Vientiane Times Lao
ບໍ​ລິ​ສັດລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ ​ສະ​ໜັບ​ສະ​ໜູນ​ວຽກ​ງານ​ປົກ​ປັກ​ຮັກ​ສາ​ມໍ​ລະ​ດົກ​​ວັດ​ທະ​ນະ​ທຳລາວ

ບໍ​ລິ​ສັດລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ ​ສະ​ໜັບ​ສະ​ໜູນ​ວຽກ​ງານ​ປົກ​ປັກ​ຮັກ​ສາ​ມໍ​ລະ​ດົກ​​ວັດ​ທະ​ນະ​ທຳລາວ

ບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ ບໍ່​ຄຳທອງ​ເຊ​ໂປນ ເມື່ອບໍ່​ດົນ​ມາ​ນີ້ ໄດ້​ມອບ​ຕູ້​ວາງ​ສະ​ແດງ ລວມ​ມູນ​ຄ່າ 25.000 ໂດ​ລາສະ​ຫະ​ລັດ ໃຫ້​ແກ່ຫໍ​ພິ​ພິທະ​ພັນ​ແຫ່ງ​ຊາດ​ລາວ ທີ່​ນະ​ຄອນຫຼວງວຽງ​ຈັນ, ຫໍ​ພິ​ພິ​ທະ​ພັນ ​ແຂວງ​ສະ​ຫວັນ​ນະ​ເຂດ ແລະ ຫໍ​ວັດ​ທະ​ນະ​ທຳ ເມືອງວິ​ລະ​ບູ​ລີ.

ອີງຕາມແຫຼ່ງຂ່າວຈາກບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ, ການ​ປະ​ກອບ​ສ່ວນໃນ​ຄັ້ງ​ນີ້​ແມ່ນແນ​ໃສ່​ປົກ​ປັກ​ຮັກ​ສາ ແລະ ສືບ​ຕໍ່​ສົ່ງ​ເສີມ​ວັດ​ຖຸ​ບູ​ຮານ​ທີ່​ຄົ້ນ​ພົບ​ຢູ່ໃນ​ເຂດ​ຂຸດ​ຄົ້ນບໍ່​ຄຳທອງ​ເຊ​ໂປນ ໃນ​ເຂດເມືອງວິ​ລະ​ບູ​ລີ, ແຂວງ​ສະ​ຫວັນ​ນະ​ເຂດ. ການສຶກສາ-ຄົ້ນຄວ້າບູຮານຄະດີນີ້ ແມ່ນເປັນ 1 ໃນຜົນງານທີ່ພົ້ນເດັ່ນໃນ​ບັນ​ດາ​ໂຄງ​ການທີ່ໄດ້​ມີ​ການສະໜັບສະໜູນ ຈ​າກບໍ​ລິ​ສັດດັ່ງກ່າວ​ທີ່​ໄດ້​ສືບ​ຕໍ່​ປະ​ຕິ​ບັດ​ມາໄດ້ກວ່າ 1 ທົດສະວັດແລ້ວ.

ໃນ​ເດືອນ​ ກັນ​ຍາ 2019, ທາງ​ບໍ​ລິ​ສັດ ດັ່ງກ່າວໄດ້ມອບວັດຖຸບູຮານກວ່າ 7.800 ລາຍການໃຫ້ແກ່ລັດຖະບານ ​ລວມ​ມີ: ວັດຖຸບູຮານປະ​ເພດທອງ, ທອງແດງ, ​ຫີນ​ປະ​ດັບ​​ເອ້, ເຄື່ອງປັ້ນດິນເຜົາ ແລະ ໄມ້, ເຊິ່ງລ້ວນແຕ່ໄດ້ຄົ້ນພົບໂດຍ​ບໍ​ລິ​ສັດ ຢູ່ໃນ​ເຂດ​ຂຸດ​ຄົ້ນບໍ່ຄຳ-ທອງເຊໂປນ. ວັ​ດ​ຖຸ​ບູ​ຮານ​ທີ່​ໄດ້​ຄົ້ນ​ພົບ ແລະ ມອບ​ໃຫ້​ລັດ​ຖະ​ບານ ເປັນ​ການເພີ່ມຄວາມອຸ​ດົມສົມບູນໃຫ້ແກ່ວັດຖຸບູຮານ​ຂອງກ່ອນສະໄໝປະຫວັດສາດ.

ທ່ານ ສະ​ໝານ ອະ​ເນ​ກາ, ຜູ້​ອຳ​ນວຍ​ການ ​ໃຫ​ຍ່ ແລະ ຜູ້​ຈັດ​ການ​ພະ​ແນກ​ພົວ​ພັນ​ກັບ ​ຜູ້​ມີ​ສ່ວນ​ຮ່ວມ ແລະ ຊຸມ​ຊົນ ຂອງບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ ໄດ້ກ່າວ​ວ່າ: “ບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ​ ມີ​ຄວາມ​ພາກ​ພູມ​ໃຈ​ເປັນ​ຢ່າງຍິ່ງທີ່​ໄດ້​ເປັນສ່ວນ​ໜຶ່ງ​ປະ​ກອບ​ສ່ວນ​ຕໍ່​ການ​ສະ​ໜັບ​ສະ​ໜູນພ້ອມ​ທັງ​ການປົກ​ປັກ​ຮັກ​ສາມໍ​ລະ​ດົກວັດ​ທະ​ນະ​ທຳ​ແຫ່ງ​ຊາດ ແລະ ດຶງ​ດູງ​ນັກ​ທ່ອງທ່ຽ​ວເຂົ້າ​ມາ​​ລາວ. ​ທາງ​ບໍ​ລິ​ສັດ​ພວກ​ເຮົາ ໝາຍ​ໝັ້ນ​ທີ່​ຈະ​ເປັນ​ຕົ້ນ​ແບບທາງ​ດ້ານ​ການ ​ຂຸດ​ຄົ້ນ​ບໍ່​ແຮ່​ທີ່​ປະ​ຕິ​ບັດ​ໄປ​ຄຽງ​ຄູ່​ກັບ​ການເຄົາ​ລົບ​ນັບ​ຖື​ມໍ​ລະ​ດົກວັດ​ທະ​ນະ​ທຳ​ທ້ອງ​ຖິ່ນ​ຂອງ​ປະ​ເທດ​ເຈົ້າ​ພາບ.”

ທ່ານ ທອງ​ໃບ ໂພ​ທິ​ສານ, ຫົວ​ໜ້າ​ກົມ​ມໍ​ລະດົກ ໄດ້​ກ່າວ​ວ່າ: “ການ​ຮ່ວມ​ມືລະ​ຫວ່າງ ບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ ແລະ ກົມ​ມໍ​ລະ​ດົກເປັນ​ການ​ຮ່ວມ​ມື​ທີ່​ສູງ​ສົ່ງ. ເປັນ​ການ​ຊ່ວຍ​ເຫຼືອ​ຈາກ​ບໍ​ລິ​ສັດທີ່ມີ​ຄຸນ​ຄ່າ​ສູງ ແລະ ມີ​ຄວາມ​ສຳ​ຄັນ​ທີ່​ສຸດເພື່ອ​ເຜີຍ​ແຜ່​ມໍ​ລະ​ດົກ​ດ້ານ​ວັດ​ທະ​ນະ​ທຳ​ໃຫ້​ປະ​ຊາ​ຊົນ​ລາວກໍ​ຄືນັກ​ທ່ອງ​ທ່ຽວ. ​ວັດ​ຖຸ​ບູ​ຮານ​ທີ່​ຄົ້ນ​ພົບເຫຼົ່າ​ນີ້ແມ່ນປຽບ​ດັ່ງ ‘ຄຳ’. ທັງ​ນີ້​ກໍ່ຍ້ອນ​ວ່າ ວັດ​ຖຸ​ດັ່ງ​ກ່າວ ໄດ້ເປັນ​ທັງ​ຄຸນ​ຄ່າ​ທາງ​ດ້ານ​ເສດ​ຖະ​ກິດ ແລະ ຊື່​ສຽງ​ຂອງ​ຊາດລາວ, ນັກ​ທ່ອງ​ທ່ຽວ​ທີ່​ມາ​ເຫັນ​ກໍ່ ສາ​ມາດ​ເວົ້າ​ຕໍ່ໆ​ກັນໄປ ແລະ ຢາກ​​ກັບມາ​ຢ້ຽມ​ຢາມ​​ຕົ້ນ​ກຳ​ເນີດ​ຂອງວັດ​ຖຸ​ທີ່ມີ​ຄຸນ​ຄ່າ​ເຫຼົ່າ​ນີ້.”

ໃນຜ່ານມາແມ່ນໄດ້ມີການຄົ້ນພົບວັດຖຸບູຮານສຳຄັນຫຼາຍຢ່າງຢູ່ບໍ່ຄຳ-ທອງເຊໂປນໃນບໍ​ລິ​ເວນເມືອງວິລະບູລີ, ແຂວງສະຫວັນນະເຂດ ເຊິ່ງໃນນັ້ນ, ​ໃນ​ທ້ອງເດືອນມີນາ ຂອງ ​ສົກ​ປີ 2018, ທີມງານນັກບູຮານຄະດີກໍໄດ້ ຄົ້ນພົບຫຼັກຖານທີ່​ເປັນໄມ້ຄ້ຳຫລຸມບໍ່ແຮ່-ບູ ຮານຫຼາຍກວ່າ 200 ຂຸມ ທີ່ມີອາຍຸຫຼາຍກວ່າ 3.000 ປີ.

ຂ່າວ: ວຽງຈັນທາຍ

ພາບ: ບໍ​ລິ​ສັດ ບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ