ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງໄຊສົມບູນ ເມື່ອມໍ່ໆມານີ້, ທ່ານ ຄຳພອຍ ຮຸ່ງບຸນຍວງ ເລຂາພັກແຂວງ ເຈົ້າແຂວງໄຊສົມບູນ ພ້ອມດ້ວຍຄະນະນຳຂອງແຂວງໃຫ້ການຕ້ອນຮັບ.
ເນື່ອງໃນໂອກາດດັ່ງກ່າວ, ທ່ານປະທານປະເທດ ພ້ອມຄະນະໄດ້ໄປຢ້ຽມຢາມ ພື້ນຖານເສດຖະກິດ, ວັດທະທະທຳ-ສັງຄົມ ຂອງແຂວງຈຳນວນໜຶ່ງ, ເປັນຕົ້ນໄດ້ຢ້ຽມຢາມສວນສະຕໍເບີຣີ ຂອງຄອບຄົວ ທ້າວ ຈໍຊົ້ງ ປະຊາຊົນຢູ່ບ້ານພູຫົວຊ້າງ ເມືອງອານຸວົງ , ມີເນື້ອທີ່ທັງໝົດ 2 ເຮັກຕາ, ສາມາດສ້າງລາຍຮັບໃຫ້ຄອບຄົວສະເລ່ຍປະມານ 8-10 ລ້ານກີບ/ເດືອນ ຊຶ່ງຖືວ່າເປັນໜໍ່ແໜງຂອງການຜະລິດກະສິກຳເປັນສິນຄ້າທີ່ຕິດພັນກັບການທ່ອງທ່ຽວ, ໄດ້ຢ້ຽມຊົມສວນສາທາລະນະຖໍ້າ ເຈົ້າອານຸວົງ ຊຶ່ງສະຖານທີ່ແຫ່ງນີ້ເປັນບ່ອນທ່ອງທ່ຽວທຳມະຊາດທີ່ຕິດພັນກັບຮ່ອງຮອຍປະຫວັດສາດທີ່ສຳຄັນຂອງຊາດ, ຫຼັງຈາກນັ້ນ ໄດ້ຢ້ຽມຢາມ ຫໍຫຼັກເມືອງ ແລະ ຕະຫຼາດໄຊສົມບູນ.
ໂອກາດດຽວກັນນີ້, ທ່ານ ປະທານປະເທດ ພ້ອມຄະນະ ຍັງໄດ້ຂຶ້ນພິຊິດຈອມພູເບ້ຍ ຊຶ່ງເປັນຈອມພູທີ່ສູງທີ່ສຸດຂອງປະເທດລາວ, ມີຄວາມສູງ 2.820 ແມັດ ຈາກລະດັບນໍ້າທະເລ, ໂດຍໄດ້ຮັບຂະໜານນາມວ່າເປັນ “ຫຼັງຄາຂອງປະເທດລາວ”, ມີຊີວະນາໆພັນອຸດົມສົມບູນ ແລະ ທີວທັດທຳມະຊາດທີ່ສວຍງາມ ຊຶ່ງກຳລັງໄດ້ຮັບການພັດທະນາໃຫ້ເປັນແຫຼ່ງທ່ອງທ່ຽວທາງທຳມະຊາດທີ່ສຳຄັນຂອງແຂວງ.
ການຢ້ຽມຢາມແຂວງໄຊສົມບູນຄັ້ງນີ້ ທ່ານປະທານປະເທດ ໄດ້ພົບປະເຮັດວຽກກັບຄະນະປະຈຳພັກແຂວງໄຊສົມບູນ ຊຶ່ງ ທ່ານ ຄຳພອຍ ຮຸ່ງບຸນຍວງ ໄດ້ລາຍງານກ່ຽວກັບການພັດທະນາເສດຖະກິດ-ສັງຄົມຂອງແຂວງ.
ແຫຼ່ງຂໍ້ມູນ: ຫ້ອງວ່າການສູນກາງພັກ
