ພຽງ 9 ເດືອນຂອງປີ 2024 ນີ້, ປະເທດລາວມີຜູ້ຕິດເຊື້ອເຮສໄອວີ 1,523 ຄົນ, ໃນນີ້ 53% ແມ່ນກຸ່ມໄວໜຸ່ມ ອາຍຸລະຫວ່າງ 15-29 ປີ.
ທ່ານ ດຣ. ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ໄດ້ມີຄໍາເຫັນ ເມື່ອມໍ່ໆມານີ້ ເນື່ອງໃນໂອກາດວັນສາກົນຕ້ານເອດ ວັນທີ 1 ທັນວາວ່າ: ອີງໃສ່ການຄາດຄະ ເນທາງດ້ານລະບາດວິທະຍາຂອງອົງການສະຫະປະຊາຊາດຕ້ານເອດ (UNAIDS) ໃນປີ 2024 ເຫັນວ່າ ສປປ ລາວ ຍັງມີອັດຕາການຕິດເຊຶ້ອເຮສໄອວີໃນກຸ່ມປະຊາກອນທົ່ວໄປ ແມ່ນ 0.42% ເພີ່ມຂຶ້ນຈາກປີ 2023 ທີ່ມີ 0.39%; ຄາດຄະເນຈຳນວນສະສົມຜູ້ຕິດເຊຶ້ອ ເຮສໄອວີປະມານ 20,000 ຄົນ, ສ່ວນຫຼາຍແມ່ນກຸ່ມອາຍຸລະຫວ່າງ 15-49 ປີ; ຊຶ່ງສະແດງໃຫ້ເຫັນວ່າ ອັດຕາການຕິດເຊື້ອເຮສໄອວີໃນ ສປປ ລາວ ມີທ່າອ່ຽງເພີ່ມຂຶ້ນ.ໃນແຕ່ລະປີ ຄົ້ນພົບຜູ້ຕິດເຊື້ອເຮສໄອວີ ເພີ້ມຂຶ້ນ ແລະ ຈຳນວນສະສົມຜູ້ຕິດເຊື້ອ ທີ່ມີໜ້າປິ່ນປົວດ້ວຍຢາຕ້ານເຊື້ອເຮສໄອວີ ຈຳນວນ 12,803 ຄົນ ໃນທົ່ວປະເທດ. ຕົວເລກລາຍງານໃນປີ 2024 ນັບແຕ່ເດືອນ ມັງກອນ ເຖິງ ເດືອນກັນຍາ ພົບຜູ້ຕິດເຊື້ອເຮສໄອວີ ຈຳນວນ 1,523 ຄົນ, ໃນນີ້ 53% ແມ່ນກຸ່ມໄວໜຸ່ມ ອາຍຸລະຫວ່າງ 15-29 ປີ.
ທ່ານ ດຣ. ໄພວັນ ໄດ້ກ່າວຕື່ມວ່າ: ໃນການຢຸດຕິການແຜ່ລະບາດຂອງເຊື້ອເຮສໄອວີ ພາຍໃນປີ 2030 ຢູ່ ປະເທດລາວຍັງມີສິ່ງທ້າທາຍຫຼາຍດ້ານ ຕໍ່ ສປປ ລາວ ກໍ່ຄືທົ່ວໂລກທີ່ຈະຕ້ອງໄດ້ເອົາໃຈໃສ່ປັບປຸງການບໍລິການ ໂດຍເລັ່ງໃສ່ການນຳໃຊ້ຍຸດທະສາດ ແລະ ນະວັດຕະກຳອັນໃໝ່ ເພື່ອຕອບໂຕ້ຕໍ່ການແຜ່ລະບາດເຊື້ອເຮສໄອວີ ພ້ອມທັງເສີມຂະຫຍາຍວຽກງານໂຄສະນາປ້ອງກັນໃຫ້ກວ້າງຂວາງທົ່ວເຖິງ ເຊັ່ນ: ການນຳໃຊ້ຖົງຢາງອະນາ ໄມໃນເວລາມີເພດສຳພັນ, ການກິນຢາປ້ອງກັນກ່ອນການສຳຜັດເຊື້ອເຮສໄອວີ (PrEP) ໃນກຸ່ມປະຊາກອນສ່ຽງ, ລວມທັງເຂົ້າເຖິງການກວດກັ່ນຕອງດ້ວຍຕົນເອງ ແລະ ກວດເລືອດເພື່ອບົ່ງມະຕິໃຫ້ຮູ້ສະພາບການຕິດເຊື້ອເຮສໄອວີ ແລະ ເຂົ້າເຖິງການປິ່ນປົວໂດຍໄວຈຶ່ງຈະຫຼຸດຜ່ອນອັດຕາການຕິດເຊື້ອ, ການເຈັບປ່ວຍ ແລະ ການເສຍຊີວິດຈາກພະຍາດດັ່ງກ່າວ.
ການສະເຫຼີມສະຫຼອງວັນສາກົນຕ້ານເອດ ແມ່ນເລີ່ມຕົ້ນແຕ່ປີ 1988 ເປັນຕົ້ນມາ ຊຶ່ງເປັນການສ້າງຂະບວນການໂຄສະນາ ປ້ອງກັນ ແລະ ເພື່ອຢຸດຕິການແຜ່ລະບາດຂອງເຊື້ອເຮສໄອວີ. ສໍາລັບຄໍາຂວັນຂອງວັນສາກົນຕ້ານເອດປີ 2024 ແມ່ນ “ພ້ອມກັນເປັນເຈົ້າການຮັກສາສຸຂະພາບ – ມີສິດເຂົ້າເຖິງບໍລິການກວດເລືອດ ແລະ ປິ່ນປົວ” Take the rights path” my health, my rights” ເພື່ອໃຫ້ທຸກຄົນໄດ້ຮັບຮູ້ ແລະ ເຂົ້າໃຈວ່າການຮັກສາສຸຂະພາບແມ່ນເລີ່ມຈາກຕົນເອງ ແລະ ທຸກຄົນແມ່ນມີສິດເຂົ້າເຖິງການບໍລິການຢ່າງເທົ່າທຽມ.
ແຫຼ່ງຂ່າວ: ວສລ
ພ
