Vientiane Times Lao
ປກ​ສ ເມືອງ ຫາດ​ຊາຍ​ຟອງ ຈັບ​ຜູ້ຄ້າຂາຍ ຢາເສບຕິດລາຍໃຫຍ່ 2 ກຸ່ມພ້ອມຢຶດຂອງກາງ ຢາ​ບ້າ​ໄດ້ 66 ພັນ ເມັດ

ປກ​ສ ເມືອງ ຫາດ​ຊາຍ​ຟອງ ຈັບ​ຜູ້ຄ້າຂາຍ ຢາເສບຕິດລາຍໃຫຍ່ 2 ກຸ່ມພ້ອມຢຶດຂອງກາງ ຢາ​ບ້າ​ໄດ້ 66 ພັນ ເມັດ

ການ​ຊື້​ຂາຍ​ຢາ​ເສບ​ຕິດ​ ແມ່ນ ​ປະ​ກົດ​ການ​​ຍໍ້​ທໍ້​ໜຶ່ງຢູ່​ເມືອງ ຫາດ​ຊາຍ​ຟອງ ນະ​ຄອນຫຼວງວຽງ​ຈັນ ທີ່​ຍັງ​ບໍ່​ສາ​ມາດ​ແກ້​ໄຂ​ໄດ້ ເຖິງ​ແມ່ນ​ວ່າ ​ເຈົ້າ​ໜ້າ​ທີ່ຈະສຸມ​ໃສ່​ແກ້​ໄຂ​ບັນ​ຫາ​ດັ່ງ​ກ່າວ​ແລ້ວ​ກໍ່​ຕາມ​ແຕ່​ຍັງ​ພົບ​ເຫັນຜູ້​ຄ້າ​ຂາຍ​ຢາ​ເສບ​ຕິດ ​ລາຍ​ນ້ອຍລາຍ​ໃຫຍ່ປະ​ເພດ​ຢາ​ບ້າ​​ພາຍ​ໃນ​ເມືອງ​ຢູູ່ຊຶ່ງ ຫຼ້າ​ສຸດ​ເຈົ້າ​ໜ້າ​ທີ່​ກໍ່​ສາ​ມາດກວາດ​ລ້າງ​ຜູ້​ຄ້າ​ຂາຍ ​ຢາ​ເສບ​ຕິດ​ໄດ້​ 2 ກຸ່ມ​​ໃຫຍ່​ພ້ອມ​ຢຶດ​ຂອງ​ກາງ​ ຢາ​ບ້າ ຈຳນວນຫຼາຍ.

ພັຕ ທັດ​ສະ​ພົງ ຫວັນ​ມະ​ນີ​ຈັນ ຮອງຫົວໜ້າ​ກອງ​ບັນ​ຊາ​ການ ປກ​ສ ເມືອງຫາດຊາຍຟອງ ນະຄອນຫຼວງວຽງຈັນ ໄດ້​ແຈ້ງໃຫ້ຮູ້ວ່າ: ວັນ​ທີ່ 21 ມິ​ຖຸ​ນາ 2022 ນີ້ ໄດ້​ຮັບ​ແຈ້ງ​ການ​ເຄື່ອນ​ໄຫວ​ຄ້າ​ຂາຍ​ຢາ​ບ້າ​ຢູ່​ຮ້ານ​ອາ​ຫານ​ເຂດ​ບ້ານ ນາ​ໄຫ ແລະ ບ້ານ ດົງ​ໂພນ​ເລົາ ເມືອງ ຫາດ​ຊາຍ​ຟອງ ນະ​ຄອນຫຼວງວຽງ​ຈັນ, ຈາກ​ນັ້ນ​ເຈົ້າ​ໜ້າທີ່​ຈຶ່ງ​ໄດ້​ລົງ​ເກັບ​ກຳ​ຂໍ້​ມູນ​ເຫັນ​ວ່າ ມີ​ມູນຫຼັກ​ຖານ​ຈຶ່ງ​ເຂົ້າ​ແກ້​ໄຂ​ຄື: ວັນ​ທີ່ 15 ມິ​ຖຸ​ນາ 2022, ເວ​ລາ 22:00 ໂມງ ​ໄດ້​ເຂົ້າ​ແກ້​ໄຂ​ກຸ່ມ​ຄ້າ​ຢາ​ເສບ​ຕິດ​ຢູ່​ຮ້ານ​ອາ​ຫານ​ແຫ່ງ​ໜຶ່ງ​ຢູ່​ເຂດ ​ບ້ານ​ນາ​ໄຫ ສາ​ມາດ​ກັກ​ຜູ້​ຕ້ອງ​ສົງ​ໄສ 3 ຄົນ​ຄື: ທ້າວ ເກດ​ມະ​ນີ ອາ​ຍຸ 28ປີ ຢູ່​ບ້ານ ສີ​ຖານ​ໃຕ້, ທ້າວ ອາ​ເລັກ ອາ​ຍຸ 22ປີ ຢູ່​ບ້ານ ປາກ​ເປັ່ງ ແລະ ທ້າວ ເກມ ອາ​ຍຸ 21ປີ ຢູ່​ບ້ານ ປາກ​ເປັ່ງ, ທັງ3 ແມ່ນ​ຢູ່ ເມືອງ ຫາດ​ຊາຍ​ຟອງ ໃນ​ຂະ​ນະ​ທີ່​ເຈົ້າ​ໜ້າ​ທີ່​ເຂົ້າ​ຈັບ​ກຸມ​ຕົວ​ນັ້ນ​ກວດ​ພົບ​ຂອງ​ກາງ​ຢາ​ບ້າ 6.000 ເມັດ. 

ນອກ​ຈາກ​ນັ້ນ​ເວ​ລາ 09:45ໂມງ ຂອງວັນ​ທີ່ 17 ມິ​ຖຸ​ນາ 2022 ໄດ້​ສືບ​ຕໍ່​ແກ້​ໄຂ​ເປົ້າ​ໝາຍ​ຄ້າ​ຂາຍ​ຢາ​ເສບ​ຕິດ​ຢູ່​ບ້ານ ດົງ​ໂພນ​ເລົາ ອີກ​ຕື່ມ ຊຶ່ງ ສາ​ມາດ​ຈັບ​ຕົວ​ຜູ້​ຕ້ອງ​ສົງ​ໄສ​ໄດ້ 2 ຄົນ​ຄື: ທ້າວ ສັນ​ຕິ ອາ​ຍຸ 25ປີ, ເກີດ​ຢູ່​ບ້ານ ​ໄຊ​ສົມ​ບູນ ເມືອງ ອຸ​ທຸມ​ພອນ ແຂວງ ສະ​ຫວັນ​ນະ​ເຂດ ປະ​ຈຸ​ບັນ​ພັກ​ເຊົາ ຢູ່​ບ້ານ ສະ​ຫວ່າງ ເມືອງ ຫາດ​ຊາຍ​ຟອງ ແລະ ທ້າວ ດາ​ວັນ ອາ​ຍຸ 21 ປີ, ຢູ່​ບ້ານ ນາ​ຄຳແສນ ເມືອງ ໄຊ ແຂວງ ອຸ​ດົມ​ໄຊ ​ພ້ອມ​ທັງ​ກວດ​ພົບ​ຂອງ​ກາງ​ຢາ​ບ້າ 60.000 ເມັດ.

ປະ​ຈຸ​ບັນ ເຈົ້າ​ໜ້າ​ທີ່​ພວມ​ດຳ​ເນີນ​ການ​ສືບ​ສວນ-ສອບ​ສວນ ເພື່ອ​ຂະ​ຫຍາຍ​ຜົນ ຊອກ​ຫາ​ຜູ້​ຮ່ວມ​ຂະ​ບວນ​ການ​ມາ​ດຳ​ເນີນ​ຄະ​ດີ​ຕາມ​ຂັ້ນ​ຕອນ​ຂອງ​ກົດ​ໝາຍ.

ຂໍ້​ມູນ​ຈາກ: ປກ​ສ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ