ງານມະຫາກໍາບຸນຊ້າງໃນປີ 2022 ທີ່ເມືອງ ແລະ ແຂວງໄຊຍະບູລີ ປະຈໍາປີ 2022 ຊຶ່ງເປັນຄັ້ງທີ 16, ຈະຈັດຂຶ້ນ ໃນວັນທີ 20 ກຸມພາ 2022 ທີ່ຈະມາເຖິງນີ້ ຫຼື ຈັດພຽງວັນດຽວ ຍ້ອນການແຜ່ລະບາດຂອງພະຍາດໂຄວິດ-19 ເພື່ອເປັນຮີດຄອງທີ່ເຄີຍປະຕິບັດມາເທົ່ານັ້ນ ໂດຍຈະຈໍາກັດ ຜູ້ເຂົ້າຮ່ວມພາຍໃນງານ ແລະ ປະຊາຊົນຈາກຕ່າງແຂວງ, ຈາກຕ່າງປະເທດ ອື່ນໆ ຈະບໍ່ໄດ້ຮັບການເຊີນເຂົ້າຮ່ວມ, ນອກນັ້ນ ກໍຈະບໍ່ມີ ງານຕະຫຼາດນັດ ແລະ ບໍ່ມີການຄົບງັນໃດໆ ເພື່ອເປັນການປ້ອງກັນການແຜ່ລະບາດຂອງພະຍາດໂຄວິດ-19.
ອໍານາດການປົກຄອງ ແຂວງໄຊຍະບູລີແຈ້ງໃຫ້ຮູ້ວ່າ: ສຳລັບກິດຈະກໍາບຸນຊ້າງທີ່ຈະຈັດໃນວັນທີ 20 ກຸມພາ 2021, ຈະມີພິທີຕັກບາດເພື່ືອອຸທິດສ່ວນບຸນກຸສົນໃຫ້ຊ້າງ, ແຫ່ຂະບວນຊ້າງ, ບາສີສູ່ຂວັນຊ້າງ, ຈັດອາຫານບຸບເຟໃຫ້ຊ້າງກິນເພື່ອເປັນການສ້າງເງື່ອນໄຂໃຫ້ຊ້າງມີໂອກາດໄດ້ມາພົບປະກັນ.
ບຸນຊ້າງ ເປັນໜຶ່ງໃນງານສຳຄັນຂອງແຂວງໄຊຍະບູລີ ແລະ ປົກກະຕິຈະຈັດຂຶ້ນໃນໄລຍະ 2-3 ວັນ ໂດຍມີຫຼາຍກິດຈະກໍາລວມມີການສະແດງຊ້າງ ແລະ ການສະແດງສິນຄ້າຂອງທ້ອງຖິ່ນໜຶ່ງເມືອງໜຶ່ງຜະລິດຕະພັນ ຊຶ່ງມີປະຊາຊົນນັບພັນຄົນມາທ່ຽວຊົມໃນງານດັ່ງກ່າວ ຊີ່ງເປັນການເປີດໂອກາດໃຫ້ນັກທ່ອງທ່ຽວໄດ້ຊື້ຜະລິດຕະພັນກະເສດທີ່ຜະລິດຢູ່ທ້ອງຖິ່ນ ແລະ ເຄື່ອງຫັດຖະກຳທີ່ຜະລິດຢູ່ບັນດາແຂວງ ແລະ ປະເທດເພື່ອນບ້ານ, ພ້ອມກັນນັ້ນ ນັກທ່ອງທ່ຽວຍັງໄດ້ເຂົ້າໃກ້ຊ້າງ, ໃຫ້ອາຫານ, ຂີ່ລົດຍົນ, ໄປທ່ຽວຊົມບັນດາບ້ານທີ່ມີຊົນເຜົ່າຢູ່ອາໄສ, ຊົມງານວາງສະແດງວັດທະນະທຳ ແລະ ອື່ນໆ. ແຕ່ເນື່ອງຈາກມີການແຜ່ລະບາດຂອງພະຍາດໂຄວິດ-19 ດັ່ງນັ້ນ ນັບແຕ່ ປີ 2020 ເປັນຕົ້ນມາ ບຸນຊ້າງຈຶ່ງບໍ່ໄດ້ຈັດໃຫຍ່ ເປັນພຽງຮັກສາຮິດຄອງປະເພນີເທົ່ານັ້ນ.
