Vientiane Times Lao
ຜູ້ກໍ່ເຫດຄາຕະກຳເອື້ອຍ-ນ້ອງ ຢູ່ບ້ານແສງສະຫວ່າງ ຈັບໄດ້ແລ້ວ

ຜູ້ກໍ່ເຫດຄາຕະກຳເອື້ອຍ-ນ້ອງ ຢູ່ບ້ານແສງສະຫວ່າງ ຈັບໄດ້ແລ້ວ

ທ້າວ ພຸດທະກອນ ຫຼື ຕ້ອມ ອາຍຸ 32 ປີ ກຳມະກອນ ຢູ່ບ້ານທົ່ງກາງ ເມືອງສີສັດຕະນາກ ນະຄອນຫຼວງວຽງຈັນ ຜູ້ກໍ່ເຫດໃຊ້ປືນສັ້ນຍິງອະດີດເມຍ ຊື່ ນາງ ອັກປະລິນຍາ ຫຼື ກີ້ ອາຍຸ 26, ນ້ອງເມຍ ຊື່ ນາງ ລາລີຕາ ອາຍຸ 24 ປີ ເສຍຊີວິດຄາທີ່ ແລະ ອະດີດແມ່ເຖົ້າ ຊື່ນາງ ປະກິດ ອາຍຸ 55 ປີ ໄດ້ຮັບບາດເຈັບ ຢູ່ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ ຍ້ອນແຄ້ນບໍ່ໄດ້ສິດລ້ຽງດູລູກ ໃນວັນທີ 19 ກໍລະກົດ 2021 ຜ່ານມານີ້, ມາຮອດປະຈຸບັນ  ຜູ້ກໍ່ເຫດຄາຕະກຳ ໄດ້ຖຶກເຈົ້າໜ້າທີ່ ປກສ ເມືອງໄຊເສດຖາ ຈັບໄດ້ແລ້ວ.

ເຈົ້າໜ້າທີ່ ປກສ ເມືອງໄຊເສດຖາ ໃຫ້ຮູ້ວ່າ: ທ້າວ ຕ້ອມ ໄດ້ແຕ່ງງານກັບນາງ ກີ້ ( ຜູ້ເສຍຊີວິດ ) ໃນປີ 2017 ແລະ ກິນຢູ່ກັນມາໄດ້ 2 ປີປາຍ ມີລູກຮ່ວມກັນ 2 ຄົນ ເປັນຊາຍໝົດ, ຊຶ່ງໃນໄລຍະທີ່ທັງ ສອງຢູ່ກິນນໍາກັນນັ້ນ ທ້າວ ຕ້ອມ ໄດ້ຕິດເກມພະ ນັນອອນລາຍ ພ້ອມທັງເສບຢາບ້າ ແລະ ມັກມີປາກສຽງ ແລະ ໃຊ້ຄວາມຮຸນແຮງກັບເມຍເປັນປະຈໍາ (ຕີເມຍ). ຈົນຮອດເດືອນກຸມພາ 2020, ນາງ ກີ້ ໄດ້ຮ້ອງຟ້ອງຂໍຢ່າຮ້າງກັບທ້າວ ຕ້ອມ ຢູ່ສານເຂດ Ill ເມືອງສີສັດຕະນາກ ແລະ ມາຮອດວັນທີ 19 ກໍລະກົດ 2021 ນາງ ປາກິດ ແລະ ນາງ ກີ້ ໄດ້ພາກັນໄປຟັງຄໍາຕັດສິນຂອງສານ ກ່ຽວ ກັບສິດໃນການລ້ຽງດູລູກທັງສອງ ຜົນປະກົດວ່າ ນາງ ກີ້ ໄດ້ສິດລ້ຽງດູລູກທັງ 2 ຄົນ, ສ່ວນ ທ້າວ ຕ້ອມ ຜູ້ເປັນຜົວແມ່ນບໍ່ໄດ້ລູກ ແຕ່ສາມາດໄປມາຫາສູ່ລູກໄດ້ ພ້ອມທັງຕ້ອງໄດ້ສົ່ງຄ່າລ້ຽງດູລູກໃນແຕ່ລະເດືອນ ຈົນກວ່າລູກຈະພົ້ນອາຍຸກະສຽນ 18 ປີ.

ພາຍຫຼັງທີ່ຮັບຟັງຄໍາຕັດສິນຂອງສານແລ້ວ ທັງສອງຝ່າຍ ກໍແຍກຍ້າຍກັນກັບເຮືອນ, ພໍແຕ່ມາຮອດເຮືອນ ນາງປາກິດ ກໍໄດ້ບອກໃຫ້ນາງ ກີ້ ໄປແຕ່ງ ກິນເຂົ້າສວາຍ, ສ່ວນນາງ ປາກິດ ກໍໄດ້ເຂົ້າໄປໃນຫ້ອງນອນ ເພື່ອພັກຜ່ອນ. ຮອດເວລາປະມານ 12:15 ໂມງ ຂອງວັນດຽວກັນ, ໃນຂະນະທີ່ນາງ ປາກິດ ນອນຢູ່ນັ້ນ ກໍໄດ້ຍິນສຽງນາງ ກີ້ ຮ້ອງຂຶ້ນວ່າ ແມ່ໆ ພ້ອມທັງໄດ້ຍິນສຽງປືນດັງຂຶ້ນ ຈໍານວນຫຼາຍບາດ ຜູ້ກ່ຽວຈຶ່ງໄດ້ໄຂປະຕູຫ້ອງອອກມາ ພໍດີອອກມາພົບກັບທ້າວ ຕ້ອມ ຖືປືນສັ້ນບໍ່ຮູ້ຊະນິດ ເຮັດໃຫ້ຜູ້ກ່ຽວຕົກໃຈແຮງ ຈຶ່ງໄດ້ດຶງປະຕູເຂົ້າຄືນ ແຕ່ທ້າວ ຕ້ອມ ກໍໄດ້ດຶງປະຕູອອກ ໃນຂະນະທີ່ດຶງກັນໄປມາ ທ້າວ ຕ້ອມ ຈຶ່ງໄດ້ໃຊ້ອາວຸດປືນສັ້ນ ຍິງໃສ່ນາງ ປາກິດ ຖືກບໍລິເວນກ້ອງໃບຫູເບື້ອງຂວາ. ຫຼັງຈາກນັ້ນ, ນາງ ປາກິດ ກໍໄດ້ອັດປະຕູຫ້ອງແລ້ວກໍລ໋ອກປະຕູໄວ້ ແລ້ວລົງໄປລີ້ຢູ່ກ້ອງຕຽງນອນ. ຈາກນັ້ນ, ຈຶ່ງໄດ້ໂທຂໍຄວາມຊ່ວຍເຫຼືອ ແລະ ທ້າວ ກີ້ ກໍໄດ້ພະຍາຍາມໄຂປະຕູຫ້ອງ ແຕ່ໄຂບໍ່ໄດ້ຈຶ່ງໄດ້ຍິງປືນໃສ່ປະຕູຈໍານວນ 2 ນັດ ແລ້ວກໍຍ່າງມາທາງດ້ານຫຼັງປ່ອງຢ້ຽມ ຫົວບ່ອນນອນຂອງ ນາງປາກິດ ແລ້ວຍິງປືນເຂົ້າມາໃນຫ້ອງນອນອີກຈໍານວນ 1 ນັດ ແລ້ວກໍເອົາຕົວຫຼົບໜີ.

ຜ່ານການກວດກາສະຖານທີ່ເກີດເຫດ ພົບເຫັນຜູ້ຖືກຍິງຈໍານວນ 3 ຄົນ; ໃນນີ້, ໄດ້ຮັບບາດເຈັບ 1 ຄົນ ຊື່ ນາງ ປາກິດ ແລະ ເສຍຊີວິດອີກ 2 ຄົນຢູ່ໃນເຮືອນຄົວ; ເຈົ້າໜ້າທີ່ ກວດສອບໃນສະຖານທີ່ເກີດເຫດ ພົບເຫັນປອກລູກປືນຂະໜາດ 9 ມມ ຈໍານວນ 18 ປອກ, ພົບເຫັນຫົວລູກປືນຈໍານວນ 4 ຫົວ ແລະ ສິ້ນສ່ວນລູກປືນຢູ່ໃນສະຖານທີ່ເກີດເຫດ; ນອກນັ້ນ, ຍັງພົບເຫັນເລົາເກັບສຽງປືນຈໍານວນ 1 ເລົາຢູ່ກ້ອງຕົ້ນມ່ວງໜ້າເຮືອນ.

ຂ່າວ: ວຽງຈັນທາຍ

ພາບ: ເຈົ້າໜ້າທີ່ ປກສ ນະຄອນຫຼວງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ