Vientiane Times Lao
ບຸນນະມັດສະການພະທາດຫຼວງວຽງຈັນ ປະຈໍາປີ 2020 ຈະເລີ່ມໄຂຂຶ້ນຢ່າງເປັນ ທາງການໃນຕອນບ່າຍຂອງມື້ນີ້

ບຸນນະມັດສະການພະທາດຫຼວງວຽງຈັນ ປະຈໍາປີ 2020 ຈະເລີ່ມໄຂຂຶ້ນຢ່າງເປັນ ທາງການໃນຕອນບ່າຍຂອງມື້ນີ້

ບຸນນະມັດສະການພະທາດຫຼວງວຽງຈັນ ປະຈໍາປີ 2020 ນີ້ຈະໄດ້ໄຂຂຶ້ນຢ່າງເປັນທາງການນັບແຕ່ມື້ນີ້ວັນທີ 29 ຫາ 31 ຕຸລາ 2020 ລວມ 3 ວັນ ຊຶ່ງໃນປີນີ້ຈະເນັ້ນສະເພາະພິທີທາງສາດສະໜາ ເຊັ່ນ: ແຫ່ຜາສາດເຜິ້ງ, ພິທີແຫ່ລູກຄີ ແລະ ແຂ່ງຂັນປະເພນີຕີຄີ ແລະ ພິທີຕັກບາດ ແລະ ອື່ນໆ ໂດຍອະນຸຍາດໃຫ້ພຽງແຕ່ ຮ້ານຂາຍອາຫານ, ຂາຍເຂົ້າຫຼາມ-ປິ້ງໄກ່, ຮ້ານຂາຍເຄື່ອງດື່ມ (ທີ່ບໍ່ມີທາດເຫຼົ້າ), ຮ້ານຂາຍດອກໄມ້, ທູບ-ທຽນ ເພື່ອບູຊາ ເທົ່ານັ້ນທີ່ສາມາດວາງຂາຍ ຢູ່ໃນງານບຸນດັ່ງກ່າວ, ສ່ວນຕະຫຼາດນັດວາງສະແດງສິນຄ້າ ແລະ ງານບັນເທີງຕ່າງໆ ແມ່ນບໍ່ອະນຸຍາດໃຫ້ຈັດ.
ໃນຕອນບ່າຍຂອງມື້ວັນທີ 29 ຕຸລານີ້, ຈະມີພິທີເປີດງານບຸນນະມັດສະການພະທາດຫຼວງວຽງຈັນ ປະຈໍາປີ 2020 ຢ່າງເປັນທາງການ ໂດຍມີການນໍາພັກ-ລັດ ແລະ ການນໍານະຄອນຫຼວງວຽງຈັນ ແລະ ພາກສ່ວນທີ່ ກ່ຽວຂ້ອງເຂົ້າຮ່ວມ.
ໃນຕອນບ່າຍຂອງວັນທີ 30 ຈະມີພິທີແຫ່ຜາສາດເຜິ້ງເລີ່ມຈາກວັດສີເມືອງ ແຫ່ຕາມເສັ້ນທາງມາ ເຕົ້າໂຮມກັນຢູ່ວັດໜອງບອນກ່ອນທີ່ຈະເຄື່ອນຍ້າຍເຂົ້າໄປແຫ່ຢູ່ທີ່ເດີ່ນພະທາດຫຼວງ.
ມື້ວັນທີ 31 ຕຸລາ 2020 ຊຶ່ງເປັນມື້ສຸດທ້າຍຂອງບຸນນະມັດສະການພະທາດຫຼວງ, ໃນຕອນເຊົ້າຈະມີພິທີຕັກບາດ ທີ່ເດີ່ນພະທາດຫຼວງ, ໃນຕອນບ່າຍຈະມີພິທີແຫ່ລູກຄີ ແລະ ແຂ່ງຂັນປະເພນີຕີຄີລະຫວ່າງທີມປະຊາຊົນ ແລະ ທີມລັດຖະບານ ທີ່ເດີ່ນພະທາດຫຼວງ  ແລະ ຈະມີພິທີວຽນທຽນໃນຕອນຄໍ່າ.

ຂ່າວ: ວຽງຈັນທາຍ

ພາບປະກອບ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ