ພິທີມອບ-ຮັບໜ້າທີ່ ການນຳຂັ້ນສູງຂອງກະຊວງ ການຕ່າງປະເທດ ລະຫວ່າງ ທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ, ເລຂາຄະນະພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕາງປະເທດ (ຜູ້ເກົ່າ) ແລະ ທ່ານ ທອງສະຫວັນ ພົມວິຫານ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການ ຕ່າງປະເທດ (ຜູ້ໃໝ່), ໂດຍການເປັນປະທານຂອງທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ, ມີບັນດາຮອງລັດຖະມົນຕີ, ຫົວໜ້າກົມ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະພົວພັນຕ່າງປະເທດສູນກາງພັກ ພ້ອມດ້ວຍພະນັກງານ-ລັດຖະກອນ ຂອງກະຊວງການຕ່າງປະເທດ ເຂົ້າຮ່ວມ, ໃນຕອນເຊົ້າວັນທີ 26 ພະຈິກ 2024 ທີ່ກະຊວງການຕ່າງປະເທດ.
ໃນໂອກາດນີ້, ທ່ານ ທອງຈັນ ໂຂງພູມຄຳ ຮອງຫົວໜ້າຄະນະຈັດຕັ້ງສູນກາງພັກ ຕາງໜ້າໃຫ້ຄະນະຈັດຕັ້ງສູນກາງພັກ ໄດ້ຜ່ານດຳລັດຂອງນາຍົກລັດຖະມົນຕີ ວ່າດ້ວຍການຍົກຍ້າຍສະມາຊິກຂອງລັດຖະບານ ໂດຍຍົກຍ້າຍ ທ່ານ ສະເຫຼີມໄຊ ກົມມະສິດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄປຮັບໜ້າທີ່ ຮອງນາຍົກລັດຖະມົນຕີ ຢູ່ສຳນັກງານນາຍົກລັດຖະມົນຕີ ແລະ ຜ່ານມະຕິຂອງ ກົມການເມືອງສູນກາງພັກ ແລະ ດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ທ່ານ ທອງສະຫວັນ ພົມວິຫານ ກຳມະການສູນກາງພັກ ເປັນ ເລຂາຄະນະພັກກະຊວງ, ລັດຖະມົນ ຕີກະຊວງການຕ່າງປະເທດ.
ໃນພິທີດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ສະຫຼູບຜົນງານການເຄື່ອນໄຫວການນໍາພາ-ຊີ້ນຳໄລຍະ 9 ປີກວ່າ ທີ່ຜ່ານມາ ໃນຖານະເປັນລັດຖະມົນຕີກະຊວງການຕ່າງປະເທດ ໂດຍຍົກໃຫ້ເຫັນຜົນສຳເລັດໃນຫຼາຍດ້ານ ໃນການເຮັດໜ້າທີ່ເປັນເສນາທິການໃຫ້ແກ່ລັດຖະບານຢ່າງລວມສູນ ໃນວຽກງານການຕ່າງປະເທດ ທັງໃນຂອບສອງຝ່າຍ ແລະ ຫຼາຍຝ່າຍ ລວມທັງການເຮັດໜ້າທີ່ ເປັນປະທານອາຊຽນ ເຖິງ 2 ຄັ້ງ ຄື: ປີ 2016 ແລະ 2024 ເຊິ່ງເປັນການປະກອບສ່ວນຢ່າງຕັ້ງໜ້າເຂົ້າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ບົດບາດຂອງ ສປປ ລາວ ສູງເດັ່ນຂຶ້ນເປັນກ້າວໆມາ ແລະ ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈຕໍ່ການນຳ ພັກ-ລັດ ທີ່ສືບຕໍ່ໃຫ້ຄວາມເຊື່ອໝັ້ນ ແລະ ໄວ້ວາງໃຈ ມອບໝາຍໜ້າທີ່ໃໝ່ຂອງລັດຖະບານ ໃນຖານະເປັນ ຮອງນາຍົກລັດຖະມົນຕີ ເພື່ອນຳພາ-ຊີ້ນຳ ວຽກລວມຂອງລັດຖະບານ ຕາມການມອບໝາຍ.
ຈາກນັ້ນ, ທ່ານ ທອງສະຫວັນ ພົມວິຫານ ໄດ້ກ່າວຮັບໜ້າທີ່ໃໝ່ ໂດຍຕີລາຄາສູງຕໍ່ຜົນສຳເລັດຂອງ ກະຊວງ ການຕ່າງປະເທດ ໃນໄລຍະຜ່ານມາ ພາຍໃຕ້ການນຳພາ-ຊີ້ນຳຂອງ ສະຫາຍລັດຖະມົນຕີກະຊວງການຕ່າງປະເທດຜູ້ເກົ່າ ແລະ ໄດ້ໃຫ້ຄຳໝັ້ນສັນຍາວ່າ ຈະອຸທິດເຫື່ອແຮງ ແລະ ສະຕິປັນຍາສືບຕໍ່ປະຕິບັດໜ້າທີ່ເປັນເສນາທິການໃຫ້ແກ່ລັດຖະບານໃນວຽກງານການຕ່າງປະເທດ ເພື່ອປະຕິບັດແນວທາງການຕ່າງປະເທດ ໃຫ້ໄດ້ຮັບຜົນສຳເລັດ ແລະ ມີບາດກ້າວຂະຫຍາຍຕົວຍິ່ງໆຂຶ້ນໄປ.
ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ທີ່ໄດ້ຕາງໜ້າໃຫ້ກົມການເມືອງສູນກາງພັກ ເຂົ້າຮ່ວມພິທີດັ່ງກ່າວ, ໄດ້ສະແດງຄວາມຍິນດີ, ຊົມເຊີຍ ແລະ ຕີລາຄາສູງຕໍ່ບັນດາຜົນງານອັນພົ້ນເດັ່ນຂອງວຽກງານການຕ່າງປະເທດຍາດມາໄດ້ ໃນໄລຍະ ຫຼາຍກວ່າ 9 ປີ ຜ່ານມາ ໂດຍພາຍໃຕ້ການນຳພາ-ຊີ້ນຳ ຂອງທ່ານ ສະເຫຼີມໄຊ ກົມມະສິດ ທີ່ເປັນລັດຖະມົນຕີກະຊວງ ການຕ່າງປະເທດ ເຖິງແມ່ນວ່າສະພາບການພາກພື້ນ ແລະ ສາກົນ ໄດ້ສືບຕໍ່ຜັນແປໄປຢ່າງສັບສົນ ແລະ ສະຫຼັບສັບຊ້ອນ ແຕ່ໂດຍພາຍໃຕ້ການນຳພາ-ຊີ້ນຳອັນເຂັ້ມແຂງຂອງ ສະຫາຍ ລັດຖະມົນຕີ ສະເຫຼີມໄຊ ກົມມະສິດ ໄດ້ເຮັດໃຫ້ຂະແໜງ ການຕ່າງປະເທດ ສາມາດເຮັດສຳເລັດໜ້າທີ່ການເມືອງອັນໜັກໜ່ວງຂອງຕົນ ແລະ ຍາດມາໄດ້ຜົນງານທີ່ພົ້ນເດັ່ນຫຼາຍດ້ານ ເຊິ່ງສະແດງອອກ ໃຫ້ເຫັນການພົວພັນຮ່ວມມືກັບສາກົນນັບມື້ນັບກວ້າງຂວາງ ແລະ ເຂົ້າສູ່ລວງເລິກ. ພິເສດ, ແມ່ນການເຮັດໜ້າທີ່ ການເປັນປະທານອາຊຽນ ຂອງ ສປປ ລາວ 2 ຄັ້ງ ຄື: ປີ 2016 ແລະ 2024 ທີ່ໄດ້ຮັບຜົນສຳເລັດຢ່າງຈົບງາມ. ຜົນສຳເລັດທັງໝົດນັ້ນ, ໄດ້ປະກອບສ່ວນອັນສຳຄັນເຂົ້າໃນການສ້າງສະພາບແວດລ້ອມພາຍນອກທີ່ເອື້ອອຳນວຍໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ, ເຮັດໃຫ້ລະບອບການເມືອງມີສະຖຽນລະພາບ, ສັງຄົມມີຄວາມສະຫງົບປອດໄພ ແລະ ເສດຖະກິດ ໄດ້ຮັບການພັດທະນາເຕີບໃຫຍ່ເຂັ້ມແຂງຂຶ້ນເປັນກ້າວໆ ອັນເປັນພື້ນຖານທີ່ໜັກແໜ້ນໃຫ້ແກ່ການເຊື່ອມໂຍງກັບພາກພື້ນ ແລະ ສາກົນ ເຮັດໃຫ້ຖານະຊື່ສຽງຂອງ ສປປ ລາວ ໃນເວທີພາກພື້ນ ແລະ ສາກົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ ແລະ ເຊື່ອໝັ້ນວ່າລັດຖະມົນຕີກະຊວງການຕ່າງປະເທດຜູ້ໃໝ່ ເຊິ່ງເຄີຍໄດ້ປະຕິບັດໜ້າທີ່ວຽກງານຢູ່ກະຊວງການຕ່າງປະເທດມາກ່ອນ ຈະພ້ອມກັນກັບໝູ່ຄະນະຍົກສູງຄວາມຮັບຜິດຊອບ, ສືບຕໍ່ເຮັດສຳເລັດໜ້າ ທີ່ການເມືອງ-ການຕ່າງປະເທດທີ່ພັກ-ລັດ ແລະ ປະຊາຊົນມອບໝາຍໃຫ້ຢ່າງມີຜົນສຳເລັດ.
ຂ່າວ: ກົມການຂ່າວ ກະຊວງການຕ່າງປະເທດ
