Vientiane Times Lao
ບໍລິສັດບົວລະພາ ສໍາປະທານດິນ 2.000 ເຮັກຕາປູກໄມ້ອຸດສາຫະກໍາຢູ່ ແຂວງວຽງຈັນ

ບໍລິສັດບົວລະພາ ສໍາປະທານດິນ 2.000 ເຮັກຕາປູກໄມ້ອຸດສາຫະກໍາຢູ່ ແຂວງວຽງຈັນ

ລັດຖະບານລາວໄດ້ຕົກລົງອະນຸຍາດໃຫ້ບໍລິສັດບົວລະພາ ກະສິກໍາ- ປ່າໄມ້ຈໍາກັດ ສໍາປະທານເນື້ອທີ່ດິນ 2.000 ເຮັກຕາທີ່ຊຸດໂຊມເພື່ອປູກໄມ້ ອຸດສາຫະກໍາ ໂດຍສະເພາະໄມ້ວິກ ແລະ ໄມ້ກະຖິນນະລົງ ຢູ່ເຂດປ່າຜະລິດແຫ່ງຊາດຢູ່ແຂວງວຽງຈັນ ຊຶ່ງມີອາຍຸສໍາປະທານ 50 ປີ.

ທ່ານ ນາງຄໍາຈັນ ວົງແສນບູນ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານຮັກກັນ ອີຮິກແຊນ ອໍານວຍການບໍລິສັດບົວລະພາ ກະສິກໍາ – ປ່າໄມ້ຈໍາກັດ, ທ່ານກິແກ້ວ ສິງນາວົງ ຫົວໜ້າຫ້ອງການກະຊວງກະສິກໍາ ແລະ ປ່າໄມ້, ທ່ານສຸກັນ ວິໄລຮັດ ຫົວໜ້າພະແນກແຜນການ ແລະ ການລົງທຶນ ແຂວງວຽງຈັນ ແລະ ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ ໄດ້ຮ່ວມກັນເຊັນສັນຍາໃນການສໍາປະທານດິນດັ່ງກ່າວທີ່ໄດ້ຈັດຂຶ້ນເມື່ອບໍ່ດົນມານີ້ ຢູ່ ກະຊວງແຜນການ ແລະ ການລົງທຶນ ໂດຍມີ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ປອ ໄຊນະຄອນ ອິນທະວົງ ຮອງລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ທ່ານນາງ ສິງຄໍາ ຄົງສະຫວັນ ຮອງເຈົ້າແຂວງວຽງຈັນ ເຂົ້າຮ່ວມເປັນສັກຂີພິຍານ.

ທ່ານນາງສຸໄພວັນ ທ່ຽງຈັນໄຊ ຮອງອໍານວຍການບໍລິສັດບົວລະພາ ກະສິກໍາ – ປ່າໄມ້ໄດ້ກ່າວໃນພິທີເຊັນສັນຍາດັ່ງກ່າວວ່າ: ເປົ້າໝາຍຫຼັກຂອງບໍລິສັດແມ່ນຈະຂະຫຍາຍເນື້ອທີ່ປູກໄມ້ອຸດສາຫະກໍາ ຢູ່ ແຂວງວຽງຈັນຍ້ອນວ່າໂຮງງານໄມ້ອັດຂອງບໍລິສັດຕັ້ງຢູ່ ເມືອງຫິນເຫີບ ຊຶ່ງຈະມີການກໍ່ສ້າງສໍາເລັດໃນໄວໆນີ້. ເນື້ອທີ່ດິນ 2.000 ເຮັກຕາທີ່ບໍລິສັດໄດ້ຮັບສໍາປະທານຈາກລັດຖະບານນີ້ ແມ່ນນອນຢູ່ໃນ 3 ເມືອງ ຄື: ເມືອງຫິນເຫີບ, ເມືອງເຟືອງ ແລະ ເມືອງຊະນະຄາມ ຂອງແຂວງວຽງຈັນ ຊຶ່ງຈະມີການປູກຕົ້ນໄມ້ອຸດສາຫະກໍາໃຫ້ສໍາເລັດພາຍໃນປີນີ້.

ທ່ານນາງສຸໄພວັນໄດ້ກ່າວຕື່ມວ່າ: ໂດຍລວມແລ້ວ ຮອດປັດຈຸບັນ ບໍລິສັດບົວລະພາໄດ້ປູກໄມ້ອຸດສາຫະກໍາ ແລ້ວຫຼາຍກວ່າ 5.000 ເຮັກຕາ ຊຶ່ງເປົ້າໜາຍຂອງບໍລິສັດແມ່ນຈະຂະຫຍາຍເນື້ອທີ່ປູກໄມ້ໃຫ້ໄດ້ 60.000 ເຮັກຕາ ເພື່ອຈະສະໜອງໄມ້ໃຫ້ພຽງພໍກັບຄວາມຕ້ອງການຂອງໂຮງງານສະຫຼາຍເຫຍື່ອໄມ້ ຂອງບໍລິສັດທີ່ຈະມີການລົງທຶນກໍ່ສ້າງໃນອະນາຄົດ.

ຂ່າວ: ວຽງຈັນທາຍ

ພາບ: ສົມພາວັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ