Vientiane Times Lao
ມີຄວາມສ່ຽງທີ່ຈະເກີດການລະບາດໂຄວິດ-19 ຮອບໃໝ່ ຖ້າບໍ່ປະຕິບັດວິທີການປ້ອງກັນຢ່າງເຂັ້ມງວດ

ມີຄວາມສ່ຽງທີ່ຈະເກີດການລະບາດໂຄວິດ-19 ຮອບໃໝ່ ຖ້າບໍ່ປະຕິບັດວິທີການປ້ອງກັນຢ່າງເຂັ້ມງວດ

ຄະນະສະເພາະກິດ ສະແດງຄວາມເປັນຫ່ວງ ເມື່ອສັງເກດເຫັນວ່າ ການປະຕິບັດແຈ້ງການເລກທີ 580/ຫສນຍ ແມ່ນຍັງເຮັດບໍ່ທັນໄດ້ດີ ເປັນຕົ້ນແມ່ນການປະຕິບັດມາດຕະການປ້ອງກັນການຕິດເຊື້ອພະຍາດ ຢູ່ໂຮງຮຽນ, ສະຖານີຂົນສົ່ງໂດຍສານ, ຮ້ານຄ້າຂາຍຍ່ອຍ ແລະ ສັງເກດເຫັນວ່າ ຍັງມີການຊຸມແຊວ, ກິນດື່ມສິ່ງມຶນເມົາເປັນກຸ່ມຄົນ ເຊິ່ງຈະມີຄວາມສ່ຽງຕໍ່ການຕິດເຊື້ອໂຄວິດ-19.

ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ຜູ້ປະຈໍາການ ຄະນະສະເພາະກິດ ໄດ້ກ່າວໃນໂອກາດຖະແຫຼງຂ່າວໃນຕອນບ່າຍມື້ນີ້ວ່າ ການຜ່ອນຜັນມາດຕະການ ຕ່າງໆ ແມ່ນນະໂຍບາຍ ຂອງພັກ-ລັດຖະບານ ທີ່ເປັນຫ່ວງເປັນໃຍຕໍ່ຜົນກະທົບດ້ານຊີວິດການເປັນຢູ່ຂອງພໍ່ແມ່ປະຊາຊົນ ແລະ ດ້ານເສດຖະກິດ-ສັງຄົມ ຊຶ່ງເປັນໂອກາດໃຫ້ພາກທຸລະກິດກໍ່ຄືພໍ່ແມ່ປະຊາຊົນບັນດາເຜົ່າໄດ້ ກັບຄືນມາດຳເນີດກິດຈະການ ຫຼື ດໍາເນີນຊີວິດເປັນປົກກະຕິ ເທື່ອລະກ້າວ. 

ແຕ່ພ້ອມດຽວກັນນີ້ ກໍ່ເປັນໂອກາດທີ່ຈະມີຄວາມສ່ຽງ ທີ່ຈະເກີດການລະບາດຮອບໃໝ່ ຖ້າຫາກວ່າພວກເຮົາບໍ່ປະຕິບັດວິທີການປ້ອງກັນການຕິດເຊື້ອຢ່າງເຂັ້ມງວດ ໂດຍສະເພາະຢູ່ສະຖານທີ່ໃຫ້ບໍລິການ, ພາຫານະໃຊ້ບໍລິການ, ຜູ້ໃຫ້ບໍລິການ ແລະ ຜູ້ມາໃຊ້ບໍລິການ ເປັນຕົ້ນແມ່ນ ການປະຕິບັດຫຼັກການອະນາໄມ, ການທໍາຄວາມສະອາດຂ້າເຊື້ອ ພະຍາດຢູ່ສະຖານທີ່ບໍລິການ, ການແທກອຸນຫະພູມຮ່າງກາຍ, ການລ້າງມືດ້ວຍນໍ້າສະອາດໃສ່ສະບູ ຫຼື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ບໍ່ໃຫ້ມີການແອອັດ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ທັງໝົດນີ້ໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນ. ພວກເຮົາຈຶ່ງຈະສາມາດສະກັດກັ້ນ ການແຜ່ລະບາດຂອງພະຍາດໂຄວິດ-19 ບໍ່ໃຫ້ກັບຄືນມາຮອບໃໝ່.

ຮສ ດຣ. ພູທອນ ເມືອງປາກ ກ່າວຕື່ມວ່າ ອາທິດຈະມານີ້, ຄະນະສະເພາະກິດ ກໍ່ຈະໄດ້ປະເມີນສະຖານະການຄືນໃໝ່ ເພື່ອສະເໜີລັດຖະບານພິຈາລະນາຜ່ອນຜັນບາງມາດຕະການຕື່ມອີກ.

ຂ່າວ: ວຽງຈັນທາຍ 

 

Related Articles

Leave a Reply