Visit BigblueAgency
ປະທານປະເທດແຫ່ງ ສປປ ລາວ ພົບປະສົມເດັດ ເຈົ້າຈັກກະພັດຍີ່ປຸ່ນ

ປະທານປະເທດແຫ່ງ ສປປ ລາວ ພົບປະສົມເດັດ ເຈົ້າຈັກກະພັດຍີ່ປຸ່ນ

ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ເຂົ້າພົບປະ ສົມເດັດເຈົ້າຈັກກະພັດ  ນາຣຸຮິໂຕະ ແຫ່ງປະເທດຍີ່ປຸ່ນ ເມຶ່ອວັນທີ 25 ພຶດສະພາ 2023 ທີ່ຜ່ານມານີ້, ເນື່ອງໃນໂອກາດເດີນທາງໄປເຂົ້າຮ່ວມກອງປະຊຸມສາກົນ ວ່າດ້ວຍອະນາຄົດຂອງອາຊີ ຄັ້ງທີ 28 ທີ່ຈັດຂຶ້ນໃນລະຫວ່າງ ວັນທີ 25-26 ພຶດສະພາ 2023 ທີ່ ນະຄອນຫຼວງໂຕກຽວ, ປະເທດຍີ່ປຸ່ນ.

ໂອກາດນີ້, ສົມເດັດເຈົ້າຈັກກະພັດ ນາຣຸຮິໂຕະ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ທີ່ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ນໍາພາຄະນະຜູ້ແທນເດີນທາງມາເຄື່ອນໄຫວວຽກງານ ແລະ ເຂົ້າຮ່ວມ ກອງປະຊຸມສາກົນ ວ່າດ້ວຍອະນາຄົດຂອງອາຊີ ຄັ້ງທີ 28, ທັງເປັນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ.

ພ້ອມກັນນີ້, ທ່ານ ປະທານປະເທດ ທອງລຸນ ສີສຸລິດ ຂໍຢືນຢັນຄືນຄຳໝາຍໝັ້ນ ແລະ ຄວາມປະສົງຢ່າງແຮງກ້າ ໃນການສືບຕໍ່ສານສາຍສຳພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ສປປ ລາວ ແລະ ຍີ່ປຸ່ນ ທີ່ດີຢູ່ແລ້ວນັ້ນ ໃຫ້ໄດ້ຮັບການສືບຕໍ່ພັດທະນາຂຶ້ນໄປເລື້ອຍໆ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ, ລວມທັງການປະກອບສ່ວນຢ່າງຕັ້ງໜ້າ ເພື່ອການຮ່ວມມື ແລະ ການພັດທະນາຂອງພາກພື້ນ ແລະ ສາກົນ; ໄລຍະຜ່ານມາເຫັນວ່າ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ໄດ້ຮັບການສົ່ງເສີມ ແລະ ພັດທະນາຂຶ້ນຢ່າງບໍ່ຢຸດຢັ້ງ, ການຮ່ວມມືໃນສາຍລັດ, ສາຍພັກ, ສາຍສະພາ ແລະ ສະມາຄົມມິດຕະພາບລະຫວ່າງສອງຝ່າຍ ກໍໄດ້ຮັບການຊຸກຍູ້ສົ່ງເສີມຢ່າງຕັ້ງໜ້າ, ປະຊາຊົນສອງຊາດມີຄວາມໃກ້ຊິດ ແລະ ສະໜິດສະໜົມ, ໃນເວລາປະສົບກັບໄພພິບັດທາງທຳມະຊາດ ກໍໄດ້ຊ່ວຍເຫຼືອເຊິ່ງກັນ ແລະ ກັນ ຢ່າງຕັ້ງໜ້າ ແລະ ທັນການ. ພ້ອມນີ້, ທ່ານໄດ້ຕາງໜ້າໃຫ້ປະຊາຊົນລາວທຸກຖ້ວນໜ້າ ສະແດງຄວາມຂອບໃຈມາຍັງ ລັດຖະບານ ແລະ ປະຊາຊົນຍີ່ປຸ່ນ ທີ່ຍາມໃດກໍໄດ້ໃຫ້ການຊ່ວຍເຫຼືອສະເໝີຕົ້ນສະເໝີປາຍ, ອັນໄດ້ເປັນການສະໜັບສະໜູນ ສປປ ລາວ ຢ່າງຕັ້ງໜ້າໃນການຈັດຕັ້ງປະ ຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃຫ້ສຳເລັດຕາມຄາດໝາຍ ເປັນແຕ່ລະໄລຍະ ໂດຍສະເພາະ ການສະໜັບສະໜູນ ແລະ ຊ່ວຍເຫຼືອ ສປປ ລາວ ໃນການພັດທະນາຊັບພະຍາກອນມະນຸດ, ສາທາລະນະສຸກ, ໂຄງລ່າງພື້ນຖານ, ກະສິກຳ-ປ່າໄມ້, ການເກັບກູ້ລະເບີດບໍ່ທັນແຕກ (UXO) ແລະ ອື່ນໆ, ລວມທັງການຊ່ວຍເຫຼືອ ສປປ ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19 ຢ່າງທັນການ. ໃນນັ້ນ, ການຊ່ວຍເຫຼືອທີ່ລັດຖະບານ ແລະ ປະຊາຊົນ ຍີ່ປຸ່ນ ໃຫ້ແກ່ ສປປ ລາວ ເພື່ອພັດທະນາຊັບພະຍາກອນມະນຸດ ແມ່ນຂະແໜງໜຶ່ງທີ່ເປັນບູລິມະສິດສຳຄັນຂອງ ສປປ ລາວ, ນັກສຶກສາລາວຈຳນວນຫຼາຍທີ່ໄດ້ສຳເລັດການສຶກສາ ທີ່ມີຄຸນນະພາບສູງຈາກປະເທດຍີ່ປຸ່ນ ໄດ້ກັບຄືນປະເທດ ແລະ ປະກອບສ່ວນອັນສໍາຄັນໃນການຮັບໃຊ້ປະເທດຊາດ ກໍຄື ການພັດທະນາອົງກອນ ແລະ ຂະແໜງການຕ່າງໆຂອງລາວ ເຊິ່ງລັດຖະມົນຕີກະຊວງສຶກສາທິການ ແລະ ກິລາ ແລະ ລັດຖະມົນຕີກະຊວງສາທາລະນະສຸກຂອງລາວຄົນປັດຈຸບັນ ລ້ວນແລ້ວແຕ່ແມ່ນບັນດາອະດີດນັກສຶກສາລາວ ຈາກປະເທດຍີ່ປຸ່ນ.

ພ້ອມກັນນັ້ນ, ເຫັນວ່າ ປັດຈຸບັນ ການລົງທຶນຂອງພາກທຸລະກິດຍີ່ປຸ່ນ ຢູ່ ສປປ ລາວ ມີທ່າອ່ຽງເພີ່ມຂຶ້ນ, ໂດຍສະເພາະ ການລົງທຶນດ້ານກະສິກຳ, ອຸດສາຫະກໍາປຸງແຕ່ງ ແລະ ການບໍລິການ ເຊິ່ງແມ່ນການລົງທຶນທີ່ມີຄຸນນະພາບສູງ ອັນໄດ້ປະກອບສ່ວນສຳຄັນເຂົ້າໃນການພັດທະນາ ສປປ ລາວ ໂດຍສະເພາະ ການສ້າງອາຊີບໃຫ້ແກ່ປະຊາຊົນລາວ; ນອກຈາກນັ້ນ, ຍັງເຫັນວ່າມີຫຼາຍຂະແໜງການທີ່ເປັນທ່າແຮງໃນການຊຸກຍູ້ການລົງທຶນທີ່ມີຄຸນນະພາບສູງຂອງຍີ່ປຸ່ນ ຢູ່ ສປປ ລາວ ເປັນຕົ້ນແມ່ນ ການພັດທະນາການທ່ອງທ່ຽວ ເຊິ່ງສອງຝ່າຍມີການພົວພັນ ແລະ ການຮ່ວມມືໃນລະດັບດີທີ່ສຸດ, ອັນໄດ້ເຮັດໃຫ້ປະຊາຊົນສອງຊາດມີການພົວພັນ ແລະ ການຮ່ວມມືທີ່ດີເຊັ່ນດຽວກັນ, ເຊິ່ງສະແດງອອກຢູ່ບ່ອນວ່າມີນັກທ່ອງທ່ຽວຂອງຍີ່ປຸ່ນ ສົນໃຈເຂົ້າໄປທ່ອງທ່ຽວຢູ່ລາວ ເພີ່ມຂຶ້ນ ພາຍຫຼັງການແຜ່ລະບາດຂອງ ພະຍາດໂຄວິດ-19 ຜ່ອນຄາຍລົງຫຼາຍ, ລວມທັງປະຊາຊົນລາວ ກໍມີຄວາມສົນໃຈຢາກມາທ່ອງທ່ຽວ ຢູ່ປະເທດຍີ່ປຸ່ນ ເພີ່ມຂຶ້ນເຊັ່ນດຽວກັນ. ສະນັ້ນ, ຈຶ່ງມີຄວາມຈຳເປັນໃນການຮ່ວມມືກັນເພື່ອອໍານວຍຄວາມສະດວກ ແລະ ສ້າງເງື່ອນໄຂໃນການສົ່ງເສີມການໄປມາຫາສູ່ເຊິ່ງກັນ ແລະ ກັນ ໃຫ້ຫຼາຍຂຶ້ນ ເປັນຕົ້ນ ການປະຕິບັດຖ້ຽວບິນໂດຍກົງນຳກັນ ເພື່ອຈັດຕັ້ງປະຕິບັດສົນທິສັນຍາທາງອາກາດສອງຝ່າຍ ລາວ-ຍີ່ປຸ່ນ ໃຫ້ເປັນຮູບປະທໍາເທື່ອລະກ້າວ

ທ່ານປະທານປະເທດ ຍັງໄດ້ກ່າວອີກວ່າ: ໃນປີ 2025 ທີ່ຈະມາເຖິງນີ້, ສອງປະເທດ ສປປ ລາວ ແລະ ຍີ່ປຸ່ນ ພວກເຮົາຈະໄດ້ພ້ອມກັນສະເຫຼືມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 70 ປີ (05 ມີນາ 1955), ຈຶ່ງສະແດງຄວາມຫວັງວ່າ ຈະມີໂອກາດໄດ້ຮັບຕ້ອນ ສົມເດັດ ຫຼື ພະບໍລົມວົງສານຸວົງ ຢ້ຽມຢາມ ສປປ ລາວ ຂອງພວກຂ້າພະເຈົ້າ ອັນຈະເປັນການສືບຕໍ່ ແລະ ເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມໃຫ້ຈະເລີນງອກງາມຍິ່ງໆຂຶ້ນໄປ.

ຂໍ້ມູນ-ພາບ: ອຸໄທລັດ

Related Articles

Leave a Reply