ຜູ້ປະກອບການທຸລະກິດນຳເຂົ້ານ້ຳມັນເຊື້ອໄຟ ຮຽກຮ້ອງໃຫ້ປະຊາຊົນຈົ່ງຢ່າພາກັນແຕກຕື່ນ ແລະ ຂໍໃຫ້ທຸກຄົນມີການແບ່ງປັນໃນການໃສ່ນ້ຳມັນຢູ່ຕາມປ້ຳຕ່າງໆ ເພື່ອບໍ່ໃຫ້ເກີດຄວາມວຸ້ນວາຍໃນສັງຄົມ.
ທ່ານ ຈັນທອນ ສິດທິໄຊ ປະທານ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ຖະແຫຼງຂ່າວຕໍ່ສື່ມວນຊົນໃນຕອນເຊົ້າຂອງວັນທີ 13 ພຶດສະພາ 2022 ນີ້ວ່າ:
ສະພາບຂາດແຄນນ້ຳມັນຢູ່ລາວ, ຕົວຈິງແລ້ວບໍ່ໄດ້ເຖິງຂັ້ນວິກິດ, ມັນອາດເກີດຈາກການແຕກຕື່ນຂອງປະຊາຊົນຫຼາຍກ່ວາ ຈື່ງພາກັນຫຼັ່ງໄຫຼໄປໃສ່ນ້ຳມັນຕາມປ້ຳຕ່າງໆໃນປະລິມານຫຼາຍ ຊຶ່ງບາງຄົນກໍເອົາກະຕຸກໄປໃສ່ເອົາເພື່ອກັກຕຸນ ຫຼື ຂາຍຕໍ່.
ປັດຈຸບັນພວກເຮົາເອງ ຮ່ວມກັບລັດຖະບານໄດ້ອອກມາແກ້ໄຂປັນຫາຫຼາຍດ້ານ ໂດຍໄດ້ເຮັດວຽກຮ່ວມກັບທະນາຄານກາງເພື່ອແກ້ໄຂບັນຫາຂາດແຄນເງິນຕາ,
ລັດຖະບານເອງກໍ່ໄດ້ມີການປະຊຸມຮ່ວມກັບທະນາຄານພາກທຸລະກິດໃນການສະໜອງເງິນຕາໃຫ້ບໍລິດສັດນຳເຂົ້ານຳ້ມັນອີກດ້ວຍ.
ລາວເຮົາເກີນດຸນການຄ້າໃນຊ່ວງໄລຍະ 3ເດືອນຕົ້ນປີ ຫຼາຍກ່ວາ 500 ລ້ານໂດລາສະຫະລັດ ສະນັ້ນສະກຸນເງີນບາດທີ່ມີຢູ່ລາວມັນພຽງພໍໃນການຮັບໃຊ້ສັງຄົມ ແຕ່ຍ້ອນຄວາມແຕກຕື່ນຂອງປະຊາຊົນເຮັດໃຫ້ມີການກັກຕຸນເງີນຕາ ແລະ ສີນຄ້າ ເຮັດໃຫ້ສະພາບການຈໍລະຈອນເງິນຢູ່ໃນລະບົບມີບັນຫາ ເຮັດໃຫ້ຜູ້ປະກອບການນຳເຂົ້ານຳ້ມັນແລກປ່ຽນບໍ່ໄດ້ ເຮັດໃຫ້ລາຄາເງີນກີບອ່ອນຄ່າໄປເລື້ອຍໆ, ຫຼາຍປ້ຳ, ຫຼາຍສະຖານີແລກເງີນບໍ່ໄດ້ກໍເລີຍນຳເຂົ້ານຳ້ມັນບໍ່ໄດ້.
ຮຽກຮ້ອງໃຫ້ປະຊາຊົນຢ່າໄດ້ແຕກຕື່ນ ເພື່ອບໍ່ໃຫ້ສັງຄົມເກີດຄວາມວຸ້ນວາຍ,
ຢາກໃຫ້ປະຊາຊົນມີການແບ່ງປັນກັນ ຖ້າພວກເຮົາມີການຈັດສັນ ແບ່ງປັນກັນນ້ຳມັນຈະພຽງພໍ.
ທ່ານ ຈັນທອນ ຍັງຮັບປະກັນວ່າ, ບໍລິສັດຈະຮ່ວມກັບສະມາຄົມນ້ຳມັນເຊື້ອໄຟຈະນຳເຂົ້າມາຈຳໜ່າຍໃນສັງຄົມບໍ່ຂາດ.
ປະເທດເຮົາບໍ່ທັນໄດ້ເກີດວິກິດໜັກຂະໜາດຂາດແຄນນ້ຳມັນ, ລາວໃຊ້ນຳ້ມັນພຽງແຕ່ 1.200 ລ້ານລິດ ຕໍ່ ປີ ສະເລ່ຍແລ້ວ 105 ລ້ານລິດ ຕໍ່ເດືອນ ຊຶ່ງຖ້າປຽບທຽບກັບປະເທດອື່ນຖືວ່າຍັງມີອັດຕາຊົມໃຊ້ໜ້ອຍຫຼາຍ ສະນັ້ນການນຳເຂົ້ານ້ຳມັນສະໜອງໃນປະເທດແມ່ນບໍ່ມີບັນຫາ.
ບໍລິສັດປີໂຕຣລ້ຽມເທຣດດິ້ງແມ່ນຜູ້ປະກອບການທຸລະກິດນ້ຳມັນເອກະຊົນລາຍໃຫ່ຍຢູ່ລາວ, ມີປ້ຳນ້ຳມັນບໍລິການ 150 ສະຖານີ ແລະ ສາງຄວບຄຸມນ້ຳມັນ ທົ່ວປະເທດ ຂໍຢືນຢັນ ແລະ ໃຫ້ຄຳໝັ້ນສັນຍາກັບສັງຄົມວ່າ: ພວກເຮົາຍັງສືບຕໍ່ນຳນ້ຳມັນມາຈຳໜ່າຍຕະຫຼອດປີ.
