ໃນໄລຍະເດືອນເມສາ 2025 ຜ່ານມານີ້, ທົ່ວປະເທດລາວ ມີຜູ້ເສຍຊີວິດເຖິງ 109 ຄົນ, ມີຜູ້ບາດເຈັບ 1,167 ຄົນ ແລະ ມີພາຫະນະເປ່ເພ 1,275 ຄັນ ຈາກອຸບັດເຫດເກີດຂຶ້ນທັງໝົດ 734 ຄັ້ງ, ແຕ່ເມື່ອທຽບໃສ່ກັບຜູ້ເສຍຊີວິດໃນເດືອນມີນາ ທີ່ຜ່ານມາ ເພີ່ມຂຶ້ນ 15 ຄົນ ຊຶ່ງມີຜູ້ເສຍຊີວິດ 94 ຄົນ.
ອີງຕາມຂໍ້ມູນການເກີດອຸບັດເຫດທົ່ວປະເທດປະຈຳເດືອນເມສາ 2025 ທີ່ຜ່ານມາ ຂອງກົມຕຳຫຼວດຈາລະຈອນ ວ່າ: ສະພາບອຸບັດເຫດຕາມທ້ອງຖະໜົນໃນຂອບເຂດທົ່ວປະເທດ ຍັງໜ້າເປັນຫ່ວງ ເຖິງແມ່ນວ່າເຈົ້າໜ້າທີ່ຕໍາຫຼວດ ຈະໃຊ້ມາດຕະການຕ່າງໆເພື່ອຫຼຸດຜ່ອນອຸບັດເຫດກໍ່ຕາມ, ຊຶ່ງສາຍເຫດທີ່ພາໃຫ້ເກີດອຸບັດເຫດແຕ່ລະຄັ້ງ ສ່ວນໃຫຍ່ເກີດຈາກການລະເມີດກົດລະບຽບການສັນຈອນຂອງຜູ້ຂັບຂີ່ ໂດຍສະເພາະຂັບຂີ່ໄວເກີນກຳນົດ, ດື່ມສິ່ງມຶນເມົາ ແລະ ອື່ນໆ, ໃນນັ້ນ ອຸບັດເຫດສ່ວນໃຫຍ່ແມ່ນເກີດຂຶ້ນ ນັບແຕ່ເວລາ 16:00-24:00 ໃນກຸ່ມອາຊີບກໍາມະກອນ, ນັກຮຽນ, ນັກສຶກສາ.
ຕໍ່ສະພາບການເກີດອຸບັດເຫດ ດັ່ງກ່າວ, ຂໍໃຫ້ທຸກຄົນໃນທົ່ວສັງຄົມ ຈົ່ງລະມັດລະວັງຕົວໃນການຂັບຂີ່, ໃຫ້ກຽດເຊິ່ງກັນ ແລະ ກັນຂອງຜູ້ຂັບຂີ່ ພ້ອມກັນປະຕິບັດກົດລະບຽບຈະລາຈອນໃຫ້ເຂັ້ມງວດ ເພື່ອເປັນການຊ່ວຍຫຼຸດຜ່ອນການເກີດອຸບັດເຫດ,ໂດຍສະເພາະໃນໄລຍະສະເຫຼີມສະຫຼອງ ບຸນປະເພນີ ຫຼື ເທສະການຕ່າງໆ ຈົ່ງມີສະຕິໃນການໄປ-ການມາ, ເມົາແລ້ວບໍ່ຄວນຂັບຂີ່ລົດ, ທັງນີ້ ກໍເພື່ອຮັບປະກັນບໍ່ ໃຫ້ເກີດອຸບັດເຫດຕາມທ້ອງຖະໜົນ.
