Vientiane Times Lao
ປີ 2021 ນີ້, ແຂວງສາລະວັນບໍ່ ໃຫ້ຈັດງານ ບຸນອອກພັນສາ ແລະ ໄຫຼເຮືອໄຟ

ປີ 2021 ນີ້, ແຂວງສາລະວັນບໍ່ ໃຫ້ຈັດງານ ບຸນອອກພັນສາ ແລະ ໄຫຼເຮືອໄຟ

ອໍານາດການປົກຄອງແຂວງສາລະວັນໄດ້ອອກແຈ້ງການເມື່ອມໍ່ໆມານີ້ເຖິງທຸກຊັ້ນຄົນພາຍໃນແຂວງກ່ຽວກັບການໂຈະ ຫຼື ຈະບໍ່ອະນຸຍາດໃຫ້ຈັດງານບຸນອອກພັນສາ ແລະ ໄຫຼເຮືອໄຟດັ່ງທີ່ເຄີຍປະຕິບັດກັນ ມາທຸກໆປີທີ່ຜ່ານມາລວມ ທັງບໍ່ອະນຸຍາດໃຫ້ໃສ່ບາດ, ຫ້າມປະຊາຊົນອອກໄປລອຍກະທົງຢູ່ຕາມແມ່ນໍ້າຕ່າງໆ, ອະນຸຍາດໃຫ້ພຽງ ພະສົງ-ສາມະເນນ ເທດສະໜາ-ບູຊາຕາມຫຼັກພະສົງພາຍໃນວັດເທົ່ານັ້ນເພື່ອເປັນການປ້ອງກັນການແຜ່ ລະບາດຂອງພະຍາດໂຄວິດ-19 ຢູ່ພາຍໃນແຂວງທີ່ຍັງມີຜູ້ຕິດເຊື້ອພາຍໃນລາຍວັນ.

 ການໂຈະບຸນອອກພັນສາ ແລະ ໄຫຼເຮືອໄຟດັ່ງກ່າວນັ້ນແມ່ນໜຶ່ງໃນຫຼາຍມາດຕະການຫ້າມກ່ຽວກັບການ ສືບຕໍ່ເພີ່ມທິວີມາດຕະການປ້ອງກັນພະຍາດໂຄວິດ-19 ພາຍໃນແຂວງ ອີກ 15 ວັນນັບແຕ່ວັນທີ 17 ຕຸລາ ຈົນເ​ຖິງ ວັນທີ 1 ພະຈິກ 2021.  ຮອດວັນທີ 19 ຕຸລາ 2021 ນີ້, ແຂວງສາລະວັນມີຜູ້ຕິດເຊື້ອ ສະສົມຈາກພະຍາດໂຄວິດ-19 ແລ້ວທັງໝົດ 1.889 ຄົນ ເປັນແຂວງອັນດັບທີຫ້າ ທີ່ກວດພົບຜູ້ຕິດເຊື້ອຫຼາຍ ຊຶ່ງອັນດັບໜຶ່ງຍັງແມ່ນນະຄອນຫຼວງວຽງຈັນທີ່ມີຜູ້ຕິດເຊື້ອສະສົມ 9.946 ຄົນ, ອັນດັບສອງແມ່ນແຂວງ ສະຫວັນນະເຂດ ມີ 7.398 ຄົນ, ອັນດັບສາມແມ່ນແຂວງຈໍາປາສັກ ມີ 5.888 ຄົນ, ອັນດັບສີ່ແມ່ນແຂວງຄໍາມ່ວນ ມີ 3.245 ຄົນ, ອັນດັບຫົກແມ່ນແຂວງຫຼວງພະບາງ ມີ 1.860 ຄົນ, ອັນດັບເຈັດ ແມ່ນແຂວງບໍ່ແກ້ວ ມີ 1.448 ຄົນ, ອັນດັບແປດ ແມ່ນແຂວງວຽງຈັນ ມີຜູ້ຕິດເຊື້ອສະສົມ 1.353 ຄົນ ແລະ ແຂວງອື່ນໆທີ່ມີຜູ້ຕິດເຊື້ອບໍ່ຮອດ 500 ຄົນ ແລະ ບາງແຂວງບໍ່ຮອດ 10 ຄົນກໍມີ ໂດຍຍັງມີແຕ່ແຂວງຫົວພັນພຽງແຂວງດຽວເທົ່ານັ້ນທີ່ຍັງບໍ່ມີຜູ້ຕິດເຊື້ອພະຍາດດັ່ງກ່າວ.

ຂ່າວ: ວຽງຈັນທາຍ 

ພາບປະກອບ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ