Vientiane Times Lao
ປະຊາຊົນ ເຂດພາກເໜືອ ແລະ ພາກກາງ ກຽມຮັບມືກັບພາຍຸເຂດຮ້ອນ ລູກໃໝ່

ປະຊາຊົນ ເຂດພາກເໜືອ ແລະ ພາກກາງ ກຽມຮັບມືກັບພາຍຸເຂດຮ້ອນ ລູກໃໝ່

ພາຍຸໝຸນເຂດຮ້ອນ ລູກໃໝ່ ຊື່ວ່າ ກົມປາສຸ (KOMPASU) ຫົວທີ 18 ຈະເລີ່ມພັດຜ່ານປະເທດລາວໃນລະຫວ່າງວັນທີ 14 ຫາ 15 ຕຸລາ 2021 ຊຶ່ງຈະເຮັດໃຫ້ຝົນຕົກໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນເຂດພາກເໜືອດ້ານຕາເວັນອອກ ແລະ ພາກກາງຂອງປະເທດລາວ ເຊັ່ນ: ແຂວງ ຫົວພັນ, ຊຽງຂວາງ, ໄຊສົມບູນ, ວຽງຈັນ, ນະຄອນຫຼວງວຽງຈັນ, ໄຊຍະບູລີ, ບໍລິຄໍາໄຊ ແລະ ຄໍາມ່ວນ ຊຶ່ງປະຈຸບັນ ພາຍຸເຂດຮ້ອນດັ່ງກ່າວ ພວມເຄື່ອນທີ່ໃນທິດຕາເວັນຕົກ ດ້ວຍຄວາມໄວ 25 ກິໂລແມັດຕໍ່ຊົ່ວໂມງ ໂດຍຈະເຄື່ອນທີ່ຜ່ານເກາະໄຮໜໍາ ແລະ ຈະສືບຕໍ່ເຄື່ອນທີ່ຂຶ້ນຝັ່ງທາງພາກເໜືອຂອງປະເທດຫວຽດນາມ ໃນຕອນແລງຂອງວັນທີ 14 ຕຸລາ 2021.

ດັ່ງນັ້ນ, ກົມອຸຕຸນິຍົມ ແລະ ອຸທົກກະສາດ ຈຶ່ງໄດ້ແຈ້ງເຕືອນເມຶ່ອບໍ່ດົມານີ້ ເຖິງປະຊາຊົນບັນດາເຜົ່າຢູ່ເຂດດັ່ງກ່າວ ໂດຍສະເພາະຜູ້ທີ່ອາໄສ ຢູ່ລຽບຕາມຮ່ອມພູ ແລະ ແຄມແມ່ນ້ໍາຕ່າງໆ ໃຫ້ລະວັງສະພາບອາກາດດັ່ງກ່າວ ຊຶ່ງອາດຈະເກີດນໍ້າຖ້ວມຊຸ, ນ້ຳຖ້ວມຍື່ງ ແລະ ສະພາບດິນເຈື່ອນ ທີ່ຈະເກີດຂຶ້ນໄດ້ໃນໄລຍະນີ້, ພ້ອມທັງກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ສູງ ແລະ ປອດໄພ.

ກົມອຸຕຸນິຍົມ ແລະ ອຸທົກກະສາດ ແຈ້ງໃຫ້ຮູ້ຕື່ມວ່າ: ໄລຍະວັນທີ 13 ຫາ 14 ຕຸລາ 2021 ຈະມີຝົນຕົກປານກາງ ຫາ ຕົກໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນ ແຂວງພາກກາງ ແລະ ພາກເໜືອ ເຊັ່ນ: ແຂວງສະຫວັນນະເຂດ, ຄໍາມ່ວນ, ບໍລິຄໍາໄຊ, ໄຊສົມບູນ, ວຽງຈັນ, ນະຄອນຫຼວງວຽງຈັນ, ໄຊຍະບູລີ, ບໍ່ແກ້ວ, ຫຼວງນໍ້າທາ, ອຸດົມໄຊ, ຫຼວງພະບາງ, ຊຽງຂວາງ ແລະ ຫົວພັນ ແລະ ໄລຍະວັນທີ 15 ຫາ 16 ຕຸລາ 2021 ຈະມີຝົນຕົກປານກາງ ຫາ ໜັກຫຼາຍ ພ້ອມມີລົມພັດແຮງຢູ່ບາງທ້ອງຖິ່ນ ໃນແຕ່ລະພາກຂອງປະເທດລາວ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ