ປີ 2021 ທີ່ຜ່ານມາ, ມູນຄ່າການການສົ່ງອອກ ແລະ ນໍາເຂົ້າສິນຄ້າຂອງ ສປປ ລາວບັນລຸໄດ້ປະມານ 13.000 ລ້ານໂດລາສະຫະລັດ. ໃນນັ້ນ, ມູນຄ່າການສົ່ງອອກ ມີປະມານ 7.000 ລ້ານໂດລາ ແລະ ມູນຄ່າການນໍາເຂົ້າ ມີປະມານ 6.000 ລ້ານໂດລາ ນັ້ນໝາຍຄວາມວ່າລາວເກີນດຸນການຄ້າ ຫຼື ມູນຄ່າສິນຄ້າສົ່ງອອກຫຼາຍກວ່າການນໍາເຂົ້າ ປະມານ 1.000 ລ້ານໂດລາ.
ສິນຄ້າສົ່ງອອກຫຼັກຂອງລາວປະກອບມີ: ຄຳປະສົມ/ຄຳແທ່ງ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ແຮ່ທອງ, ເຍື່ອໄມ້ ແລະ ເສດເຈ້ຍ, ຢາງພາລາ, ມັນຕົ້ນ, ແຮ່ເຫຼັກ, ໝາກກ້ວຍ, ເຄື່ອງນຸ່ງຫົ່ມ, ເຄື່ອງໃຊ້ໄຟຟ້າ ແລະ ອຸປະກອນເຄື່ອງໃຊ້ໄຟຟ້າ, ຝຸ່ນ (ປຸຍ), ໂຄງຮ່າງ, ຊິ້ນສ່ວນກ້ອງບັນທຶກພາບ ແລະ ເກີບ.
ສະເພາະສີນຄ້ານໍາເຂົ້າຫຼັກປະກອບມີ: ພາຫະນະທາງບົກ (ນອກຈາກລົດຈັກ,ລົດໄຖ), ນໍ້າມັນເຊື້ອໄຟ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ແກ້ວປະເສີດ ຫຼື ເຄິ່ງປະເສີດ, ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…), ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ, ຜະລິດຕະພັນການຢາ (ເພສັດຊະກໍາ), ເຄື່ອງໃຊ້ທີ່ເຮັດດ້ວຍພລາສະຕິກ, ເຄື່ອງໄຟຟ້າ ແລະ ອຸປະກອນໄຟຟ້າ, ສາຍໄຟຟ້າ/ເຄເບີ້ນ, ສິ່ງເສດເຫຼືອຈາກອຸດສາຫະກຳຜະລິດອາຫານ, ອຸປະກອນຖ່າຍພາບ, ໄມ້ ແລະ ເຄື່ອງໃຊ້ທີ່ເຮັດດ້ວຍໄມ້.
ມູນຄ່າການນໍາເຂົ້າ ແລະ ສົ່ງອອກ ຂອງ ສປປ ລາວ ປະຈໍາ ປີ 2021 ນີ້ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.
ຂໍ້ມູນ: ສູນຂໍ້ມູນຂ່າວສານທາງດ້ານການຄ້າ ກະຊວງອຸດສາຫະກຳ ແລະ ການຄ້າ.
