ເຈົ້າໜ້າທີ່ ປກສ ເມືອງຄູນຄໍາ ແຂວງຄໍາມ່ວນ ໄດ້ຢຶດກັນຊາອັດແທ່ງ ຈໍານວນ 9 ເປົາ ຊຶ່ງມີນໍ້າໜັກ 352 ກິໂລກຣາມ ພ້ອມກັບຢາບ້າຈໍານວນໜຶ່ງ ແລະ ຜູ້ຕ້ອງຫາອີກ 2 ຄົນ ເມື່ອວັນທີ 15 ທັນວາ 2021 ຜ່ານມານີ້.
ເຈົ້າໜ້າທີ່ ປກສ ເມືອງຄູນຄໍາ ເປີດເຜີຍວ່າ: ພາຍຫຼັງທີ່ໄດ້ຮັບແຈ້ງຄວາມຈາກພົນລະເມືອງດີ ຈະມີການຂົນສົ່ງຢາເສບຕິດ ມາແຕ່ເມືອງຄໍາເກີດ ແຂວງບໍລິຄໍາໄຊ ໂດຍຜ່ານ ເມືອງຄູນຄໍາ ແຂວງຄໍາມ່ວນ, ເຈົ້າໜ້າທີ່ ປກສ ເມືອງ ຄູນຄໍາ ຈຶ່ງປະສານກັບພາກສ່ວນທີ່ກ່ຽວຂ້ອງ ລົງຕິດຕາມເປົ້າໝາຍດັ່ງກ່າວ ຈຶ່ງໄດ້ພົບເຫັນລົດກະບະ ຍີ່ຫໍ້ NISSAN ສີຂາວໝາຍເລກທະບຽນ ກກ 6855 ຄໍາມ່ວນ ໄດ້ຂັບຂີ່ມາແຕ່ທາງ ຫຼັກ 20 ເມືອງຄໍາເກີດ ແຂວງບໍລິຄໍາໄຊ ຈະມຸ້ງໜ້າໄປທາງແບ່ງບ້ານວຽງຄໍາ ເມືອງປາກກະດິງ ແຂວງບໍລິຄໍາໄຊ ແລະ ພໍມາຮອດປ້ອມສາມແຍກກອງລໍ ເຈົ້າໜ້າທີ່ຕໍາຫຼວດ ປກສ ເມືອງຄູນຄໍາ ຈຶ່ງໄດ້ສະກັດກັ້ນ ແລະ ກັກຕົວຜູ້ຂັບຂີ່ທັງ 2 ຄົນຢູ່ໃນລົດຄັນດັ່ງກ່າວ.
ຜ່ານການສືບສວນ-ສອບສວນເບື້ອງຕົ້ນ ໃຫ້ຮູ້ວ່າ: ຜູ້ຂັບຂີ່ຊື່ ທ້າວ ຄໍາຮອນ ອາຍຸ 36 ປີ ປະຈຸບັນຢູ່ບ້ານຫ້ວຍແກ້ວ ເມືອງຄໍາເກີດ ແຂວງບໍລິຄໍາໄຊ ແລະ ທ້າວ ສຸວັນໂນ ອາຍຸ 25 ປີ ຢູ່ບ້ານນາບົງ ເມືອງທ່າແຂກ ແຂວງຄໍາມ່ວນ ສ່ວນລົດແມ່ນອອກຊື່ ທ້າວ ສຸວັນໂນ,ຈາກນັ້ນຈຶ່ງໄດ້ສົ່ງຜູ້ຕ້ອງຫາ ພ້ອມດ້ວຍເຄື່ອງຂອງກາງຢາເສບຕິດ ປະເພດກັນຊາອັດແທ່ງ ຈໍານວນ ຈໍານວນ 9 ເປົາ, ຢາບ້າ ຈໍານວນ 12 ເມັດ ແລະ ລົດຄັນດັ່ງກ່າວ ມອບໃຫ້ກອງບັນຊາການ ປກສ ແຂວງຄໍາມ່ວນ ສືບຕໍ່ດໍາເນີນການສອບສວນຂະຫຍາຍຜົນຕາມຂັ້ນຕອນຂອງກົດໝາຍ.
ຂໍ້ມູນ: ປກສ
