ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຍື່ນສານຕາຕັ້ງຂອງບັນດາທູດແຕ່ງຕັ້ງຕ່າງປະເທດ ຈາກ 3 ປະເທດ ເພື່ອດໍາລົງຕໍາແໜ່ງ ເປັນເອກອັກຄະລັດຖະທູດວິສາມັນ ຜູ້ມີອໍານາດເຕັມ ປະຈໍາ ສປປ ລາວ, ພ້ອມດຽວກັນນັ້ນ ກໍໄດ້ມອບສານຕາຕັ້ງ ໃຫ້ແກ່ບັນດາທູດແຕ່ງຕັ້ງ ຂອງ ສປປ ລາວ 2 ທ່ານ ເພື່ອໄປປະຈຳຢູ່ຕ່າງປະເທດ, ໃນວັນທີ 30 ກັນຍາ 2024 ທີ່ສະພາແຫ່ງຊາດ ນະຄອນຫຼວງວຽງຈັນ ຊຶ່ງມີລາຍລະອຽດ ດັ່ງນີ້:
ທ່ານ ປະທານປະເທດ ໄດ້ຮັບການເຂົ້າຍື່ນສານຕາຕັ້ງຂອງ ທ່ານ ຫງວຽນ ມິງ ເຕິມ (Nguyen Minh Tam) ເອກອັກຄະລັດຖະທູດ ແຕ່ງຕັ້ງ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ປະຈໍາ ສປປ ລາວ, ມີສຳນັກງານຕັ້ງຢູ່ ນະຄອນຫຼວງວຽງຈັນ; ໄດ້ຮັບການເຂົ້າຍື່ນສານຕາຕັ້ງຂອງ ທ່ານ ມາກ ການລາເຮີ (Mark Gallagher) ເອກອັກຄະລັດຖະທູດ ແຕ່ງຕັ້ງ ແຫ່ງ ສະຫະພາບ ເອີຣົບ ປະຈໍາ ສປປ ລາວ, ມີສຳນັກງານຕັ້ງຢູ່ ນະຄອນຫຼວງວຽງຈັນ ແລະ ໄດ້ຮັບການເຂົ້າຍື່ນສານຕາຕັ້ງ ຂອງ ທ່ານ ດາບາ ເດເບເລ່ ຮຸນເດ (DABA DEBELE HUNDE) ເອກອັກຄະລັດຖະທູດ ແຕ່ງຕັ້ງ ແຫ່ງ ສາທາລະນະລັດ ປະຊາທິປະໄຕ ສະຫະພັນ ເອທິໂອປີ ປະຈໍາ ສປປ ລາວ, ມີສຳນັກງານຕັ້ງຢູ່ ໂຕກຽວ ປະເທດຍີ່ປຸ່ນ.
ໃນວັນດຽວກັນ, ທ່ານ ປະທານປະເທດ ກໍໄດ້ມອບສານຕາຕັ້ງໃຫ້ແກ່ບັນດາທູດ ແຕ່ງຕັ້ງ ຂອງ ສປປ ລາວ ເພື່ອໄປປະຈຳຢູ່ຕ່າງປະເທດ 2 ທ່ານ ຄື: ມອບສານຕາຕັ້ງ ໃຫ້ທ່ານ ດາວວີ ວົງໄຊ ເອກອັກຄະລັດຖະທູດ ຜູ້ຕາງໜ້າຖາວອນ ແຫ່ງ ສປປ ລາວ ປະຈຳຫ້ອງການສະຫະປະຊາຊາດ ແລະ ການຈັດຕັ້ງສາກົນ ອື່ນໆ ທີ່ເຊີແນວ, ທັງເປັນເອກອັກຄະລັດຖະທູດ ແຫ່ງ ສປປ ລາວ ປະຈຳ ສະວິດ ພ້ອມທັງ ຮັບຜິດຊອບປະເທດ ອິຕາລີ, ເກຣັກ, ລິດເຕິນສະຕາຍ, ມານຕາ, ຕວັກກີ ແລະ ປະເທດ ໄຊປຣັດ; ມອບສານຕາຕັ້ງ ໃຫ້ທ່ານ ບຸນພຽງ ຈັນທະວົງ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສາທາລະນະລັດ ສະຫະພາບມຽນມາ.
ຂ່າວຈາກ: ກະຊວງການຕ່າງປະເທດ
