Vientiane Times Lao
ມະຫາວິທະຍາໄລຊົນເຜົ່າກວາງຊີ ມອບໃບປະກາສະນີຍະບັດປະລິນຍາເອກກິດຕິມະສັກໃຫ້ແກ່ ທ່ານ ທອງລຸນ ສີສຸລິດ

ມະຫາວິທະຍາໄລຊົນເຜົ່າກວາງຊີ ມອບໃບປະກາສະນີຍະບັດປະລິນຍາເອກກິດຕິມະສັກໃຫ້ແກ່ ທ່ານ ທອງລຸນ ສີສຸລິດ

ມື້ສຸດທ້າຍຂອງການຢ້ຽມຢາມ ສປ ຈີນ ໃນວັນທີ 1 ທັນວາ 2022 ທີ່ຜ່ານມາ ຂອງ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ ປະທານ ປະເທດ ແຫ່ງ ສປປ ລາວ ແລະ ຄະນະ, ມະຫາວິທະຍາໄລຊົນເຜົ່າກວາງຊີ ໄດ້ຈັດພິທີມອບໃບປະກາສະນິຍະບັດ ປະລິນຍາເອກກິດຕິມະສັກ ສາຂາພາສາ ແລະ ວັນນະຄະດີຕ່າງປະເທດໃຫ້ແກ່ ທ່ານ ທອງລຸນ ສີສຸລິດ ທີ່ນະຄອນຫຼວງປັກກິ່ງ ສປ ຈີນໂດຍມີ ທ່ານ ເຊ້ຊາງໂກ ຜູ້ອຳນວຍການໃຫຍ່ ມະຫາວິທະຍາໄລຊົນເຜົ່າກວາງຊີເປັນຜູ້ມອບໃບປະກາດດັ່ງກ່າວ.

ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ມີຄໍາເຫັນວ່າ: ໃບປະກາສະນີຍະບັດປະລິນຍາເອກນີ້ ຈະເປັນອີກນິມິດໝາຍທີ່ສຳຄັນຍິ່ງ ໃຫ້ແກ່ການມາຢ້ຽມ ຢາມທາງ ລັດຖະກິດ ສປ ຈີນ ໃນຄັ້ງນີ້ ກໍຄື ໃນນາມສ່ວນຕົວຂອງຂ້າພະເຈົ້າເອງ, ເປັນການສະແດງໃຫ້ເຫັນເຖິງໄມຕິຈິດມິດຕະພາບອັນເລິກເຊິ່ງ ແລະ ເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນ ຄູ່ຮ່ວມມືຍຸດທະສາດ ຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການສ້າງຄູ່ຮ່ວມຊາຕາກໍາ ລະຫວ່າງ ສອງພັກ, ສອງລັດ ກໍຄື ປະຊາຊົນສອງຊາດ ລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍ ດ້ວຍຄຸນນະພາບ ໃໝ່ຢ່າງບໍ່ຢຸດຢັ້ງ ທັງໃນລວງເລິກ ແລະ ລວງກວ້າງ.

ມະຫາວິທະຍາໄລຊົນເຜົ່າກວາງຊີ ເປັນມະຫາວິທະຍາໄລທີ່ເກົ່າ ແກ່, ມີຊື່ສຽງ ແລະ ມີປະຫວັດຄວາມເປັນມາຢ່າງຍາວນານແຫ່ງໜຶ່ງຂອງ ສປ ຈີນ, ເປັນສະຖາບັນການສຶກສາສຳຄັນ ທີ່ໄດ້ກໍ່ສ້າງຊັບພະຍາກອນມະນຸດທີ່ມີຄວາມຮູ້ ຄວາມສາມາດ ແລະ ມີວິໄສທັດອັນກວ້າງໄກ ຫຼາຍຮຸ່ນຄົນມາແລ້ວ. ນອກຈາກນີ້, ມະຫາວິທະຍາໄລຊົນເຜົ່າຊົນກວາງຊີ ຍັງມີການຮ່ວມມືຢ່າງກວ້າງຂວາງກັບ ສປປ ລາວ ບໍ່ວ່າຈະເປັນການຮ່ວມມືທາງດ້ານວິຊາການ, ການແລກປ່ຽນການຮຽນ-ການສອນ ແລະ ການສະໜັບສະໜູນການພັດທະນາຊັບພະຍາກອນມະນຸດ ກັບ ມະຫາວິທະຍາໄລຂອງລາວ ໂດຍສະເພາະແມ່ນໄດ້ສ້າງຕັ້ງສະຖາບັນຂົງຈື້ ຢູ່ ສປປ ລາວ (ໃນປີ 2007). ຂ້າພະເຈົ້າ ຫວັງເປັນຢ່າງຍິ່ງວ່າ ມະຫາວິທະຍາໄລຊົນເຜົ່າກວາງຊີ ຈະສືບຕໍ່ເພີ່ມທະວີໃຫ້ການຮ່ວມມືກັບສະຖາບັນການສຶກສາຂອງ ສປປ ລາວ ເພື່ອຊ່ວຍຍົກສູງຄຸນນະພາບ ການຮຽນ, ການສອນ ແລະ ການຄົ້ນຄວ້າວິໄຈຕ່າງໆ ໃຫ້ໄດ້ຕາມມາດຕະຖານສາກົນ ເທື່ອລະກ້າວ.

ມະຫາວິທະຍາໄລຊົນເຜົ່າກວາງຊີໄດ້ເສີມຂະຫຍາຍທ່າແຮງທີ່ເປີດປະຕູສູ່ບັນດາປະເທດສະມາຊິກອາຊຽນ, ໄດ້ມີ ການແລກປ່ຽນ ແລະ ຮ່ວມມືກັບມະຫາວິທະຍາໄລ ແລະ ອົງການຈັດຕັ້ງການສຶກສາຕ່າງໆ ທັງໝົດ 176 ແຫ່ງຂອງ 22 ປະເທດ ແລະ ເຂດແຄ້ວນໃນທົ່ວໂລກ, ມາຮອດປັດຈຸບັນ ໄດ້ຮັບນັກສຶກສາຕ່າງປະເທດຈາກ 82 ປະເທດ ແລະ ເຂດແຄວ້ນ ຈຳນວນຫຼາຍກວ່າ 22.000 ຄົນ ແລະ ໄດ້ສົ່ງນັກສຶກສາຈີນຫຼາຍກວ່າ 18.000 ຄົນໄປຮຽນຢູ່ປະເທດ ຕ່າງໆໃນທົ່ວໂລກ.

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ