Vientiane Times Lao
ປະຊາຊົນບ້ານໂສຍພວມພັດທະນາກ້າວຂຶ້ນຕາມທິດສາມສ້າງ

ປະຊາຊົນບ້ານໂສຍພວມພັດທະນາກ້າວຂຶ້ນຕາມທິດສາມສ້າງ

ປະຊາຊົນ ບ້ານໂສຍ ເມືອງວຽງໄຊ ແຂວງຫົວພັນ ພວມເລັ່ງໃສ່ພັດທະນາເສດຖະກິດຄອບຄົວພາຍໃນບ້ານເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ, ໂດຍປະຊາຊົນຍຶດຖືອາຊີບເຮັດນາປູກເຂົ້າເປັນຫຼັກ ພ້ອມທັງປູກພືດ, ລ້ຽງສັດ ແລະ ອື່ນໆ ເພື່ອສ້າງລາຍຮັບເພີ່ມ ແນໃສ່ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນຕາມທິດສາມສ້າງ.

ທ່ານ ຄຳເພັດ ວີລໍໄຊ, ເລຂາໜ່ວຍພັກບ້ານໂສຍໃຫ້ຮູ້ວ່າ: ນັບແຕ່ຮອງຮັບແຜນການກໍ່ສ້າງບ້ານສາມສ້າງມາແຕ່ປີ 2019, ຄະນະຊີ້ນໍາວຽກງານສາມສ້າງຂັ້ນເທິງໄດ້ສົ່ງພະນັກງານວິຊາການດ້ານຕ່າງໆລົງປະຈໍາຢູ່ບ້ານ ເພື່ອຊີ້ນໍາການຈັດຕັ້ງປະຕິບັດຕາມແຜນການຢ່າງໃກ້ສິດ ກັບປະຊາຊົນ, ຊຶ່ງເຮັດໃຫ້ປະຊາຊົນມີຄວາມກະຕືລືລົ້ນໃນການຊອກຮູ້, ເຊື່ອມຊຶມແນວທາງນະໂຍບາຍຂອງພັກຕໍ່ວຽກງານສາມສ້າງ, ໂດຍເລັ່ງໃສ່ພັດທະນາເສດຖະກິດຄອບຄົວພາຍໃນບ້ານໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ. ໂດຍສະເພາະ ຂັ້ນເທິງໄດ້ອຳນວຍຄວາມສະດວກ, ສົ່ງເສີມດ້ານທຶນຮອນໃຫ້ປະຊາຊົນໄດ້ກູ້ຢືມເພື່ອມາພັດທະນາເຂົ້າໃນການລ້ຽງສັດ ແລະ ປູກພືດເປັນສິນຄ້າ, ເປັນຕົ້ນແມ່ນລ້ຽງໄກ່ລາດ, ລ້ຽງໝູ, ປູກໝາກໂມ, ພືດຜັກຕ່າງໆ, ພ້ອມທັງການສົ່ງເສີມການຕໍ່າຫູກທໍໄໝ. ຜ່ານການຈັດຕັ້ງປະຕິບັດມາໄດ້ປີກວ່າ, ເຫັນວ່າບັນດາຄອບຄົວທີ່ໄດ້ກູ້ຢືມເງິນດັ່ງກ່າວມີລາຍຮັບເພີ່ມຂື້ນແຕ່ 2 ລ້ານກີບຂຶ້ນໄປ.

ທ່ານ ວັນທອນ ເລືອງມີໄຊ, ປະຊາຊົນບ້ານໂສຍ ເຊິ່ງເປັນຄອບຄົວໜຶ່ງທີ່ໄດ້ຮັບທຶນກູ້ຢືມໃນການສົ່ງເສີມວຽກງານສາມສ້າງເຂົ້າໃນການລ້ຽງໄກ່ລາດໃຫ້ສຳພາດວ່າ: ໃນປີ 2019 ຜ່ານມາ ໄດ້ຮັບທຶນກູ້ຢືມຈຳນວນ 5 ລ້ານກີບເຂົ້າໃນການລ້ຽງໄກ່ລາດ, ໂດຍໄດ້ຮັບການເຝິກອົບຮົມທາງດ້ານຄວາມຮູ້ກ່ຽວກັບເຕັກນິກເພີ່ມເຕີມຈາກຫ້ອງການກະສິກຳ ແລະ ປ່າໄມ້ເມືອງວຽງໄຊ ແລະ ໃນການລ້ຽງໄກ່ແບບເຄິ່ງທຳມະຊາດ ເຊິ່ງອາໃສວັດຖຸດິບພາຍໃນບ້ານເປັນອາຫານຫຼັກ ເຊັ່ນ: ມັນຕົ້ນ, ຮຳອ່ອນ, ຢວກກ້ວຍ ແລະ ອື່ນໆ, ຊຶ່ງມາຮອດປັດຈຸບັນສາມາດຂາຍໄກ່ອອກໄດ້ ຈຳນວນ 3 ຊຸດ, ສາມາດສ້າງກຳໄລ ໄດ້ 2-3 ລ້ານກີບ. ນອກນັ້ນ, ຍັງໄດ້ປູກໄມ້ໃຫ້ໝາກ, ປູກຫຍ້າລ້ຽງສັດປະເພດງົວ ແລະ ອື່ນໆ ອັນໄດ້ເຮັດໃຫ້ຊີວິດການເປັນຢູ່ຂອງຄອບຄົວນັບມື້ດີຂຶ້ນເປັນກ້າວໆ.

ປັດຈຸບັນ, ບ້ານໂສຍມີເນື້ອທີ່ນາປູກເຂົ້າທັງໝົດ 39 ຮຕ, ນຳໃຊ້ເຕັກນິກກ້າກີບດຽວ 100%, ສະມັດຕະພາບສະເລ່ຍ 5 ໂຕນ/ຮຕ, ຜົນຜະລິດໄດ້ 195 ໂຕນ/ປີ, ສະເລ່ຍໃສ່ຫົວຄົນໄດ້ 360 ກິໂລເຂົ້າເປືອກ/ຄົນ/ປີ ແລະ ສາມາດກຸ້ມກິນຕະຫຼອດປີ.

ຂ່າວ: ໄອແກ້ວ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ