Vientiane Times Lao
ພົບອີກແລ້ວ 1 ສົບຈາກເຮືອຫຼົ້ມຢູ່ເມືອງປະທຸມພອນ ແຂວງຈຳປາສັກ

ພົບອີກແລ້ວ 1 ສົບຈາກເຮືອຫຼົ້ມຢູ່ເມືອງປະທຸມພອນ ແຂວງຈຳປາສັກ

ໜ່ວຍກູ້ໄພ 1623 ແຂວງຈຳປາສັກໄດ້ ແຈ້ງໃຫ້ຮູ້ວ່າ ມື້ເຊົ້ານີ້ 09/09/2019 ໄດ້ພົບອີກ 1 ສົບຈາກຜູ້ປະສົບເຫດເຮືອຫຼົ້ມ 3 ຄົນພ້ອມກັນທີ່ຫ້ວຍວັງລຽງ ບ້ານຫຼັກ 24 ເມືອງປະທຸມພອນ ແຂວງຈຳປາສັກ ເຫດເກີດໃນມື້ວັນອັງຄານທີ 03/09/2019 ທີ່ຜ່ານມາຍ້ອນນ້ຳຖ້ວມກະທັນຫັນ.
ທ່ານ ຝຣັງ ສີນບັນດິດ ໄດ້ກ່າວຕໍ່ທີມ ງານນັກຂ່າວວຽງຈັນທາຍມື້ເຊົ້ານີ້ 9/9/2019 ວ່າ ສົບທີ່ພົບມື້ເຊົ້ານີ້ແມ່ນ ໄດ້ລອຍມາຟູຢູ່ໃກ້ຫ້ອງການບ້ານຫຼັກ 24 ເປັນເພດຊາຍ ຊື່ທ້າວຕີມ ອາຍຸ 45 ປີ ເປັນປະຊາຊົນ ບ້ານໃໝ່ ເມືອງໂພນທອງ ແຕ່ມາເຮັດສວນຢູ່ຫ້ວຍວັງລຽງ ເມືອງປະ ທຸມພອນ. ສະພາບສົບແມ່ນໃຄ່ໂພງແລະຟູຂຶ້ນ ຍ້ອນວ່າ ຜູ້ເສຍຊີວິດນີ້ໄດ້ສູນຫາຍມາແລ້ວ 7 ມື້. ສາຍເຫດແມ່ນເຮືອຫຼົ້ມແຕ່ວັນອັງຄານທີ 03/09/2019 ທີ່ຜ່ານມາ ມີ 3 ຄົນທີ່ຂີ່ເຮືອ ລຳດຽວກັນ ພາຍຫຼັງທີ່ມີຝົນຕົກແຮງ ມີນ້ຳຍື່ງຂຶ້ນ ແລະ ໄຫຼແຮງ, ໃນຂະນະທີ່ຂີ່ ເຮືອຈະຂ້າມນ້ຳໄປອີກຟາກໜຶ່ງເພື່ອຈະກັບ ບ້ານ ແຕ່ນ້ຳໄດ້ພັດເອົາເຮືອຫຼົ້ມ ເຮັດໃຫ້ທັງ 3 ຄົນສູນຫາຍ ແລະ ພົບສົບ 1 ຄົນໃນມື້ ຕໍ່ມາຊື່້ທາ້ວຕູ້ ອາຍຸ 28 ປີ, ຊຶ່ງໃນປະຈຸບັນ ນີ້ຍັງມີອີກ 1 ສົບທີ່ຍັງບໍ່ທັນພົບເຫັນ ຊື່ຂອງລາວແມ່ນທ້າວໃໝ່ ອາຍຸ 50 ປີ.
ທ່ານ ຝຣັງ ສີນບັນດິດໄດ້ກ່າວຕື່ມວ່າ ທັງ 3 ຄົນທີ່ເຮືອຫຼົ້ມດັ່ງກ່າວເປັນປະຊາຊົນບ້ານ ໃໝ່ ເມືອງ ໂພນທອງ ແຂວງຈຳປາສັກ ແຕ່ມາເຮັດໄຮ່ເຮັດສວນຢູ່ເມືອງ ປະທຸມພອນ. ສົບທີ່ພົບມື້ເຊົ້ານີ້ ທາງ ໜ່ວຍກູ້ໄພ 1623 ແຂວງຈຳປາສັກ ໄດ້ຂີ່ເຮືອໄປເກັບກູ້ ແລະ ໄດ້ມອບໃຫ້ຍາດ ຕິພີ່ນ້ອງໄປທຳພິທີທາງສາສະໜາແລ້ວ. ວຽກທີ່ໜ່ວຍກູ້ໄພ 1623 ແຂວງຈຳປາສັກ ໄດ້ເຮັດໃນປະຈຸບັນນີ້ແມ່ນໄດ້ຍົກຍ້າຍປະຊາຊົນອອກຈາກສູນອົບພະຍົກຊົ່ວຄາວຈຳ ນວນໜຶ່ງຈາກນ້ຳຖ້ວມ ກັບບ້ານ, ລຳລຽງ ນ້ຳດື່ມ ອາຫານໃຫ້ຜູ້ປະສົບໄພ ແລະ ຈຳນວນໜຶ່ງຍັງສືບຕໍ່ຢູ່ໃນສູນອົບພະຍົກ, ຍົກຍ້າຍປະຊາຊົນຜູ້ທີ່ໄດ້ຮັບບາດເຈັບ ຢູ່ສຸກສາລາມາໂຮງໝໍ ແຂວງ ແລະ ວຽກ ງານອື່ນໆ.
ຂ່າວ: ສົມພາວັນ
ພາບ: ໜ່ວຍກູ້ໄພ 1623 ແຂວງຈຳປາສັກ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ