Vientiane Times Lao
ຜູ້ນໍາຮົງກາຣີຢ້ຽມຢາມລາວຢ່າງ ເປັນທາງການ

ຜູ້ນໍາຮົງກາຣີຢ້ຽມຢາມລາວຢ່າງ ເປັນທາງການ

ປະທານປະເທດ ແຫ່ງ ສປປ ລາວ ພະນະທ່ານ ບຸນຍັງ ວໍລະຈິດ ແລະ ບັນ​ດາ​ຜູ້ແທນຂັ້ນສູງ​ ຂອງ​ລາວ ໄດ້ຈັດພິທີຕ້ອນຮັບ ພະນະທ່ານ ຢາໂນສ ອາແດຣ, ປະທານາທິບໍດີ ແຫ່ງ ສາທາ ລະນະລັດ ຮົງກາຣີ ພ້ອມດ້ວຍພັນລະຍາ ແລະ ຄະນະຢ່າງ​ເປັນ​ທາງ​ການ ຢູ່ທໍານຽບປະທານ ປະເທດ ໃນຕອນເຊົ້້າ ຂອງວັນທີ 25/10/2019.

ການເດີນທາງມາຢ້ຽມຢາມລັດຖະກິດຄັ້ງປະຖົມ ມະລຶກ ຢູ່ ສປປ ລາວ ໃນລະຫວ່າງ ວັນທີ 24-27 ຕຸລາ 2019 ໃນຄັ້ງນີ້ແມ່ນ ເພື່ອເສີມຂະ ຫຍາຍສາຍພົວພັນມິດຕະພາບ ແລະ ການ ຮ່ວມມືອັນດີງາມ ລະຫວ່າງ ສອງປະເທດ ໃຫ້ແຕກດອກອອກຜົນຍິ່ງໆຂຶ້ນໃນອະນາຄົດ.

ພາຍຫຼັງສໍາເລັດພິທີຕ້ອນ ຜູ້ນໍາທັງສອງປະເທດ ພ້ອມດ້ວຍຄະນະ ກໍ່ໄດ້ດຳເນີນການພົບປະກັນ ຢ່າງເປັນທາງການ ແລະ ຢູ່ໃນວາລະດັ່ງກ່າວ ພະນະທ່ານປະທານ ປະເທດ ແຫ່ງ ສປປ ລາວ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນ ຮັບ ແລະ ຕີລາຄາສູງຕໍ່ພະນະທ່ານປະທານາ ທິບໍດີ ຢາໂນສ ອາແດຣ ທີ່ໄດ້ນຳພາຄະນະ ຜູ້ແທນຂັ້ນສູງຂອງ ສ. ຮົງກາຣີ ເດີນທາງມາ ຢ້ຽມຢາມລາວໃນຄັ້ງນີ້. ທ່ານຍັງໄດ້ກ່າວຕື່ມວ່າການຢ້ຽມຢາມນີ້ໄດ້ປະ ກອບສ່ວນອັນສຳຄັນ ເຂົ້າໃນການເສີມຂະ ຫຍາຍສາຍພົວພັນມິດຕະພາບ ແລະ ການ ຮ່ວມມືອັນດີງາມຂອງສອງປະເທດລາວ-ຮົງກາຣີ ໃຫ້ນັບມື້ແຕກດອກອອກຜົນຍິ່ງຂຶ້ນ.

ສປປ ລາວ ແລະ ສ. ຮົງກາຣີໄດ້ສ້າງຕັ້ງສາຍ ພົວພັນການທູດນຳກັນ ໃນເດືອນກັນຍາ ປີ 1962 ແລະ ນັບແຕ່ພຸ້ນມາການພົວພັນທາງດ້ານ ການເມືອງ ລະຫວ່າງສອງປະເທດໄດ້ສືບຕໍ່ໜັກ ແໜ້ນ, ມີການແລກປ່ຽນຄະນະຜູ້ແທນໃນຫຼາຍ ລະດັບ ນັບແຕ່ການນໍາລັດຖະບານລົງຮອດຂັ້ນ ວິຊາການ ເພື່ອແລກປ່ຽນຄໍາຄິດເຫັນ ແລະ ຖອດ ຖອນບົດຮຽນນໍາກັນ ແລະ ຮັດແໜ້ນຄວາມສາ ມັກຄີທີ່ມີມູນເຊື້ອ ລະຫວ່າງສອງປະເທດ. ສອງຝ່າຍ ມີຄວາມເຂົ້າອົກເຂົ້າໃຈອັນເລິກເຊິ່ງ ແລະ ເຄົາລົບນັບຖືເຊິ່ງກັນ ແລະ ກັນ, ສະໜັບ ສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.

ນອກຈາກນີ້, ລັດຖະບານລາວ ໄດ້ຕີລາຄາສູງ ຕໍ່ລັດຖະບານ ຮົງກາຣີ ທີ່ໄດ້ສືບຕໍ່ຊ່ວຍເຫຼືອ ດ້ານວິຊາການໃນຂະແໜງກະສິກຳ, ການສຶກສາ, ລວມທັງໃຫ້ເງິນກູ້ຢືມທີ່ບໍ່ມີດອກເບ້ຍ. ໃນນັ້ນ, ຮົງກາຣີ ກໍ່ໄດ້ສືບຕໍ່ໃຫ້ທຶນການສຶກສາແກ່ ສປປ ລາວ ໃນລະດັບປະລິນຍາຕີ, ປະລິນຍາໂທ ແລະ ປະລິນຍາເອກ ເພີ່ມຂຶ້ນ, ຊຶ່ງໃນປັດຈຸບັນມີນັກ ສຶກສາລາວຮຽນຢູ່ ຮົງກາຣີ ຈໍານວນທັງໝົດ 185 ຄົນ. 

ພ້ອມດຽວກັນນີ້, ສອງຝ່າຍຍັງໄດ້​ ປຶກສາ​ຫາລື ທິດທາງ​ເພື່ອເສີມ​ຂະຫຍາ​ຍສາຍ ພົວພັນ ​ແລະ ການ​ຮ່ວມ​ມື​ໃນ​ດ້ານ​ຕ່າງໆ ​ໂດຍ​ສະ​ເພາະ​ແມ່ນ ​ການຮ່ວມມືດ້ານການເມືອງ, ການທູດ, ກະສິກຳ, ການສຶກສາ, ການຄ້າ-ການລົງທຶນ, ການເງິນ, ວິທະຍາສາດ-ເຕັກໂນໂລຊີ, ຊັບພະຍາກອນທໍາ ມະຊາດ ແລະ ສິ່ງແວດລ້ອມ, ໃນນີ້ລວມທັງການ ຄຸ້ມຄອງນໍ້າແບບຍືນຍົງ ແລະ ຂະແໜງການ ອື່ນໆທີ່ທັງສອງຝ່າຍມີທ່າແຮງ. ທັງສອງຝ່າຍຍັງໄດ້ແລກປ່ຽນຄຳຄິດຄຳເຫັນ ກ່ຽວກັບບັນຫາພາກພື້ນ ແລະ ສາກົນ ຊຶ່ງ​ຕ່າງ​ ຝ່າຍ ຕ່າງມີ​ຄວາມ​ສົນ​ໃຈ ແລະ ມີຜົນປະໂຫຍດ ຮ່ວມກັນ.

ພະນະ ທ່ານ ບຸນຍັງ ວໍລະຈິດ ໄດ້ສະແດງ ຄວາມ ຂອບໃຈຕໍ່ ລັດຖະບານ ແລະ ປະຊາຊົນ ຮົງກາຣີ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນ ສປປ ລາວ ໃນໄລຍະ ຜ່ານມາ, ໂດຍສະເພາະ ໃນປີ 2018, ລັດຖະບານຮົງກາຣີ ໄດ້ໃຫ້ການຊ່ວຍເຫຼືອ ບັນເທົາທຸກໃຫ້ແກ່ ສປປ ລາວ ໂດຍສະໜອງ ແລະ ຕິດຕັ້ງເຄື່ອງຕອງນໍ້າສະອາດຈໍານວນ ໜຶ່ງ ໃຫ້ແກ່ປະຊາຊົນທີ່ປະສົບໄພພິບັດທໍາ ມະຊາດອັນຮ້າຍແຮງ ແລະ ບໍ່ເຄີຍມີມາກ່ອນ ຢູ່ແຂວງອັດຕະປືກໍ່ຄື ການສະແດງຄວາມ ເສຍໃຈ ແລະ ເຫັນໃຈຕໍ່ປະຊາຊົນໃນບັນດາ ແຂວງພາກໃຕ້ຂອງ ສປປ ລາວ ທີ່ໄດ້ຮັບຜົນ ກະທົບຈາກອຸທົກກະໄພ ທາງທໍາມະຊາດ ອັນຮ້າຍແຮງເມື່ອບໍ່ດົນມານີ້ ແລະ ຫວັງວ່າ ລັດຖະບານຮົງກາຣີທີ່ຈະສືບຕໍ່ໃຫ້ການ ຊ່ວຍເຫຼືອບັນເທົາທຸກແກ່ປະຊາຊົນລາວ ໃນ ແຂວງເຫຼົ່ານີ້.

ຈາກນັ້ນ ພະນະ ທ່ານ ຢາໂນສ ອາແດຣ ພ້ອມດ້ວຍ ຄະນະ ຍັງໄດ້ພົບປະກັບ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ທັງສອງຝ່າຍໄດ້ຕີລາຄາສູງຕໍ່ ການພົວພັນຮ່ວມມືສອງຝ່າຍ ທີ່ໄດ້ຮັບການ ເສີມຂະຫຍາຍໃນຫຼາຍດ້ານໃນໄລຍະ 50 ກວ່າປີຜ່ານມາເປັນຕົ້ນ ທາງດ້ານການ ເມືອງ, ການທູດ, ການພົບປະແລກປ່ຽນການຢ້ຽມ ຢາມຂອງການນໍາຂັ້ນສູງທັງສອງຝ່າຍ, ການຮ່ວມມື ດ້ານກະສິກຳ, ການສຶກສາ ແລະ ໃຫ້ເງິນກູ້ບໍ່ມີດອກເບ້ຍ (Tied Aid Credit) ສຳລັບ 3 ໄລຍະ ມູນຄ່າ 198,6 ລ້ານໂດລາສະຫະລັດ ສຳລັບໂຄງການ ກະສິກຳ, ໂຄງການບໍາບັດນໍ້າເປື້ອນແບບ ລວມສູນ ຢູ່ນະຄອນຫຼວງວຽງຈັນ ແລະ ໂຄງການຄຸ້ມຄອງປະຊາກອນແບບທັນສະ ໄໝ, ຊຶ່ງມີຄວາມສໍາຄັນຫຼາຍຕໍ່ການພັດທະ ນາເສດຖະກິດ-ສັງຄົມ ຂອງ ສປປ ລາວ ແລະ ຫວັງຢ່າງຍິ່ງວ່າ ລັດຖະບານຮົງກາຣີ ຈະສືບຕໍ່ພິຈາລະນາການສະໜັບສະໜູນທາງດ້ານເງິນກູ້ ໄລຍະ 4 ສໍາລັບໂຄງການກໍ່ສ້າງ ໂຮງໝໍແຂວງໄຊຍະບູລີ ຂອງກະຊວງສາທາ ລະນະສຸກ ແລະ ໂຄງການວຽກງານສະຖິຕິ ແຫ່ງຊາດ ຂອງກະຊວງແຜນການ ແລະ ການລົງທຶນ. 

ທັງສອງຝ່າຍໄດ້ຊຸກຍູ້ການຮ່ວມມືເພື່ອສົ່ງ ເສີມ SME, MSME ໃນ ສປປ ລາວ, ຊຶ່ງເຫັນວ່າ ຮົງກາຣີ ມີປະສົບການ ແລະ ປະສົບຜົນສໍາເລັດໃນຂະແໜງການດັ່ງກ່າວ. 

ຫຼັງຈາກນັ້ນ, ພະນະທ່ານ ຢາໂນສ ອາແດຣ ພ້ອມດ້ວຍຄະນະ ຍັງໄດ້ພົບປະກັບ ພະນະ ທ່ານ ນາງ ປານີ ຢ່າທໍ່ຕູ້, ປະທານສະພາ ແຫ່ງຊາດ, ທີ່ຫ້ອງການ ສະພາແຫ່ງຊາດ, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງສະພາ ແຫ່ງຊາດລາວ-ຮົງກາຣີ ໃຫ້ກ້າວຂຶ້ນສູ່ ລະດັບໃໝ່.

ນອກຈາກເຄື່ອນໄຫວພົບປະກັບການນໍາຂັ້ນສູງຂອງ ສປປ ລາວ ແລ້ວ ພະນະທ່ານປະ ທານາ ທິບໍດີ ຢາໂນສ ອາແດຣ ພ້ອມດ້ວຍ ຄະນະ ຍັງໄດ້ເຂົ້າຮ່ວມພິທີວາງພວງມະລາ ທີ່ອານຸສາວະລີນັກຮົບນິລະນາມ ແລະ ໄປຢ້ຽມຢາມຟາມເພາະພັນປານໍ້າຫຸມ, ຊຶ່ງເປັນໜຶ່ງໃນບັນດາໂຄງການຮ່ວມມື ລາວ-ຮົງກາຣີ, ພົບປະກັບສະມາຄົມມິດ ຕະພາບ ລາວ-ຮົງກາຣີ ແລະ ອະດີດນັກສຶກ ສາລາວ ທີ່ຮຽນຈົບມາຈາກ ຮົງກາຣີ ແລະ ໄດ້ທ່ຽວຊົມສະຖານທີ່ປະຫວັດສາດ ແລະ ວັດທະນະທຳຈຳນວນໜຶ່ງ ທີ່ນະຄອນຫຼວງ ວຽງຈັນ ແລະ ເດີນທາງໄປຢ້ຽມຢາມແຂວງ ຫຼວງພະບາງ.

ບົດຂ່າວ: ວຽງຈັນທາຍ

ພາບ: ຄຳພັນ

Related Articles

Leave a Reply