Vientiane Times Lao
ປະຊາຊົນລາວຄວນປັບປຸງຊີວິດການເປັນຢູ່ແບບໃໝ່ໄດ້ແລ້ວກ່ອນທີ່ຈະສວາຍເກີນໄປ

ປະຊາຊົນລາວຄວນປັບປຸງຊີວິດການເປັນຢູ່ແບບໃໝ່ໄດ້ແລ້ວກ່ອນທີ່ຈະສວາຍເກີນໄປ

ພັກ, ລັດມີຄວາມພະຍາຍາມໃນການສະກັດກັ້ນ, ປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ເພື່ອປົກປ້ອງຊີວິດ ແລະ ຊັບສິນຂອງປະຊາຊົນ ໂດຍໄດ້ຈັດຫາວັກຊິນໃຫ້ໄດ້ຫຼາຍທີ່ສຸດເພື່ອມາສັກໃຫ້ປະຊາຊົນ ແລະ ໄດ້ວາງມາດຕະການຕ່າງໆໃນການປ້ອງກັນ ແຕ່ວ່າຍັງມີປະຊາຊົນຈໍານວນໜຶ່ງຍັງຖືເບົາຕໍ່ກັບມາດຕະການຕ່າງໆທີ່ທາງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ວາງອອກ ໂດຍບໍ່ໄດ້ສົນໃຈຕໍ່ຊີວິດຕົວເອງ, ບຸກຄົນອ້ອມຂ້າງ ແລະ ສະມາຊິກໃນຄອບຄົວ ຊຶ່ງສັງເກດເຫັນໄດ້ວ່າຍັງມີຜູ້ລະເມີດໃນແຕ່ລະວັນ ນອກນັ້ນຍັງມີການລະບາດຮອບໃໝ່ໃນຊຸມຊົນເປັນຈໍານວນຫຼາຍໂດຍສະເພາະຢູ່ນະຄອນຫຼວງວຽງຈັນ, ແຂວງຄໍາມ່ວນ, ສະຫວັນນະເຂດ ແລະ ແຂວງຈໍາປາສັກ ຈົນນໍາມາສູ່ການປິດບ້ານ, ປິດເມືອງ ແລະ ປິດແຂວງໃນປັດຈຸບັນນີ້ ນັ້ນກໍ່ເກີດຈາກບຸກຄົນຈໍານວນໜຶ່ງທີ່ບໍ່ເອົາໃຈໃສ່ຕໍ່ກັບມາດຕະ ການປ້ອງກັນພະຍາດດັ່ງກ່າວ ຈຶ່ງເຮັດໃຫ້ມີການແຜ່ລາມເປັນວົງກວ້າງໃນຊຸມຊົນ.

ການຕິດເຊື້ອພະຍາດໂຄວິດ-19 ໃນຊຸມຊົນສະເພາະ ຢູ່ນະຄອນຫຼວງວຽງຈັນພຽງ 3 ວັນນັບແຕ່ວັນທີ 18-20 ກັນຍາ 2021 ນີ້ມີຜູ້ຕິດເຊື້ອໃນຊຸມຊົນສູງເຖິງ 560 ຄົນ ຈຶ່ງໄດ້ເຮັດໃຫ້ອໍານາດການປົກຄອງນະຄອນຫຼວງວຽງຈັນ ປິດການເຂົ້າ-ອອກພາຍໃນນະຄອນຫຼວງວຽງຈັນເປັນເວລາ 12 ວັນນັບແຕ່ວັນທີ 19-30 ກັນຍາ 2021 ນີ້ ຢູ່ 4 ເມືອງໃນຄື: ເມືອງຈັນທະບູລີ, ສີໂຄດຕະບອງ, ສີສັດຕະນາກ ແລະ ເມືອງໄຊເສດຖາ ແລະ ບາງສ່ວນຂອງ 3 ເມືອງນອກຄື: ເມືອງໄຊທານີ (ປິດແຕ່ຂົວທ່າງ່ອນເຂົ້າມາ), ເມືອງຫາດຊາຍຟອງ (ປິດແຕ່ສວນວັດທະນະທໍາຊຽງຄວນເຂົ້າມາ), ເມືອງນາຊາຍທອງ (ປິດແຕ່ບ້ານສີເກີດເຂົ້າມາ) ຍົກເວັ້ນຜູ້ທີ່ມີຄວາມຈໍາເປັນ ແລະ ໄດ້ຮັບອະນຸຍາດຈາກຄະນະສະເພາະກິດຂັ້ນສູນກາງ ແລະ ນະຄອນຫຼວງວຽງຈັນ.

ຂ່າວ: ວຽງຈັນທາຍ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ