Vientiane Times Lao
<strong>ປກສ ເມືອງຈັນທະບູລີ ຈັບຜູ້ຄ້າຂາຍຢາເສບຕິດລາຍໃຫຍ່ ພ້ອມດ້ວຍຢາບ້າ </strong><strong>5 </strong><strong>ແສນກວ່າເມັດ</strong>

ປກສ ເມືອງຈັນທະບູລີ ຈັບຜູ້ຄ້າຂາຍຢາເສບຕິດລາຍໃຫຍ່ ພ້ອມດ້ວຍຢາບ້າ 5 ແສນກວ່າເມັດ

ກຳລັງວິຊາສະເພາະ ປກສ ເມືອງຈັນທະບູລີ ນະຄອນຫຼວງວຽງຈັນ ເຂົ້າຈັບຕົວກຸ່ມຜູ້ຄ້າຂາຍຢາເສບຕິດກ່ອນ 1 ຄົນ ແລ້ວນຳໄປສອບສວນຜູ້ກ່ຽວໄດ້ຊັດທອດເຖິງຜູ້ຮ່ວມຂະບວນການ ອີກ​ 3 ຄົນ, ເຈົ້າໜ້າທີ່ຈິ່ງໄດ້ເລັ່ງຕິດຕາມຊອກຄົ້ນຈັບກຸມ ແລະ ກວດຄົ້ນເຄຫະສະຖານ ພົບເຫັນຂອງກາງຢາບ້າ 299 ມັດ ແລະ  4 ຖົງນ້ອຍ ຫຼື 598.690 ເມັດ ແລະ ສິ່ງເສບຕິດທີ່ຜິດກົດໝາຍອີກຫຼາຍລາຍການ ຈິ່ງໄດ້ນຳຕົວພວກກ່ຽວມາດໍາເນີນຄະດີ.

ພັທ ພົມມີ ແສນຈົງຮັກ ຫົວໜ້າພະແນກຕໍາຫຼວດ ປກສ ເມືອງຈັນທະບູລີ ໄດ້ລາຍງານໃນວັນທີ 29 ມິຖຸນາ 2022 ຜ່ານມານີ້ ວ່າ: ພາຍຫຼັງໄດ້ຮັບຂໍ້ມູນຈາກພົນລະເມືອງ ວ່າມີກຸ່ມຄົນຈໍານວນໜຶ່ງ ເຄື່ອນໄຫວຄ້າຂາຍຢາເສບຕິດ ຢູ່ເຂດເມືອງຈັນທະບູລີ. ຈາກນັ້ນ, ຈິ່ງໄດ້ນຳກຳລັງວິຊາສະເພາະ ລົງຕິດຕາມ ເຫັນວ່າມີຂໍ້ມູນຫຼັກຖານ ຮອດວັນທີ 10 ມິຖຸນາ 2022 ໄດ້ຈັບຕົວ ທ້າວ ວິລະພົນ  ອາຍຸ 21 ປີ ຢູ່ບ້ານຊຽງຢືນ ເມືອງຈັນທະບູລີ.

ຜ່ານການສອບສວນ ຜູ້ກ່ຽວຮັບສາລະພາບ ວ່າ: ໄດ້ຊື້-ຂາຍຢາບ້າ ມາແຕ່ປີ 2021 ຮ່ວມກັບ ທ້າວ ສຸກມີໄຊ, ມາຮອດວັນທີ 28 ມິຖຸນາ 2022 ຈຶ່ງໄດ້ເຂົ້າຈັບຕົວ ທ້າວ ສຸກມິໄຊ  ອາຍຸ 36 ປີ ແລະ ນາງ ນິດ ອາຍຸ 32 ປີ ຢູ່ບ້ານຊໍາເກດ ເມືອງສີໂຄດຕະບອງ ( ເປັນຜົວເມຍກັນ ) ຢູ່ຮ້ານຄາຣາໂອເກະແຫ່ງໜຶ່ງ ເຂດບ້ານນາໄຊ ເມືອງໄຊເສດຖາ.

ຈາກນັ້ນ ຈິ່ງຂໍຄໍາສັ່ງກວດຄົ້ນເຄຫະສະຖານ ຈາກອົງການໄອຍະການສານ ເຂດ III ແລ້ວໄດ້ສົມທົບກັບອຳນາດການປົກຄອງບ້ານຊຳເກດ, ປກສ ກຸ່ມໜອງບຶກ ແລະ ພາກສ່ວນກ່ຽວຂ້ອງ ເຂົ້າກວດຄົ້ນເຄຫະສະຖານ, ພົບເຫັນ ທ່າວ ຈ່ຽວຊ່າງເຫຼືອງ ອາຍຸ 36 ປີ, ເຊື້ອຊາດ, ສັນຊາດ ຫວຽດນາມ, ພົບ ຢາບ້າ 299 ມັດ ແລະ 4 ຖົງນ້ອຍ ຫຼື 598.690 ເມັດ, ເຄື່ອງປ້ຳຢາບ້າ ຈໍານວນ 1 ເຄື່ອງ, ຢາໄອສ 2 ຖົງໃຫຍ່, ສານເສບຕິດສີແດງ ຈໍານວນ 2 ຖົງໃຫຍ່, ສານເສບຕິດສີສົ້ມ ຈຳນວນ 1 ຖົງໃຫຍ່, ຜ່ານການສອບສວນ ພວກກ່ຽວ ຮັບສາລະພາບວ່າ, ຢາບ້າທີ່ກວດພົບແມ່ນຂອງພວກກ່ຽວແທ້ ເຊິງໄດ້ເລີ່ມຄ້າຂາຍຢາບ້າ ມາແຕ່ປີ 2021 ຈົນເຖິງປະຈຸບັນ.

ປະຈຸບັນ ກອງບັນຊາການ ປກສ ເມືອງຈັນທະບູລີ ພວມເລັ່ງສືບສວນ-ສອບສວນ ຂະຫຍາຍຜົນຫາກຸ່ມແກ້ງພັກພວກ ສືບຄົ້ນຫາຫົວໂປ່ໂຕການ ມາດໍາເນີນຄະດີ ຕາມຂັ້ນຕອນຂອງກົດໝາຍ.

ຂ່າວ: ປກວ ນວ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ