Vientiane Times Lao
ຜົວ ອາຍຸ 66 ປີ ຄາດຕະກໍາເມຍ ອາຍຸ 55 ປີ ຍ້ອນຫຶງຫວງ

ຜົວ ອາຍຸ 66 ປີ ຄາດຕະກໍາເມຍ ອາຍຸ 55 ປີ ຍ້ອນຫຶງຫວງ

ທ້າວ ແຫຼ້ ອາຍຸ 66 ປີ ໄດ້ຄາດຕະກໍາເມຍ ຊື່ນາງ ຄໍາຫວານ ອາຍຸ 55 ປີ ເມື່ອວັນທີ 11 ພຶດສະພາ 2022 ທີ່ຜ່ານມາຍ້ອນຫຶງຫວງ ຜິດຖຽງກັນຮຸນແຮງ, ພາຍຫຼັງຄາດຕະກໍາຜູ້ກ່ຽວໄດ້ເອົາຕົວຫຼົບໜີໄປຢູ່ບ້ານນາຝາຍ ເມືອງທຸລະຄົມ ແຂວງວຽງຈັນ ສຸດທ້າຍຖືກຈັບ.

 ກ່ຽວກັບຄະດີດັ່ງກ່າວ, ທ່ານ ພັທ ບຸນມີ ກັນຕິຍະວົງ ຮອງຫົວໜ້າກອງບັນຊາການ ປກສ ເມືອງນາຊາຍທອງ ນະຄອນຫຼວງວຽງຈັນໄດ້ແຈ້ງໃຫ້ຮູ້ວ່າ: ເມື່ອວັນທີ 27 ມິຖຸນາ 2022, ໄດ້ຮັບແຈ້ງຈາກປະຊາຊົນບ້ານຜາງແຫ້ງວ່າ ໄດ້ພົບເຫັນຊາກສົບຄົນຢູ່ໜອງນໍ້າ ເຂດບ້ານຜາງແຫ້ງ ເມືອງນາຊາຍທອງ ນະຄອນຫຼວງວຽງຈັນ ຈຶ່ງໄດ້ແຕ່ງຕັ້ງກຳລັງລົງກວດກາສັນລະສູດຢູ່ສະຖານທີ່ເກີດເຫດ ພົບເຫັນຊາກສົບເປັນເພດຍິງ ແລະ ຊາບຊື່ໃນເວລາຕໍ່ມາ ຊື່ ນາງ ຄໍາຫວານ ອາຍຸ 55 ປີ ພັກເຊົາຢູ່ບ້ານຜາງແຫ້ງ ເມືອງນາຊາຍທອງ. ຫຼັງຈາກນັ້ນເຈົ້າໜ້າທີ່ຈິ່ງເກັບກໍາຂໍ້ມູນຫຼັກຖານເບື້ອງຕົ້ນຮູ້ໄດ້ວ່າ ນາງ ຄຳຫວານ ຖືກຜົວລົງມືຄາດຕະກໍາໃນວັນທີ 11 ພຶດສະພາ 2022 ທີ່ຜ່ານມາ, ຮອດເວລາ 14:00 ໂມງ ຂອງວັນ 27 ມິຖຸນາ 2022 ຫຼື ມື້ພົບສົບ ເຈົ້າໜ້າທີ່ສາມາດຕິດຕາມຈັບຕົວ ທ້າວ ແຫຼ້ ໄດ້ຢູ່ເຂດບ້ານນາຝາຍ ເມືອງທຸລະຄົມ ແຂວງວຽງຈັນ ມາດຳເນີນຄະດີ.

ຜ່ານການສືບສວນ ສອບສວນ ທ້າວ ແຫຼ້ ສາລະພາບວ່າ: ໄດ້ລົງມືຄາດຕະກໍານາງ ຄຳຫວານ ຜູ້ເປັນເມຍ ແທ້ສາເຫດເກີດມາຈາກ ການຫຶງຫວງ ຜິດຖຽງກັນ ຮຸນແຮງ, ມີການກະທົບທາງດ້ານຈິດໃຈ ຈົນບໍ່ສາມາດຢັບຢັ້ງຈິດໃຈຕົນ ເອງໄດ້ ຈຶ່ງລົງມືຄາດຕະກໍາເມຍ ດ້ວຍວິທີໃຊ້ມືກົດຫົວລົງໜອງນໍ້າຈຶ່ງເຮັດໃຫ້ຂາດອາກາດ ຫາຍໃຈ ເປັນເຫດໃຫ້ເມຍເສຍຊີວິດ; ຫຼັງຈາກນັ້ນ ກໍກັບຂຶ້ນໄປນອນ; ຕົກມາຮອດເວລາ 6:00 ໂມງ ຂອງວັນທີ 12 ພຶດສະພາ 2022 ເຫັນຊາກສົບຟູນໍ້າຂຶ້ນມາ ຈຶ່ງໄດ້ເອົາຊາກສົບໃສ່ກະສອບເປົາ ພ້ອມທັງເອົາດິນບ໋ອກສອງກ້ອນມັດໃສ່ສາຍເຫຼັກລວດເຕັງໄວ້, ແລ້ວໄປຍັດໃສ່ກ້ອງກະຊັງປາ ຈາກນັ້ນກໍເອົາຕົວຫຼົບໜີ ໄປຢູ່ແຂວງວຽງຈັນ ແລ້ວຖືກຈັບກຸມ.

ຂ່າວ: ປກສ ນະຄອນຫຼວງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ