Visit BigblueAgency
ບຸນພຣະທາດຫຼວງ ປີນີ້ ຈະມີຜາສາດເຜິ້ງທີ່ໃຫຍ່ ແລະ ສູງທີ່ສຸດເຖິງ 3 ແມັດ

ບຸນພຣະທາດຫຼວງ ປີນີ້ ຈະມີຜາສາດເຜິ້ງທີ່ໃຫຍ່ ແລະ ສູງທີ່ສຸດເຖິງ 3 ແມັດ

ບຸນພຣະທາດຫຼວງ ປີ 2022 ນີ້ ຈະມີ ຜາສາດເຜິ້ງຄູ່ໜຶ່ງທີ່ໃຫຍ່ ແລະ ສູງທີ່ສຸດ ກວ່າທຸກໆປີທີ່ເຄີຍຈັດມາຊຶ່ງຈະມີຄວາມສູງປະມານ 3 ແມັດ ໂດຍຈະໃຊ້ຂີ້ເຜິ້ງສົດປະມານ 80 ກິໂລ, ພ້ອມທັງຈະເຮັດ ໝາກເບັງໃຫຍ່ ຄູ່ໜຶ່ງ, ສູງປະມານ 2 ແມັດ ເພື່ອປະກອບສ່ວນ ເຂົ້າໃນງານບຸນພຣະທາດຫຼວງວຽງຈັນ ໃຫ້ມີສີສັນຂຶ້ນກວ່າເກົ່າ ຊຶ່ງການສ້າງຜາສາດເຜິ້ງດັ່ງກ່າວນັ້ນ, ຄະນະຮັບຜິດຊອບຈັດງານບຸນ ໄດ້ມອບໃຫ້ບໍລິສັດ ເພັດບັນດິດກໍ່ສ້າງ ຈໍາກັດ ເປັນຜູ້ຮັບຜິດຊອບ.

ທ່ານນາງ ບົວວຽງ ເພັດທະລານຄຳ ຄະນະກຳມະການແນວລາວສ້າງຊາດ, ຮອງຫົວໜ້າຄະນະທີ່ປຶກສາວຽກງານສາສະໜາ, ທັງເປັນປະທານບໍລິສັດ ເພັດບັນດິດກໍ່ສ້າງ ຈໍາກັດ ໃຫ້ສຳພາດເມື່ອວັນທີ 1 ພະຈິກ 2022 ທີ່ຜ່ານມານີ້ວ່າ: ຜາສາດເຜິ້ງທີ່ໃຫຍ່ດັ່ງກ່າວ ຈະນໍາໄປຕັ້ງໄວ້ຢູ່ໜ້າພຣະທາດຫຼວງວຽງຈັນ ໃນມື້ເປີດງານບຸນວັນທີ 4 ພະຈິກ.

ບຸນພຣະທາດຫຼວງ ປີ 2022 ນີ້ ຈະຈັດ 5 ວັນນັບແຕ່ ວັນທີ 4-8 ພະຈິກ 2022 ​ນີ້.

ສະເພາະກິດຈະກໍາທາງສາສະໜາແມ່ນເລີ່ມຈາກວັນທີ 6 ພະຈິກ ເວລາ 16:00 ຈະມີພິທີສູດປະລິຕະມຸງຄຸນທີ່ພຣະທາດຫຼວງ, ວັນທີ 7 ພະຈິກ ເວລາ 13:30 ໂມງ ຈະມີພິທີແຫ່ຜາສາດເຜິ້ງ, ໃນວັນທີ 8 ເວລາ 7:00 ໂມງ ຈະ​ມີພິທີໃສ່ບາດຖວາຍສັງຄະທານ, ຮອດເວລາ 13:00 ໂມງ ຈະ​ມີພິທີແຫ່ລູກຄີ ແລະ ແຂ່ງຂັນກິລາພື້ນບ້ານຕີຄີ; ຫຼັງ​ຈາກ​ນັ້ນ, ເວລາ 19:00 ໂມງ ຈະ​ມີພິທີວຽນທຽນ ແລະ ຈູດທູບທຽນ, ບັ້ງໄຟສັກກະລະບູຊາອົງພຣະທາດຫຼວງ.

​ທີ່ມາ: ຂປລ

Related Articles

Leave a Reply