Vientiane Times Lao
ປະທານສູນກາງແນວລາວສ້າງຊາດເນັ້ນໃຫ້ຊຽງຂວາງຮັບປະກັນຜົນສໍາເລັດການດຳເນີນກອງປະຊຸມສາມຂັ້ນພາຍໃນແຂວງ

ປະທານສູນກາງແນວລາວສ້າງຊາດເນັ້ນໃຫ້ຊຽງຂວາງຮັບປະກັນຜົນສໍາເລັດການດຳເນີນກອງປະຊຸມສາມຂັ້ນພາຍໃນແຂວງ

ປະທານສູນກາງແນວລາວສ້າງຊາດ ເນັ້ນໜັກໃຫ້ແຂວງຊຽງຂວາງແກ້ໄຂບັນຫາປະ ກົດການຫຍໍ້ທໍ້ໃນສັງຄົມ, ເອົາໃຈໃສ່ວຽກງານກວດກາສໍາມະໂນຄົວ ແລະ ຄຸ້ມຄອງຊາຍແດນ ເພື່ອຮັບປະກັນຄວາມສະຫງົບໃນໄລຍະດໍາເນີນ ກອງປະຊຸມໃຫຍ່ສາມຂັ້ນ ຂອງແຂວງທີ່ຈະມາຈັດຂຶ້ນໃນມໍ່ໆນີ້.

ທ່ານ ປອ. ໄຊ​ສົມ​ພອນ ພົມວິຫານ ປະທານສູນກາງແນວ ລາວສ້າງຊາດ ໄດ້​ເຂົ້າ​ຮ່ວມ​ກອງ​ປະຊຸມ​ພົບ​ປະ​ກັບ​ຄະນະ​ພັກ ຄະນະ​ປົກຄອງ, ແນວ​ລາວ​ສ້າງ​ຊາດແຂວງ, ອົງການ​ຈັດ​ຕັ້ງ​ມະຫາຊົນ ແລະ ສະຫະພັນ​ນັກຮົບ​ເກົ່າ​ຂອງແຂວງ​ຊຽງຂວາງ ໃນວັນ​ທີ 10 ກຸມພາ ທີ່​ຫ້ອງ​ວ່າການ​ປົກຄອງ​ແຂວງ.

ທ່ານ ປອ. ໄຊສົມພອນ ທັງເປັນຫົວໜ້າອະນຸກຳມະການ​ໂຄສະນາ ແລະ ຂະບວນ​ການ ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ ຄັ້ງ​ທີ XI ຂອງ​ພັກ, ໄດ້ສະແດງຄວາມຊົມເຊີຍຕໍ່ຜົນງານຂອງອົງການປົກຄອງແຂວງຍາດມາໄດ້ໃນໄລຍະຜ່ານມາ ໂດຍສະເພາະ ແມ່ນຜົນສຳເລັດໃນການຈັດຕັ້ງບັນດາແຜນງານຕ່າງໆທີ່ວາງອອກ.

ພ້ອມດຽວກັນນີ້,  ທ່ານຍັງໄດ້ເນັ້ນໜັກໃຫ້ແຂວງເອົາໃຈໃສ່ ແກ້ໄຂບັນຫາປະ ກົດການຫຍໍ້ທໍ້ໃນສັງຄົມໃຫ້ຫຼຸດຫນ້ອຍລົງ,  ເອົາໃຈໃສ່ວຽກງານກວດກາສໍາມະໂນຄົວ ແລະ ຄຸ້ມຄອງຊາຍແດນ, ເພື່ອເຮັດໃຫ້ຊາຍແດນມີສັນຕິພາບ, ເປັນຊາຍແດນມິດຕະພາບ ແລະ ການຮ່ວມມືພັດທະນາ ໂດຍສະ ເພາະ ແມ່ນໄລຍະຈະດໍາເນີນ ກອງປະຊຸມໃຫຍ່ສາມຂັ້ນ ຂອງແຂວງໃຫ້ມີຄວາມສະຫງົບ 100%.

ເອົາໃຈໃສ່ສືບຕໍ່ກະກຽມ ແລະ ດໍາເນີນກອງປະຊຸມໃຫຍ່ສາມຂັ້ນ ໃຫ້ມີຜົນສໍາເລັດຕາມລະດັບຄາດຫມາຍ ແລະ ຮັບປະກັນໃຫ້ມີຄວາມສະຫງົບ, ການດໍາເນີນກອງປະຊຸມໃຫຍ່ ແມ່ນມີຄວາມຫມາຍສໍາຄັນ ດ້ານຍຸດທະສາດ ໃນການກໍ່ສ້າງພັກ ແລະ ປັບປຸງພັກ, ເນື້ອແທ້ແມ່ນ ການປັບປຸງພາຍໃນພັກ, ດ້ານການແນວຄິດ-ການເມືອງ, ການຈັດຕັ້ງ ແລະ ແບບແຜນວິທີນໍາພາ, ໃຫ້ເອົາໃຈໃສ່ບັນຫາເນື້ອໃນຂອງບົດລາຍງານ ການເມືອງ ທີ່ອະນຸກໍາມະການເນື້ອໃນຂັ້ນສູນກາງ ໄດ້ແນະນໍາ, ຄົ້ນຄ້ວາບຸກຄະລາກອນໃຫ້ລະອຽດຖີ່ຖ້ວນ, ຮອບດ້ານ ແລະ ປະຕິບັດໃຫ້ຖືກຕ້ອງຕາມຂັ້ນຕອນການທາບທາມ ແລະ ຮັບປະກັນຫຼັກການລວມສູນປະຊາທິປະໄຕຢ່າງແທ້ຈິງ, ໃຫ້ເອົາໃຈໃສ່ວຽກງານໂຄສະນາ ແລະ ຂະບວນການກະກຽມໃຫ້ແກ່ກອງປະຊຸມໃຫຍ່ສາມຂັ້ນ ເປັນຕົ້ນແມ່ນ ການປຸກລະດົມຂະບວນການໃຫ້ມະຫາຊົນເຂົ້າຮ່ວມຢ່າງຕັ້ງຫນ້າ ໃນການກໍ່ສ້າງພັກ ໃຫ້ປອດໃສ, ເຂັ້ມແຂງ ແລະ ຫນັກແຫນ້ນ.

ພ້ອມດຽວກັນນັ້ນ ທ່ານ ປະທານສູນກາງແນວລາວສ້າງຊາດ ໄດ້ມອບຄອມພິວເຕີໂນ໊ດບຸກ ຈໍານວນ 6  ໜ່ວຍ ແລະ ຄອມພິວເຕີຕັ້ງໂຕະ 2 ຊຸດ ໃຫ້ແນວລາວສ້າງຊາດແຂວງ ເພື່ອນໍາໄປມອບຕໍ່ໃຫ້ບັນດາແນວລາວສ້າງຊາດເມືອງ ແລະ ໄດ້ໄປຢ້ຽມຢາມຟາມງົວ ບ້ານຄັງສີ, ຢ້ຽມຊົມ ການກຽມຄວາມພ້ອມຂອງສະໜາມກິລາ ທີ່ຈະຈັດງານມະຫາກຳກິລາແຫ່ງຊາດ ຄັ້ງທີ 11 ປີ 2020 ທີ່ແຂວງຊຽງຂວາງເປັນເຈົ້າພາບຕື່ມອີກ.

ຂ່າວ: ວຽງຈັນທາຍ

ພາບ: ນັກຂ່າວແຂວງຊຽງຂວາງ

Related Articles

Leave a Reply