Vientiane Times Lao
ປີທ່ອງທ່ຽວ ລາວ-ຈີນ ແລະ ຈີນ-ລາວ2019 ໄດ້ປິດລົງຢ່າງຍີ່ງໃຫຍ່ 

ປີທ່ອງທ່ຽວ ລາວ-ຈີນ ແລະ ຈີນ-ລາວ2019 ໄດ້ປິດລົງຢ່າງຍີ່ງໃຫຍ່ 

ພິທີປິດປີທ່ອງທ່ຽວລາວ-ຈີນ ແລະ ຈີນ-ລາວ ໄດ້ຈັດຂຶ້ນຢ່າງຍີ່ງໃຫຍ່ ແລະ ສົມກຽດທີ່ຫໍພິພິຕະພັນແຫ່ງຊາດ ສປຈີນ ທີ່ນະຄອນຫລວງປັກກິ່ງ ສປ ຈີນໃນມື້ນີ້ ວັນທີ 17 ທັນວາ 2019.

ການນຳຂັ້ນສູງຂອງສອງປະເທດໄດ້ເຂົ້າຮ່ວມ ເຊິ່ງຝ່າຍລາວ ນຳໂດຍ ທ່ານນາງ ປານີ ຢາທໍ້ຕູ້ ປະທານສະພາແຫ່ງຊາດ ແລະ ທ່ານ ສຈ ປອ  ກິແກ້ວ ໄຂຄຳພິທູນ ລັດຖະມົນຕກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍຄະນະຈາກ ສປປ ລາວ ເຂົ້າຮ່ວມ ແລະ ຝ່າຍຈີນ ນຳໂດຍ ທ່ານ ປ້າຍມ້າ ສືຫລີນ ຮອງປະທານສະພາ ປະຊາຊົນທົ່ວປະເທດຈີນ.

ທ່ານ ຈາງສູ ຮອງລັດຖະມົນຕີ ກະຊວງວັດທະນະທໍາ ແລະ ທ່ອງທ່ຽວ ສປ ຈີນ ໄດ້ກ່າວຕ້ອນຮັບຄະນະຜູ້ແທນລາວ ແລະ ໄດ້ຕີລາຄາສູງຕໍ່ການນຳສູງສຸດຂອງສອງປະເທດ ລາວ ແລະ ຈີນທີ່ໄດ້ຕັດສນໃຈຮ່ວມກັນເປີດປີທ່ອງທ່ຽວ ລາວ-ຈີນ ແລະ ຈີນ-ລາວຂຶ້ນໃນປີ 2019 ເຊິ່ງເປັນສັນຍາລັກໃໝ່ໃນການຮ່ວມມືດ້ານວຽກງານທ່ອງທ່ຽວເພື່ອອຳນວຍຄວາມສະດວກໃຫ້ປະຊາຊົນທັງສອງປະເທດໄດ້ມີການໄປມາຫາສູ່ກັນຖານບ້ານໃກ້ເຮືອນຄຽງທີ່ດີຕໍ່ກັນ.

ທ່ານ ສຈ ປອ  ກິແກ້ວ ໄດ້ກ່າວວ່າ: ສປປ ລາວ ແລະ ສປ ຈີນ ໄດ້ຈັດໃຫ້ປີ 2019 ເປັນປີທ່ອງທ່ຽວ ລາວ-ຈີນ ຂຶ້ນ ເພື່ອປະຕິບັດຕາມຄວາມມຸ່ງມາດປາດຖະໜາຂອງສອງ ຜູ້ນຳສູງສຸດ ລາວ-ຈີນ ຄື ສະຫາຍ ເລຂາທິການໃຫຍ່ ແລະ  ປະທານປະເທດ ລາວ ບຸນຍັງ ວໍລະຈິດ ແລະ ເລຂາທິການໃຫ່ຍ ປະທານປະເທດ  ສປ ຈີນ ສະຫາຍ ສີ ຈິ້ນຜິງທີ່ຢາກເຫັນປະຊາຊົນທັງສອງປະເທດໄປມາຫາສູ່ກັນຖານບ້ານໃກ້ເຮືອນຄຽງ.

ທ່ານ ລັດຖະມົນຕີຍັງກ່າວຕື່ມອີກວ່າ: ຂໍຂອບອົກຂອບໃຈເປັນຢ່າງຍີ່ງມາຍັງ ພັກ ແລະ ລັດຖະບານ ສປ ຈີນ ໂດຍສະເພາະກະຊວງວັດທະນະທໍາ ແລະ ທ່ອງທ່ຽວຈີນ ພ້ອມດ້ວຍ ຄະນະຮັບຜິດຊອບຈັດຕັ້ງພິທີ ທັງຝ່າຍຈີນ ແລະ ຝ່າຍລາວ ທີ່ໄດ້ຮ່ວມມືຢ່າງໃກ້ຊິດ ເຊິ່ງໄດ້ເຮັດໃຫ້ງານດັ່ງກ່າວມີປະສິດທິຜົນ ການເປີດປີທ່ອງທ່ຽວລາວ-ຈີນ ປີ2019 ປະຊາຊົນສອງະເທດໃນການໄປມາຫາສູ່ຖານບ້ານໃກ້ເຮືອນຄຽງທີ່ດີຕໍ່ກັນແຕ່ອະດີດຈົນຖິງປະຈຸບັນຈາກສາຍພົວພັນແບບຍຸດທະສາດຮອບດ້ານຍາວນານໝັ້ນຄົງຕາມທິດ 4 ດີ (ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ) ຈົນກາຍເປັນ “ ຄູ່ຮ່ວມຊະຕາກໍາສັງຄົມນິຍົມ’’ ທີ່ບໍ່ມີຫຍັງສາມາດທັບມ້າງໄດ້. ລັດຖະບານແຫ່ງ ສປປ ລາວ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການຈັດຕັ້ງທີ່ປະຕິບັດປີທ່ອງທ່ຽວລາວ-ຈີນ 2019 ເຊິ່ງທັງສອງຝ່າຍໄດ້ພ້ອມກັນເອົາໃຈໃສ່ຈັດຕັ້ງປະຕິບັດຢ່າງໄດ້ຮັບຜົນດີຫຼາຍດ້ານ ເຊັ່ນຜ່ານມາພວກເຮົາໄດ້ຈັດງານສັບປະດາວັດທະນະທໍາຈີນຄຽງຄູ່ກັບການວາງສະແດງຮູບພາບ ແລະ ງານສະແດງສິລະປະຈີນຂຶ້ນ ໃນລະຫວ່າງວັນທີ 29 ພຶດສະພາ- 03ມິຖຸນາ 2019  ທີ່ ນະຄອນຫລວງວຽງຈັນ, ຈັດງານບຸນໄຫວ້ພະຈັນໃນຫົວຂໍ້ “ມອບບົດກາວີໃຫ້ພະຈັນ” ລວມທັງ ຕ້ອນຮັບຄະນະສິລະປະ ຈາກແຂວງເສສວນ ທີ່ແຂວງຫລວງພະບາງ ແລະ ນະຄອນຫລວງວຽງຈັນ ໃນລະຫວ່າງວັນທີ 23-28 ກັນຍາ 2019ເນື່ອງໃນໂອກາດທີ່ ສະຫາຍ ຫວາງ ຢາງ, ກໍາມະການກົມການເມືອງພັກຄອມມນິດຈີນ, ປະທານສະພາທີ່ປຶກສາການເມືອງທົ່ວປະເທດຈີນ ໄດ້ເຄື່ອນໄຫວຢ້ຽມຢາມລັດຖະກິດທີ່ ສປປ ລາວ ໂດຍສະເພາະແຂວງຫລວງພະບາງ ລະຫວ່າງວັນທີ 17-18 ພະຈິກ2019 ທີ່ຜ່ານມາ. ຈັດຕັ້ງການຕ້ອນຮັບຂະບວນລົດຄາຣາວານ ນັກທ່ອງທ່ຽວຈີນ ຈໍານວນ 20 ຄັນເຂົ້າ ສປປ ລາວ ຈາກຊາຍແດນບໍ່ເຕັນ ລົງໄປເຖິງດ່ານຊາຍແດນ ໜອງນົກຂຽນ ເພື່ອສືຕໍ່ໄປປະເທດກໍາປເຈຍ. ຄຽງຄູ່ກັນນີ້ ຝ່າຍຈີນຍັງໄດ້ຈັດຕັ້ງຊຸດຝຶກອົບຮົມໃຫ້ພະນັກງານນໍາທ່ຽວຂອງລາວແລະ ໄດ້ມອບລົດ ຈໍານວນ 22 ຄັນ ໃຫ້ຝ່າຍລາວເປັນຂອງຂວັນ.

ີ່ ສປ ຈີນ ໄດ້ເປີດຖ້ຽວບິນປະຖົມມະລຶກ ວຽງຈັນ-ຊຽງໄຮ້ – ວຽງຈັນ ໃນລະຫວ່າງວັນທີ 6-9 ມີນາ 2019 ທີ່ນະຄອນຊຽງໄຮ້, ໄລຍະທີ່ ປະທານປະເທດແຫ່ງ ສປປລາວ ທ່ານ ບຸນຍັງ ວໍລະຈິດ ຢ້ຽມຢາມລັດຖະກິດຢູ່ ສປຈີນ ທ້າຍເດືອນເມສາ 2019 ທີ່ຜ່ານມາ ກໍ່ໄດ້ຈັດຕັ້ງງານວາງສະແດງການທ່ອງທ່ຽວ ແລະ ສະແດງສິລະປະວັດທະນະທໍາລາວ ທີ່ ແຂວງຟູຈ້ຽນ; ໄດ້ເຄື່ອນໄຫວຮ່ວມກອງປະຊຸມເວທີປຶກສາຫາລືຫົວຂໍ້ຄວາມສີວິໄລແຫ່ງອາຊີ ແລະ ງານວາງສະແດງການທ່ອງທ່ຽວແຫ່ງອາຊີ ໃນລະຫວ່າງວັນທີ 14-18 ພຶດສະພາ 2019 ທີ່ນະຄອນຫລວງປັກກິ່ງ, ໃນໄລຍະດຽວກັນນີ້, ຝ່າຍຈີນ ກໍ່ຍັງໄດ້ຕ້ອນຮັບຄະນະ ສິລະປະລາວຈໍານວນ 30 ຄົນ ຮ່ວມພິທີເດີນຂະບວນພາເລດຮ່ວມກັບບັນດາ ປະເທດຕ່າງໆໃນພາກພື້ນຢ່າງຟົດຟື້ນ; ເປີດຖ້ຽວບິນຮອບປະຖົມມະລຶກ ວຽງຈັນ-ຫາງໂຈ-ວຽງຈັນ ໃນລະຫວ່າງວັນທີ 30 ສິງຫາ – ທີ 1ກັນຍາ 2019 ທີ່ແຂວງເຈີ້ຈຽງ ສປ ຈີນ ຄຽງຄູ່ກັບການຈັດຕັ້ງປະຕິບັດກິດຈະກໍາທີ່ກ່າວມາຂ້າງເທິງນັ້ນ ສປ ຈີນ ກໍ່ໄດ້ໃຫ້ໂອກາດຄະນະຜູ້ແທນລາວເຂົ້າຮ່ວມຫລາຍກິດຈະກໍາປິ່ນອ້ອມວຽກງານການທ່ອງທ່ຽວເຊັ່ນ: ງານວາງສະແດງອຸດສາຫະກໍາການທ່ອງທ່ຽວສາກົນ ທີ່ແຂວງກວາງຕຸ້ງ, ງານວາງສະແດງອາຊຽນ-ຈີນທີ່ກຸຍຫລີນ, ງານວາງສະແດງທ່ອງທ່ຽວສາກົນ ທີ່ ຄຸນ ໝິງ, ກອງປະຊຸມແລກປ່ຽນດ້ານວິຊາການ, ຊຸດຝຶກອົບຮົມຍົກລະດັບຄວາມອາດສາມາດໃຫ້ແກ່ບຸກຄະລາກອນລາວ, ກອງປະຊຸມເວທີປຶກສາຫາລືລະດັບວິຊາການ ແລະເທດສະການດ້ານວັດທະນະທໍາຕ່າງໆ ທີ່ ສປ ຈີນ ໄດ້ເປັນເຈົ້າພາບ. 

ການເປີດປີທ່ອງທ່ຽວສະ ແດງໃຫ້ເຫັນໂດຍຜ່ານສະຖິຕິນັກທ່ອງທ່ຽວຈີນທີ່ເຂົ້າມາທ່ຽວລາວຈາກ 199,857 ຄົນ ໃນປີ 2012 ເປັນ 799,929 ຄົນ ໃນປີ 2018. ນັບມື້ນັບເພີ່ມຂຶ້ນຕໍ່ເນື່ອງ, ປີ 2019 ຕາມສະຖິຕິທາງການຈໍານວນ 9 ເດືອນຕົ້ນມີ ນັກທ່ອງທ່ຽວຈີນທີ່ເຂົ້າມາທ່ອງທ່ຽວ ລາວຫລາຍກວ່າ 756,952 ເທື່ອຄົນ ແລະ ຄາດວ່າໃນໄລຍະ 3 ເດືອນສຸດ ທ້າຍຂອງ ໄຕມາດປີນີ້ຄົງຈະບັນລຸເຖິງ 1 ລ້ານເທື່ອຄົນຕາມຄາດໝາຍທີ່ວາງໄວ້, ຄຽງຄູ່ ກັນນັ້ນ ນັກທ່ອງທ່ຽວລາວຈໍານວນບໍ່ໜ້ອຍກໍພາກັນມາທ່ຽວຈີນເຊັນດຽວກັນ.

ຂ່າວ: ວຽງຈັນທາຍ

ພາບ: ຄຳພັນ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ