Vientiane Times Lao
ພຽງ 6 ວັນແຂວງຄໍາມ່ວນມີຜູ້ຕິດເຊື້ອ ໂຄວິດ-19 ໃນຊຸມຊົນເຖິງ 142 ຄົນ

ພຽງ 6 ວັນແຂວງຄໍາມ່ວນມີຜູ້ຕິດເຊື້ອ ໂຄວິດ-19 ໃນຊຸມຊົນເຖິງ 142 ຄົນ

ປັດຈຸບັນນີ້, ຈຳນວນຜູ້ຕິດເຊື້ອພະຍາດໂຄວິດ-19 ໃນຊຸມຊົນຢູ່ແຂວງຄໍາມ່ວນແມ່ນມີທ່າອ່ຽງເພີ່ມຂຶ້ນ, ພຽງ 6 ວັນນັບແຕ່ວັນທີ 10-15 ກັນຍາ 2021 ນີ້ມີຜູ້ຕິດເຊື້ອໃນຊຸມຊົນເຖິງ 142 ຄົນ ຊຶ່ງຜູ້ຕິດເຊື້ອສ່ວນຫຼາຍແມ່ນຢູ່ເມືອງທ່າແຂກ ແລະ ຍັັງກະຈາຍໄປເມືອງອື່ນໆອີກ ເນື່ອງຈາກວ່າມີຜູ້ຕິດເຊື້ອໃນຕະຫຼາດ, ໃນກຸ່ມພະນັກງານ ແລະ ເຈົ້າໜ້າທີ່ພາກສ່ວນຕ່າງໆຈໍານວນໜຶ່ງ, ບາງກໍລະນີມີຜູ້ຕິດເຊື້ອເຄື່ອນໄຫວໄປຫຼາຍທີ່, ມິການສໍາຜັດໃກ້ຊິດກັບຫຼາຍຄົນ ແລະ ຍັງບໍ່ສາມາດລະບຸໄດ້ຈະແຈ້ງ ແລະ ຊັດເຈນ. ສະນັ້ນການສືບຕໍ່ປິດການເຂົ້າ-ອອກພາຍໃນແຂວງ ອີກ 14 ວັນນັບແຕ່ວັນທີ 14-27 ກັນຍາ 2021 ນັ້ນ ຖືວ່າເປັນວິທີທີ່ດີທີ່ສຸດເພື່ອປ້ອງກັນພະຍາດດັ່ງກ່າວບໍ່ໃຫ້ແຜ່ລາມເປັນວົງກວ້າງ.

ເຈົ້າແຂວງຄໍາມ່ວນໄດ້ອອກຄໍາສັ່ງເມື່ອວັນທີ 14 ກັນຍາ 2021 ທີ່ຜ່ານມາເຖິງທຸກຊັ້ນຄົນພາຍໃນແຂວງ ໂດຍມີເນື້ອໃນບາງຕອນທີ່ສໍາຄັນວ່າ: ໃຫ້ປະຕິບັດຄໍາສັ່ງນາຍົກລັດຖະມົນຕີ 15/ນຍ, ຫ້າມຄົນຢູ່ແຂວງຄໍາມ່ວນເດີນທາງອອກຈາກແຂວງ ແຕ່ຖ້າມີຄວາມຈໍາເປັນຕ້ອງໄດ້ຮັບອະນຸຍາດຈາກຄະນະສະເພາະກິດ, ສັກຢາວັກຊິນຄົບ 2 ເຂັມ, ຫ້າມຄົນ ແລະ ນິຕິບຸກຄົນຈາກແຂວງອື່ນເດີນທາງເຂົ້າແຂວງຄໍາມ່ວນ, ຫ້າມລົດຂົນສົ່ງສິນຄ້າ, ລົດໂດຍສານ, ລົດບຸກຄົນທີ່ເດີນທາງຜ່ານແຂວງຄໍາມ່ວນຈອດເອົາຄົນຂຶ້ນ-ລົງຢູ່ແຂວງຄໍາມ່ວນຢ່າງເດັດຂາດ, ຫ້າມທຸກຊັ້ນຄົນທີ່ຢູ່ບ້ານແດງອອກຈາກເຮືອນເດັດຂາດ, ໃຫ້ປິດການສັນຈອນພາຍໃນເທດສະບານເມືອງທ່າແຂກ ແລະ ເທດສະບານເມືອງອື່ນໆທີ່ມີຜູ້ຕິດເຊື້ອ ນັບແຕ່ເວລາ 21 ໂມງ 00 ຫາ 5 ໂມງ 00, ບັນດາເມືອງທີ່ບໍ່ມີຜູ້ຕິດເຊື້ອພະຍາດດັ່ງກ່າວ ອະນຸຍາດໃຫ້ເດີນທາງພາຍໃນເມືອງຂອງຕົນໄດ້ ແຕ່ຕ້ອງປະຕິບັດມາດຕະການປ້ອງກັນພະຍາດໂຄວິດ-19.

ຄໍາສັ່ງດັ່ງກ່າວຍັງໄດ້ລະບຸໄວ້ຕື່ມອີກວ່າ: ຫ້າມຈັດກອງປະຊຸມ, ໂຮມຊຸມນຸມ, ພິທີທາງສາດສະໜາ, ງານບຸນປະເພນີ, ງານດອງ, ງານລ້ຽງສັງສັນ ແລະ ງານຊຸມແຊວຕ່າງໆຢ່າງເດັດຂາດ, ໃຫ້ສືບຕໍ່ປິດຕະຫຼາດຫຼັກ 2, ຕະຫຼາດຫຼັກ 3, ຕະຫຼາດ ເພັດມະນີ, ຕະຫຼາດນາໂບ, ຕະຫຼາດກາງຄືນ, ໂຮງແຮມ, ບ້ານພັກ, ຮ້ານກິນດື່ມ, ຮ້ານຄາຣາໂອໂກະ ຮ້ານອິນເຕີເນັດ, ຮ້ານບໍລິການນວດ, ຮ້ານເສີມສວຍ, ຮ້ານຕັດຜົມ, ສວນນໍ້າ, ສະຖານທີ່ອອກກໍາລັງກາຍ, ເດີ່ນກິລາກາງແຈ້ງ ແລະ ໃນຮົ່ມ, ສັງວຽນໄກ່, ຂາຍເລກ, ຫ້ອງກວດພະຍາດເອກະຊົນ, ຄິວລົດພາຍໃນແຂວງ-ຕ່າງແຂວງ, ສືບຕໍ່ປິດການຮຽນ-ການສອນທຸກສະຖາບັນການສຶກສາ, ອະນຸຍາດໃຫ້ຮ້ານຂາຍເຄື່ອງອຸປະໂພກ ແລະ ບໍລິໂພກ, ຮ້ານຂາຍສິນຄ້າ, ຮ້ານຂາຍເຄື່ອງກໍ່ສ້າງ ທີ່ບໍ່ຢູ່ເຂດບ້ານແດງສາມາດເປີດບໍລິການໄດ້ແຕ່ຕ້ອງປະຕິບັດມາດຕະການປ້ອງກັນພະຍາດໂຄວິດ-19, ຫ້າມພໍ່ຄ້າ-ແມ່ຄ້າ ຂາຍເຄື່ອງດື່ມມຶນເມົາ ແລະ ຫ້າມສວຍໂອກາດຂຶ້ນລາຄາສິນຄ້າ ແລະ ຄໍາສັ່ງອື່ນໆ.

ຂ່າວ: ວຽງຈັນທາຍ   

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ