນ ເພື່ອຫຼຸດຜ່ອນຄ່າໃຊ້ຈ່າຍຂອງສະໂມສອນໃນການເຂົ້າຮ່ວມການແຂ່ງຂັນ

ສຳລັບການແຂ່ງຂັນບານເຕະ ເປບຊີ ລາວລີກ 1 ປະຈຳປີ 2020 ເລື່ອນເປິດການແຂ່ງຂັນ ຈາກກຳນົດເດີມໃນວັນທີ 25 ເມສາ ຜ່ານມາ, ຍ້ອນມີການແຜ່ລະບາດຂອງເຊື້ອພະຍາດໂຄວິດ-19.

ຂ່າວ: ວຽງຈັນທາຍ

ພາບ ປະກອບ

Related Articles

Leave a Reply