ໃນຕອນແລງ ຂອງວັນທີ 13 ກັນຍາ 2019 ທີ່ຫ້ອງວ່າການສຳນັກງານນາຍົກລັດຖະມົນຕີ, ບໍລິສັດ ຊີງຍີ (ລາວ) ພັດທະນາ ບໍ່ແຮ່ ຈຳກັດ ໄດ້ມອບເງິນຊ່ວຍເຫຼືອຜູ້ປະສົບໄພນໍ້າຖ້ວມ ຈຳນວນ 100.000.000 ກີບ, ຊຶ່ງກ່າວມອບໂດຍທ່ານ ເສີນ ຈົງຮັນ, ປະທານບໍລິສັດ ແລະ ກ່າວຮັບ ແມ່ນທ່ານ ເພັດ ພົມພິພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ໂດຍມີພະນັກງານທີ່ກ່ຽວຂ້ອງ ຂອງຫ້ອງວ່າ ການສຳນັກງານນາຍົກລັດຖະມົນຕີ ແລະ ບໍລິສັດ ດັ່ງກ່າວ ເຂົ້າຮ່ວມ.
ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວຂອບ ໃຈ ຕໍ່ບໍລິສັດ ທີ່ໄດ້ປະກອບສ່ວນ ໃຫ້ການຊ່ວຍ ເຫຼືອປະຊາຊົນຜູ້ປະສົບໄພນໍ້າຖ້ວມ ໃນຄັ້ງນີ້. ເງິນຊ່ວຍເຫຼືອດັ່ງກ່າວຈະໄດ້ນຳໄປມອບໃຫ້ກະ ຊວງແຮງງານ ແລະ ສະຫວັດດີການສັງຄົມເພື່ອ ນຳໄປຊ່ວຍເຫຼືອບັນເທົາທຸກ ແກ່ຜູ້ປະສົບໄພນໍ້າຖ້ວມໃນປີນີ້ ແລະ ຢ່າງຍິ່ງຫວັງວ່າ ການຊ່ວຍເຫຼືອດັ່ງກ່າວ ຈະປະກອບສ່ວນເຮັດໃຫ້ການແກ້ໄຂໄພພິບັດ ກໍ່ຄືຜົນກະທົບຕໍ່ຊີວິດການເປັນຢູ່ຂອງປະຊາຊົນ ທີ່ປະສົບໄພນໍ້າຖ້ວມ ຢູ່ທ້ອງຖິ່ນຕ່າງໆ ໃນຂອບເຂດທົ່ວປະເທດ ໄດ້ຮັບການແກ້ເປັນຢ່າງດີ. ພ້ອມກັນນັ້ນ, ທ່ານ ໄດ້ຍັງອວຍພອນໃຫ້ ທຸລະກິດ ຂອງບໍລິສັດ ດັ່ງກ່າວຈົ່ງນັບມື້ເຕີບໃຫຍ່ຂະຫຍາຍຕົວ ແລະ ປະສົບຜົນສຳເລັດຕາມຈຸດປະສົງ ແລະ ລະດັບ ຄາດໝາຍທີ່ວາງໄວ້ ໃນແຕ່ລະໄລຍະ.
ຂ່າວ-ພາບ: ຫ້ອງການ ສນຍ
