Visit BigblueAgency
ມວນຊົນ ຮ່ວມແຫ່ພຣະພຸດທະຮູບມິ່ງເມືອງລາວສະຫຼອງປີໃໝ່ລາວ 2024

ມວນຊົນ ຮ່ວມແຫ່ພຣະພຸດທະຮູບມິ່ງເມືອງລາວສະຫຼອງປີໃໝ່ລາວ 2024

ໃນຕອນບ່າຍຂອງວັນທີ 13 ເມສາ 2024 ນີ້, ເປັນມື້ສັງຂານລ່ວງ, ເປັນມື້ທຳອິດ ຂອງການສະເຫຼີມສະຫຼອງບຸນປີໃໝ່ລາວ ພສ 2567 ສະເພາະຢູ່ນະຄອນຫຼວງວຽງຈັນ ໄດ້ຈັດຫຼາຍກິດຈະກຳ ໂດຍສະເພາະ ກິດຈະກຳ ແຫ່ພຣະພຸດທະຮູບມິ່ງເມືອງລາວ ເພື່ອໃຫ້ມວນຊົນຊາວນະຄອນຫຼວງວຽງຈັນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ຮ່ວມຫົດສົງ ເພື່ອເປັນສີລິມຸງຄຸນໃຫ້ກັບຕົນເອງ-ຄອບຄົວ ເຊິ່ງເປັນກິດ ຈະກຳທີ່ສ້າງຄວາມສົນໃຈ ໃຫ້ມວນຊົນ ເຂົ້າຮ່ວມເປັນຈຳນວນຫຼາຍ.

ພິທີແຫ່ພຣະພຸດທະຮູບມິ່ງເມືອງລາວ ດັ່ງກ່າວ, ເລີ່ມຈາກໜ້າວັດອິນແປງ ໄປ ຕາມເສັ້ນທາງ ເສດຖາທິລາດ-ລ້ຽວຂວາເຂດຫໍພະແກ້ວ, ລ້ຽວຂວາຂ້າງຫໍຄໍາ ໄປຫາວັດອິນແປງ ໃນນັ້ນ, ເລີ່ມຕົ້ນດ້ວຍ ຂະບວນແຫ່ຂອງຂອງ ພຣະສົງ, ຕາມດ້ວຍຂະບວນລາດຊະລົດ ພຣະພຸດທະຮູບມິ່ງເມືອງ, ຂະບວນລົດນໍ້າມົນ ຫົດສົງ-ສີດນໍ້າມົນ ໂດຍພະອາ ຈານ, ຂະບວນລົດພາບາສີສູ່ຂວັນ ຮັບໂຊກ-ຮັບໄຊ ທີ່ເປັນມູນເຊື້ອມາແຕ່ບູຮານນະການ ເປັນພິທີສຳຄັນ, ຂະບວນແຫ່ຂອງເຖົ້າແກ່, ແນວໂຮມ, ຜູ້ຊົງຄຸນວຸທິ, ບັນດາຊັ້ນຄົນ, ຂະບວນແຫ່ ລົດມະໂຫລີ ແລະ ຂະບວນແຫ່ ລົດແຄນລາວ, ຂະບວນແຫ່ ສິລະປະ-ວັດທະນະທຳ, ຂະບວນແຫ່ ຂອງຂົງເຂດການເມືອງ-ການປົກຄອງ, ວັດທະນະທຳ-ສັງຄົມ, ຂົງເຂດເສດຖະກິດ, ຂະບວນແຫ່ ຂອງ 9 ຕົວເມືອງ, ຂະບວນແຫ່ຂອງ ປກຊ-ປກສ, ອົງການຈັດຕັ້ງມະ ຫາຊົນ, ບ້ານວັດທະນະທຳ ນາຊາຍທອງ ແລະ ມວນຊົນ.

ໃນໂອກາດດຽວກັນ, ກໍໄດ້ມີພິທີເປີດງານປີໃໝ່ລາວ ພສ 2567 ຢ່າງເປັນທາງການ ຕິດພັນກັບປີທ່ອງທ່ຽວລາວ 2024 ຢູ່ຕໍ່ໜ້າສວນນ້ຳພຸ ບ້ານຊຽງຍືນ ເມືອງຈັນທະບູລີ ນະຄອນຫຼວງວຽງຈັນ. ທັງນີ້, ກໍເພື່ອເປັນການອະນຸລັກຮັກສາວັດທະນະທຳ ແລະ ຮີດຄອງປະເພນີອັນດີງາມ ຂອງບຸນປີໃໝ່ລາວ ຕິດພັນກັບປີທ່ອງທ່ຽວລາວ 2024 ຢູ່ນະຄອນຫຼວງວຽງຈັນ ໃຫ້ຖືກຕ້ອງ, ມີບັນຍາກາດຟົດຟື້ນເບີກບານມ່ວນຊື່ນ ເພື່ອຊຸກຍູ້ສົ່ງເສີມກິດຈະ ກຳການທ່ອງທ່ຽວໃຫ້ມີຄວາມຫຼາກຫຼາຍ ທັງຮັກສາໄດ້ຄຸນຄ່າວັດທະນະທຳທີ່ເປັນເອກະລັກ ຂອງຊາດ, ຂອງຊາວນະຄອນຫຼວງວຽງຈັນ ແນໃສ່ດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ອງທ່ຽວ ສປປ ລາວ ກໍຄື ນະຄອນຫຼວງວຽງຈັນ ໃຫ້ຫຼາຍຂຶ້ນ.

ຂ່າວ: ທະນູທອງ ພາບ: ອ່າຍຄຳ

 

Related Articles

Leave a Reply